Сæ бакæнгæ куысты фæдыл

Бастдзинад æмæ дзыллон коммуникациты комитеты сæргълæууæг Джиголаты Хасан хыгъд радта, 2020 азы йæ дæлбаруæвæг комитетæн цы куыстытæ бакæнын бантыст, уыдоны тыххæй.

Бастдзинад æмæ дзыллон коммуникациты комитеты дæлбары  ис 4 паддзахадон службæйы, кæцытæ дзуапп дæттынц прессæ парахат кæнын, фыстæджытæ бынатмæ фæхæццæ кæнын æмæ пенситæ æмæ æххуысы фæрæзтæ сæ хицæуттыл æмбæлын кæнынæн. Теле æмæ радио хаххы хайадæн йæ хæс у телеканал «Ир»-æн эфиры уадзын æмæ республикæйы территорийыл Уæрæсейы телеканалты куыст ифтонг кæнын. Паддзахадон  унитарон куыстуат «Телекоммуникацион службæ» æмæ «Электробастдзинад» – цæрджыты ифтонг кæнынц телефоны бастдзинад æмæ интернетæй. «Строй Инвест» та архайы бастдзинады хæххытæ цалцæг кæныныл.

Хыгъд дæттыны рæстæджы бастдзинады комитеты сæргълæууæг æрдзырд-та, ацы цыппар паддзахадон унитарон куыстуат абон цы уавæрты кусынц, ууыл. «2020 азы «Телерадиокоммуникацион службæ» сарæзта республикæйы территорийыл цалдæр объекты – «Паук», «Малда», «Гуфта», «Уæлхох», «Орчъосан», «Цадбын». Уыдон се ‘ппæт дæр арæзт æрцыдысты æртæ мультиплексыл. Фыццаг дыууæ мультиплексы ис 20 каналы. Æртыккаджы фæрцы кусынц ПТРК «Ир» æмæ телеканал  «Осетия-Ирыстон». Цалынмæ алæвæрдтæ æндæр спутникмæ нæ акодтам, уæдмæ уал бастдзинады хызæгтæн арæзт æрцыд корректировкæ. “Паук”-ы объекты бакондæуыд ахадгæ куыстытæ. Ам арæзт æрцыд FM 102,3 антеннонфидерон хæдзарад. Æртæ та дзы адæттæн вышкæтæ арæзт æрцыд, кæцытæ уыцыиу рæстæг дæттынц 500 вт. Ныр уыдоны фæрцы радиоканал «Ир FM 102,3 хуыздæр у йæ диапазон æмæ йæ тыгъдад та у дыууæ хатты фылдæр. Ацы объекты ма монтаж æрцыд резервон радиорелийы комплексон системæтæ «Эра» æмæ «Микротик WIFI». Ацы системæйы сигнал исдзысты «Паук-Гуфта», «Гуфта-Эрцъо» æмæ уымæй ПТРК «Ир»-ы сигнал кæндзæн хуыздæр. Ахæм æнгæс куыстытæ бастдзинады фадыджы конд æрцыд Ленингоры районы дæр. Ныр республикæйæн сæрмагонд каналты бастдзинад кæй фæзынд, районтæм æмæ дæрддзæф хъæутæм бастдзинады хæххытæ кæй æрнывыл сты, уый зæрдæйæн хæссы æхцондзинад. Уыцы куыстытæ бакæнын æнцон нæ уыд, уымæн æмæ ма цалдæр азы размæ дæр бастдзинады инфраструктурæ пырх уыд æмткæй сисгæйæ.

Уый ма куыд банысан кодта, афтæмæй комитет архайдта мидæггагон хызæгтæ æмæ сæрмагонд передатчикты цалцæг кæныныл дæр. Стационарон телефонтæй чи пайда кæны, уыдоны нымæц абон кæд афтæ бирæ нал у, уæд-дæр абоненттæ арæх фæдзурынц, сæ хызæгтæ куы фехæлынц, уæд. Кæд æмæ нæ горæты цы АТС-тæ ис, уыдонæн сæ бон у лæггад кæнын 7 мин адæймагæн уæддæр абонентты нымæц иу мин адæймагмæ дæр нæ хизы. Уыдон сты, сæйраджыдæр, ас адæм смартфонтимæ архайын чи нæ арæхсы. Æхсæнадæмон бастдзинадæй дæр фæпайда кæнынц стационарон телефонтæй. Æрмæст 2020 азы ацы лæггадæй спайда кодтой 1975 хатты. «Нæ дуджы бастдзинадæн ис стратегион нысаниуæг, уый баст у æдасдзинад, хъахъхъæ-нынад æмæ экономикæйы райрæзты фарстатимæ. Æнæинформацион технологиты хызæгæй царды иу фадыгмæ дæр бавналæн нæй. Уымæ гæсгæ мах комитет хæсджын у, 100 абонент йедтæмæ куынæ уа, уæддæр сын гъæдджын бастдзинад аразын. Уымæй дарддæр ма бастдзинады фæрцы республикæйы бюджетмæ цæуы реалон æфтиæгтæ. Ныртæккæ республикæйы цы бастдзинады хахх ис, уый хæссы бирæ æфтиаг. Æмткæй 2020 азы паддзахадон бюджетмæ бахастам 3 милуан сомы. Пенсион фондмæ та – 3 милуанæй фылдæр 2019 азмæ абаргæйæ, 2020 азы фиддонтæ фæфылдæр сты 500 мин сомы. Æфтиæгтæ ма цæуы Паддзахадон бюджетмæ мах лæвæрд лицензиты фæрцы дæр. Авд лицензи лæвæрд æрцыд Æхгæд акционерон æхсæнад «Остелеком»-æн. Иу лицензи та ис «Газпром трансгаз – Ставрополь»-æн. Уыцы лицензитæй та бюджетмæ бацыд 18 милуан сомы», – дзырдта комитеты сæргълæууæг.

Постон-телеграфон службæйы тыххæй та комитеты сæргълæууæг куыд зæгъы, афтæмæй стыр куыст цыд цæрджыты ‘хсæн, цæмæй рафыссой, куыд бынæттон, афтæ уæрæсейаг газеттæ æмæ журналтæ дæр. Зæгъæм, ацы службæйы фæрцы афæдз æрвыст æрцыд 13831 фыстæджы, бандеролтæ – 1559, посылкæтæ – 123. Афтæ ма кусæгон режимы хæдзæрттæм хаст цыдысты пенситæ æмæ сывæллæтты пособитæ.

УАЗÆГТЫ Марфа