Сырх Дзуары Дунеон Комитет дарддæр кæны комплексон æххуыс, хæстæй иууыл æфхæрддæр æмæ тыхстдæр категориты цæрджытæн. Комитет се ‘нцой лæууы, 1989-1992 æмæ 2008-æм азты æбæрæгæй чи фесæфтысты, уыдоны бинонтæн. Цæвиттон, ивгъуыд аз июлы мæйы, Хуссар Ирыстоны Хицауадимæ бадзырдтой, цæмæй æбæрæгæй чи фесæфтысты, уыцы æмбæстæгты тыххæй сæ бинонты уæнгтæ исты зонæнтæ радзурой. 8-11 августы та Комитеты медицинон тæрхондоны эксперттæ Хуссар Ирыстоны паддзахадон университеты ауагътой тренинг. Тренингы фæстæ, декабры мæйы кæронмæ волонтертæ-студенттæ æмæ Комитеты миссийы æмкусджытæн бантыст, æбæрæгæй чи фесæфтысты, уыдоны цардæй алыгъуызон зонæнтæй 51 анкетæйы байдзаг кæнын куыд Хуссары, афтæ Цæгат Ирыстоны дæр. Ацы организаци ивгъуыд аз августы мæйы бацæттæ кодта нывты равдыст республикæйы цыппар районы дæр ахæм номимæ «Воспоминание длиною в жизнь» æмæ дзы æдæппæт уыд, æбæрæгæй чи фесæфтысты, уыдоны нæмттæ арыны тыххæй 45 ныв-иллюст-рацийы. 30 августы ма Комитет Хуссар Ирыстоны Хицауады фæрцы сорганизаци кодта мадзæлттæ, кæцытæ баст уыдысты æбæрæгæй фесæфæг адæймæгты Æхсæнадæмон бонимæ. Чи фесæфтысты, уыдоны сывæллæттæн ауагъдæуыд сфæлдыстадон мадзал «Подари незабудку», цыран æрыгон хайадисджытæ æллыгæй символикон ныв кодтой «незабудка» (ма рох-кæн – дидинæг). Уымæй дарддæр ма скверы сагъд æрцыд чеса (самшит) бæласы тала æмæ уымæй ссардтой æбæрæгæй фесæфæг æмбæстæгты рухс нæмттæ. Ам уагъд æрцыд сæйраг церемони æмæ дзы раныхас кодтой бæрнон адæймæгтæ, афтæ ма, чи фесæфт, уыдоны бинонтæй дæр. Церемони фæци Нæлгоймæгты хоры ралæудæй. Июль, октябрь æмæ декабры мæйты уагъд æрцыдысты æртæ уæлæмхасæн мадзалы, æбæрæгæй фесæфæг адæймæгты бинонты хайадистæй. Комитеты кусджытимæ уыдон уыдысты Джеры дзуары, Ленингоры музей æмæ Хуссар Ирыстоны паддзахадон драмон театры спектаклы. Алкæцы мадзалы дæр хайад райстой 30 адæймаджы бæрц.
2016 азы декабры мæйы Версуайы (Швейцари) уыд Æртæфарсон координацион механизмы фæлгæтты дæсæм фембæлд æмæ дзы ныхас цыд, æбæ-рæгæй чи фесæфтысты, уыдон хъыс-мæты фæдыл. Комитет ацы фембæлды æмæ æбæрæгæй фесæфæг æмбæстæгты хъысмæт рабæрæг кæныны тых-хæй æрдзырдта Гуырдзыстон, Хуссар Ирыстон æмæ Уæрæсейы хайадисджытимæ иумæ. Ацы организаци, конфликты рæстæджы йæ бинонтæй чи фæиппæрд, уыцы адæймæгтæн, хæстæджытæ æмæ æввахс адæймæгтæн дæтты Сырх Дзуары Ныстуантæ, кæнæ та сæ ифтонг кæны телефонон бастдзинадæй. Кæрæдзийæ чи фæиппæрд конфликты рæстæджы, уыцы бинонтæн зын у æдзухон бастдзинад сæ хæстæджытимæ саразын. Уымæ гæсгæ уыцы хæст æххæст кæныны фæрцы ахæм бинонтæ ивгъуыд азы дыккаг æмбисы Комитеты руаджы телефонон бастдзинадæй спайда кодтой 20 хаттæй фылдæр. Афтæ ма ахъаз кодта, кæ-рæдзийæ чи фæиппæрд, уыдонæн æмæ уый фæрцы се ‘ввахс адæймæгтимæ баиу сты дыууæ адæймаджы. Уымæй дарддæр ма организаци æххуыс кæны, дыууæ ‘рдыгæй дæр ахст чи у, уыдонмæ алыгъуызон æрвитæггæгтæ фæхæццæ кæныныл. 6 æрвитæггаджы йæ хицаумæ фæхæццæ кодтой Гуырдзыстоны хæстæджытæй, Цхинвалы ахæстоны чи бады, уымæ. Уымæй дарддæр ма ахъаз кæны бинонты фембæлдтытæ ахст æмбæстæгтимæ дæр.
