Хуссар Ирыстоны дунеон информацион агентад «Спутник»-ы уæвынадыл 20-æм июны сæххæст   дыууæ азы. Уый цытæн ацы бон информацион агентад «Спутник»-мæ фæуазæг сты Республикæ Хуссар Ирыстоны Президент Бибылты Анатоли, Парламенты Сæрдар Гасситы Петр, æхсæнады минæвæрттæ, журналисттæ æмæ æндæртæ.

Агентад «Спутник»-ыл дыууæ азы сæххæсты боны цытæн ма ацы бон арæзт æрцыд видеохид Мæскуы-Сухум-Цхинвал.

Сæ бæрæгбоны цытæн агентад «Спутник»-æн арфæ ракодта Президент Бибылты Анатоли:

– Дыууæ азы бирæ не сты, фæлæ уыцы цыбыр рæстæджы сымах кæнут гуырахстджын куыст. Сымах ам, Хуссар Ирыстоны, уæ агентады руаджы цы проекттæ бакуыстат, уыдон сты тынг хорз æмæ цымыдисон æмæ не ‘хсæнады ссардтой сæ бынат. Уыдонæй сæ иу уыд  сывæллæттæн «Елка доброты». Уый руаджы сидзæр сывæллæттæн сæххæст сты сæ кæцыдæр бæллицтæ.

Банысан ма кæндзынæн уый, æмæ уæ информацион агентад нæ республикæйы у иунæг хæдбар информацион ресурс. «Спутник»-ы куыст алыхатт дæр хицæн кодта, хæдбар кæй у, уымæй. Йæ девиз   у «мах дзурæм, æндæртæ цы нæ дзурынц, уый» æмæ йæ æххæст дæр кæнут. Уæ куысты тыххæй уын зæгъын стыр бузныг æмæ уын бæрæгбоны тыххæй та кæнын арфæ.

Нæ республикæйы Президент Бибылты Анатоли «Спутник»-æн зæрдылдарынæн балæвар кодта Хуссар Ирыстоны адæмон нывгæнæг æмæ Цæгат Ирыстоны сгуыхт нывгæнæг Куымæридтаты Аркъадийы конд ныв. Хуссар Ирыстоны минæвар   Уæрæсейы Федерацийы номæй агентады схорзæхджын кодта грамотæйæ.

Хуссар Ирыстоны Парламенты Сæрдар Гасситы Петр арфæйы ныхæстæ загъта агентады коллективæн. Уый арфæйы ныхæстимæ банысан кодта: «Журналистты куыст искæйы ныхæстæй нæ зонын, æз мæхæдæг дæр дæс азы фæкуыстон ацы сферæйы æмæ фидарæй мæ бон зæгъын у, «Спутник»-ы фæзынды руаджы информацион тыгъдад æмæ продукт кæй схызтис бæрзонд, нырыккон æмвæзадмæ. Сымахæн ис тынг хорз коллектив, æмæ нæ ныфс ис, дарддæр дæр нын уæ куыстæй нæ зæрдæтæ кæй рухс кæндзыстут», – загъта йæ раныхасы Гасситы Петр.

Агентад «Спутник»-ы къухдариуæггæнæг Нарек Ордян та æрæмбырдуæвджытæн æрдзырдта сæ куысты фæстиуджыты тыххæй. «Махимæ социалон хызæджы тынг бирæ адæм зонгæ кæнынц. Дыууæ азы дæргъы нæ сайтмæ æрбахызтысты 808794 адæйма-джы, 2,5 милуан адæймагæй фылдæр та бакастысты нæ видеоæрмæджытæм. Банысан ма кæн-дзынæн уый, æмæ нæ сайттæй иууыл тынгдæр чи пайда кæны, уыдоны ‘хсæн дыккаг бынат ахсы Гуырдзыстон. Уый та, мæнмæ гæсгæ, у тынг хорз,  уадз æмæ йæ зоной, Хуссар Ирыстон размæ кæй цæуы, уый».

Бæрæгбонон фембæлды «Спутник»-ы коллектив видеохиды руа-джы арфæйы ныхæстæ райста Мæскуыйæ æмæ Абхазæй.

Мæскуыйæ уыдонæн арфæ ракодта РХИ-йы минæвар УФ-йы Гасситы Знауыр. Уый бузныг загъ-та сæ активон куыстæн. Банысан кодта, зæгъгæ,  «Спутник»-ы коллективæй алкæимæ дæр у хорз зонгæ. Гасситы Знауыр ма журналисты куыст зын кæй у, уый хынцгæйæ, банысан кодта, зæгъгæ, иу азы куыст банымайæн ис дыууæ азыл. Банысан ма кодта, кæй сын ис диссаджы командæ æмæ æвзонг курдиатджын къухдариуæггæнæг æмæ сын æрвылбон дæр кæй пайда кæнынц сæ сайтæй.

Абхазаг «Спутник»-ы студийы видеохиды руаджы бакастысты сæ къухдариуæггæнæг Руслан Бганбайы арфæйы тел. Уый та банысан кодта, зæгъгæ, цыбыр æмгъуыдмæ сын сæ размæцыд кæй уынынц æмæ сын уый у æхсызгон.

Бирæ  арфæйы ныхæстæ ма райстой видеохиды руаджы сæ иннæ коллегæтæй дæр.

«Спутник»-æн ма арфæйы ныхæстæ загътой уæрæсейаг проект «Ты супер»-ы хайадисæг Хуссар Ирыстонæй Гæбæраты Аринæ æмæ скъола-интернаты ахуырæн æддейæ хайады гæс Харебаты Маринæ. Уыдон та сын сæ ахуыргæнæндоны номæй радтой арфæйы фыс-тæг.

Кæронбæттæны журналисттæ фарстытæ лæвæрдтой РХИ-йы Президент Бибылты Анатоли æмæ «Спутник»-ы къухдариуæггæнæг Нарек Ордянмæ.

Газет «Хурзæрин»-ы коллектив дæр зæрдæбын арфæ кæны «Спутник»-ы æвзонг коллективæн.

Туаты Ларисæ

Comments are closed, but trackbacks and pingbacks are open.