Алы уагдон, куыстуат дæр фæстиуджытæ скæны, ацæугæ рæстæг ын цы бантыст бакусын, уыдонæн, стæй йæ разы æрæвæры дарддæры архайдæн ноджы егъаудæр хæстæ. Æрæджы нæ республикæйы иумиагахуырадон скъолаты дæр ахицæн 2015-2016 ахуыры аз æмæ адæмон ахуырады разамонджытæ фæстиуджытæ аразынц сæ бакæнгæ куыстæн. Ацы ахсджиаг фарст Цхинвалы районы скъолатæ та куыд сæххæст кодтой, цахæм æвæрццаг фæстиуджытæ бафтыд сæ къухы, стæй иуæй-иу цухдзинæдты фæдыл мын бæстон æрдзырдта районы адæмон ахуырады хайады сæргълæууæг Лолоты Барис:

— Алы разамонæгæн дæр æхсызгон вæййы, йæ дæлбаруæвæг уагдæттæн зæрдæрухс-гæнæн æнтыстытæ куы вæййы, уæд уый. Кæй зæгъын æй хъæуы, уыцы æнтыстытæй разы дæн æз дæр. Хыгъдон рæстæджы хайад бакодта бæрæг куыст æмæ здæхт уыд ахуырад, хъомылады гъæд фæхуыздæр æмæ ахуыргæнинæгты сомбоны активон цардмæ бацæттæ кæнынмæ. Хайады алы кусæг дæр йæ куыст арæзта развæлгъау бацæттæгонд планмæ гæсгæ. Гом уроктæ æмæ тематикон мадзæлттæ уадзыны тыххæй арæзт æрцыдысты графиктæ. Уæлдай фылдæр хъусдард здæхт цыд  æрыгон  специалисттæм,  ауагъдæуыд консультацитæ тематикон æмæ урочы плæнттæ ба-цæттæ кæныны фæдыл. Ахуыры азы дæргъы скъолаты уагъд цыдысты олимпиадæтæ, фронталон фарстатæ æмæ æндæр ахæмтæ æппæт ахуыргæнæн дисциплинæтæй, цæмæй рабæрæг уыдаиккой ахуыргæнинæгты зо-нындзинæдтæ, рацæугæ æрмæг куыд бамбæрстой, уый фæдыл. Арæзт æрцыдысты тесттæ предметон олимпиадæтæ уадзын, стæй республикон олимпиадæмæ кандидаттæ равзарыны тыххæй. РХИ-йы зонад æмæ ахуырады министрады  бахæсмæ  гæсгæ  ахуырдзаутæй равзæрстой, Мæскуымæ Ногазон Назбæласмæ  æмæ Хъырымы сæрдыгон лагермæ сывæллæтты арвитыны тыххæй кандидаттæ.

Ныртæккæ не скъолаты ахсджиаг сты хæрæндæттæ æмæ уыдон куыстмæ здæхтæуы уæлдай хъусдард. Нæ хайады кусджытæ республикæйы санитарон-эпидемиологон станцы кусджытимæ иумæ систематикон æгъдауæй бæрæг кодтой сæ уавæр æмæ фæтк чи хæлдта, уыдон æфхæрд æййæфтой.

Районы скъолаты ахуыргæнинæгтæ активон хайад райстой къласæн æмæ скъолайæн æддейæ алыгъуызон мадзæлтты куыд районы, афтæ республикæйы фæлгæтты дæр. Алы ауагъдгонд мадзалæн дæр сарæзтой æмбæлон плæнттæ æмæ сценаритæ. Районы æппæт скъолатæ дæр банысан кодтой ахæм къалендарон бæрæгбонтæ, куыд республикæйы Тырысайы бон, Республикæ Хуссар Ирыстоны бон 20 сентябры, Хетæгкаты Къостайы райгуырæн бон 15 октябры, Ногазон мадзæлттæ, 23 февралы — Райгуырæн бæстæ хъахъхъæнæджы бон, Сылгоймæгты дунеон бон  8 марты æмæ Ирон æвзаджы бон та 15 майы. Дменис æмæ Къостайыхъæуы астæуккаг скъолаты ахуыргæнинæгтæ хайад райстой республикон викторинæ «Брейн-ринг»-ы, цыран Дменисы скъолайы хайад-исджытæ бахаудысты æрдæгфиналмæ æмæ хорзæхджын æрцыдысты РХИ-йы Фæсивæд æмæ спорты хъуыддæгты фæдыл комитеты грамотæтæй. Дменисы ахуырдзаутæн ма хорз æнтыстытæ уыд скъоладзауты ‘хсæн шашкæтæй республикон ерысты, уыдон бацахстой фыццаг бынат. Зæгъын хъæуы уый, æмæ спорты ацы хуызæй дменисæгтæ ныр цалдæр азы фыццаг бынат кæй никæмæн ауадзынц.

