4-æм декабры Республикæ Хуссар Ирыстоны Президент Бибылты Анатоли йæхимæ райста Хетæгкаты Къостайы номыл паддзахадон драмон театры артистты иу къорды режиссер Дзуццаты Тамерланы сæргълæудæй, цæмæй сын арфæйы ныхæстæ загътаид сæ радон стыр æнтысты тыххæй.

Æрæджы нæ театры артисттæ æрыздæхтысты сæ гастролон балцæй. Уыдон æрмæст ноябры мæйы хайад райстой æртæ Æппæтадæмон фестивалы. Нæ театры труппæ сæ арæхстдзинад æвдыстой Санкт-Петербурджы камерон театры уагъдцæуæг фестивалы, горæт Налцыччы æмæ Дзæуджыхъæуы сценæтыл. Уыдонæн сæ гастролтæ уыдысты æнтыстджын æмæ æрыздæхтысты хорзæхтимæ.

Фембæлды рæстæджы театры аивадон къухдариуæггæнæг Дзуццаты Тамерлан Президент Бибылты Анатолийæн цыбыртæй радзырдта сæ гастролты тыххæй. «13 ноябрæй 27 ноябрмæ Хуссар Ирыстоны паддзахадон драмон театр хайад иста фестивалты. Санкт-Петербургы мах равдыстам спектакль «Фандо и лис», кæцыйыл бакуыста æвзонг режиссер Ян Яновский. Спектакль тынг фæцыд сæ зæрдæмæ, уынаффæ йыл цыдис, спектакль куы фæцис, уæд. Уыцы ран хайад иста Уæрæсейы Федерацийы Хуссар Ирыстоны æхæстбарджын минæвар Гасситы Знауыр дæр. Дыккаг спектакль «Хъæд» та равдыстам Æппæтадæмон фестиваль «Южная сцена»-йы горæт Налцыччы, кæцыйыл бакуыста режиссер Андрей Цисарук. Спектакль уыцыиу рæстæджы хорзæхтæ райста æртæ номинацийы. Уыдон хицæуттæ баисты режиссер Андрей Цисарук — «Уырыссаг классикæ нырыккон бакасты» номинацийы, «Сылгоймаджы хуыздæр роль»-ы номинацийы та — нæ паддзахадон драмон театры дыууæ артисткæйы: РХИ-йы сгуыхт артисткæтæ Гæджиты Ингæ æмæ Мæргъиты Ингæйы. Уый хорз æнтыст у. 23-æм ноябры та хайад райстам Дзæуджыхъæуы уагъдцæуæг 8-æм дунеон фестиваль «Сценæ æнæ арæнтæй»-йы. Равдыстам дзы Гаглойты Владимиры фыст пьесæ «Тугæйдзаг чындзæхсæв», кæцыйы бацæттæ кодта Тъехты Васили. Номинаци «Сылгоймаджы хуыздæр роль»-ы фæуæлахизуæвæгыл нымад æрцыд артисткæ Хуыгаты Альбинæ. Спектаклы фæуды фæстæ Цæгат Ирыстон-Аланийы Культурæйы министр бакаст Битарты Вячеславы барамындтæ нæ артисттæн Республикæ Цæгат Ирыстон-Аланийы сгуыхт артистты нæмттæ радтыны тыххæй. Уыцы кадджын ном райстой Наниты Витали, Багаты Георги æмæ Харебаты Жан-Жак», — радзырдта Дзуццаты Тамерлан.

Йæ рады Президент Бибылты Анатоли дæр банысан кодта театры коллективы стыр æн-тыстытæ æмæ сæрмагондæй арфæ æмæ бузныджы ныхæстæ загъта артисттæн. «Æз нымайын афтæ æмæ нæ театры коллективы ацыд гастролты уыдис æнтыстджын. Уымæн æвдисæн сты, цы дипломтæ æмæ кадджын нæмттæ райстой, уыдон дæр. Уый мæнæн у тынг æхсызгон. Абон сымах цы уавæрты кусут, уымæ нæ кæсгæйæ, æвдисæн вæййæм уе ʻнтыстытæн. Абон æз сымахæн зæрдиаг арфæтæ кæнын уæ гастролон балцы хорз фæстиуджыты тыххæй. Æртæ фестивалæй дæр аккаг хорзæхтæ æрхæссын хуымæтæджы нæу. Уыцы фестивалты сымах равдыстат уе стыр куыст, уым саргъ кодтой уæ режиссерты куыстæн дæр æмæ сымахæн артисттæн дæр. Цæгат Ирыстоны сгуыхт артисты ном райсын у уæ куыстæн стыр аргъ скæныны нысан. Ноджыдæр уын арфæ кæнын æмæ уын мæ зæрдæ зæгъы стыр æнтыстытæ уе сфæлдыстадон куысты. Уырны мæ, æмæ фидæнмæ 27-æм марты театры дунеон бон ног бæстыхайы кæй нысан кæндзыстæм, уый. Æз æдзухдæр контрол кæнын театры арæзтадыл æмæ мах иумæ уыцы ран банысан кæндзыстæм театры бæрæгбон. Фæнды ма мæ банысан кæнын уый дæр, æмæ культурæйæн кæй цæудзæн алыварсон æххуыс. Сымахæрдыгæй та мæ ныфс ис, æмæ нын нæ зæрдæтæ кæй рухс кæндзыстут ног, цымыдисон спектаклтæй, уæ профес-сионалон хъазтæй», — загъта Бибылты Анатоли.

Фембæлды рæстæджы ма бæстæйы сæргълæууæг Мæргъиты Ингæйæн йæ райгуырæн боны цытæн сæрмагондæй загъта арфæйы ныхæстæ æмæ йын балæвар кодта, Хуссар Ирыстоны аргъуантæ æвдыст кæм цæуынц, ахæм монетæтæ æмæ дидинджыты баст.

Театры артист Багаты Георги та бахатыд Бибылты Анатолимæ ахæм фæндонимæ, цæмæй дзæнæттаг, курдиатджын актер Джиоты Асланæн йæ амæлæты фæстæ лæвæрд æрцæуа Республикæ Хуссар Ирыстоны сгуыхт артисты кадджын ном. Президент Бибылты Анатоли ныфс бавæрдта, фарстмæ кæй æркæсдзысты æмæ йæ æвæрццагæй кæй аскъуыддзаг кæндзысты.

Цхуырбаты Ларисæ

Comments are closed, but trackbacks and pingbacks are open.