Сырх Дзуары Комитет социалон æх-хуысы Программæйы фæлгæтты æдзух-дæр æххуыс кæны хæлцадон æмæ æн-дæр товартæй цæрджыты иууыл тыхст-дæр адæймæгтæн. Цæвиттон, ахæм æххуыс бакæны бирæсывæллонджын би-нонтæн ныллæг царды æмвæзадимæ, иунæгæй чи цæры, ахæм зæронд адæймæгтæн, иунæг сахъатджын æмбæс-тæгтæ æмæ æндæртæн. Июлæй декабры мæйы фæудмæ Комитет ахæм æххуыс бакодта 208 бинонтæй 528 адæймагæн, 10 æмбæстагæн та бачындæуыд финансон æххуыс æмæ уый фæрцы алы адæймаг дæр ифтонг æрцыд æрвылбонон æртæ хатты хæлцæй, афтæ ма сын æххуыс цыд элементарон гигиенæйы предметтæй. Ноджы ма 73 бинонтæ ифтонг æрцыдысты сугæй (фæйнæ 4 кубометры), иннæ бинонтæ та, ома, регулярон æгъдауæй гуманитарон æххуыс чи исы, уыдон та пайда кæнынц электронон кæнæ газы прибортæй сæ цæрæн бынæттæ хъарм кæнынæн. Цхинвалы зæрæдтæ æмæ инвалидты пансионат «Забота»-йæн радтой ссад, сæкæр, макаронтæ æмæ æндæр хæлцадон продукттæ, Ленингоры сывæллæтты хæдзарæн дæр барвыстой хæлцадон продукттæ æмæ хъомыл-гæнинæгтæн та – скъолайон комплекттæ.
Уалдзыгон-сæрдыгон рæстæджы Хуссар Ирыстоны цæрджыты хæдзарадты дыргъдæттæ æмæ байтыдтытæ бабын сты ихуарды фæстиуæгæн, уавæр бахынцыдта Комитет æмæ июлы мæйы баххуыс кодта дыууæ дæрддзæф хъæуы 40 бинæн-тæн (160 адæймаджы), уымæ гæсгæ райстой джитъри, пъамидор æмæ цывзыйы садзæнтæ.
Комитетæн æдзухон бастдзинад ис хъæутæ æмæ районты администрацитимæ, афтæ ма æххуыс кæны иууыл тыхстдæр æмбæстæгтæн. Амæйразмæ хъæууон администрацитæн лæвары хуызы лæвæрд æрцыд хъæууонхæдзарадон техникæ, цæмæй сæ пайда кæной бынæт-тон фермертæ. Ныр та Дзау æмæ Ленингоры районты ветеринартæн балæвар кодта бæхтæй. Организаци ма ортопедион æххуыс кæны хицæн æмбæстæгтæн. Цæвиттон, ивгъуыд азы дыккаг æмбисы 6 адæймаджы бахатыдысты Комитетмæ æмæ райстой инвалиды бандæттæ æмæ лæдзгуытæ, æртæ æмбæстагæн та бах-хуыс кодтой протезтæй. Æнæаргъæвгæ медицинон æххуысы тыххæй тыхст рынчынты фæхæццæ кодтой Тбилис æмæ Гуры медицинон уагдæттæм. Уымæй дарддæр ма Комитет регулярон æгъдауæй бацæуы 7 ацæргæ адæймæгтæм, куыд Цхинвалы, афтæ районтæм дæр æмæ сын бакæны санитарон æххуыс.
Хуыбиаты Н.
Comments are closed, but trackbacks and pingbacks are open.