Æвзонг специалисттæ амæйразмæ рацыдысты аттестацийы æмæ райстой æмбæлон квалификацион категоритæ. Ног ахуыры азы та районы иннæ ахуыргæнджытæ хъуамæ ацæуой ахæм аттестаци. Хайады сæйраг хæс у ахуыргæнджыты ацы бæрнон мадзалмæ бацæттæ кæнын, уымæн æмæ азæй азмæ ахуыргæнæгмæ домæнтæ кæнынц фылдæр. Уымæ гæсгæ уыдон хъуамæ сæ предметтæ амонын æмæ цайдагъдзинæдтæй уой æххæст.

Ахуырады хайад ма æмбæлон органтимæ кодта ахадæн куыст æнахъомты ‘хсæн. Систематикон æгъдауæй цыдысты скъолатæм æмæ уагътой хъомыладон-профилактикон мадзæлттæ. Ахуыргæнинæгты ‘хсæн рабæрæг, скъолайы царды фæтк чи хæлдта, ахæмтæ æмæ семæ хицæнтæй уагъд цыд ахадæн куыст, афтæ ма сæ ныййарджытимæ дæр. Ахуыры аз фæцис скъолаты рауагъдонтимæ бæрæгбонон мадзалæй. Цытджын æгъдауæй уыдонæн лæвæрд æрцыдысты сæ аттестаттæ, арфæйы буклеттæ æмæ зæрдылдарæн лæвæрттæ.

Фæлæ банысан кæнын хъæуы, æнтыстыты æмрæнхъ скъолаты куысты нырма кæй ис цухдзинæдтæ дæр. Уыдон аиуварс кæныныл та хъуамæ кусой куыд иумиагахуырадон уагдæтты разамонджытæ, афтæ хайады кусджытæ дæр. Республикæйы предметон олимпиадæйы районæй хайад райста ирон æвзаг æмæ литературæйы дисциплинæйæ Сатихъары астæуккаг скъолайы 10-æм къласы ахуыргæнинаг Дыгъуызты Зæринæ æмæ ссис 3-аг къæпхæны дипломы хицау. Предметон олимпиадæйы фæстиуджытæ сты бынтон мæгуырау. Методкабинет æнæмæнг хъуамæ фæтыхджындæр кæна йæ куыст ацы уавæр рараст кæныны нысанæн. Къостайыхъæуы астæуккаг скъола сырæзт æрæджы æмæ уый йедтæмæ иннæ иумиагахуыргæнæн уагдæтты нæй спортивон залтæ. Уый та мæгуырауæрдæм æндавы ахуыртæ уадзыны гъæдыл. Нæй сын фаг спортивон инвентарь дæр. Афтæ ма скъолаты нæй хими æмæ физикæйы кабинеттæ, нæй реактивтæ химийæ фæлварæнтæ уадзынæн, ирон, уырыссаг æмæ англисаг æвзаджы предметтæн нæй цæст-уынгæ æрмæджытæ.

Ног ахуыры аз районы разамынад æмæ ахуырады хайад æппæт тыхтæ дæр хъуамæ аздахой цухдзинæдтæ аиуварс кæныны сæраппонд. Нæ нысан у, цæмæй схъомыл æмæ сахуыр кæнæм нæ рæзгæ фæлтæры, суой республикæйы сомбоны аккаг цардаразджытæ.

Хуыбиаты Н.

Comments are closed, but trackbacks and pingbacks are open.