Ахуыргæнæг урок уадзгæйæ фæйнæгыл сарæзта цалдæр хынцинаджы æмæ дзы иу ран барæй ауагъта рæдыд. Уый фæстæ фæрсы скъоладзауты, зæгъгæ, цахæм аргъ мын скæндзыстут мæ куыстæн. Скъоладзаутæ æзфæраздæронæй фенын кодтой, ахуыргæнæг рæдыд кæм ауагъта, уый, æмæ йыл худын райдыдтой. Уый фæстæ сын ахуыргæнæг бамбарын кодта, уыцы рæдыд барæй кæй ауагъта, цæмæй сын бакæса сæ реакцимæ. «Æз æрмæстдæр ауагътон иу рæдыд æмæ мыл худын райдыдтат, – зæгъы ахуыргæнæг. – Иннæ цалдæр хынцинаджы раст арæзт кæй сты, уый кой уæ ничи скодта. Царды уæрæх фæндагмæ куы ахизат, уæд уын уым дæр уæ рæдыдтытæм афтæ кæсдзысты».

Ацы хабар хауы милицийы куыстмæ дæр, уымæн æмæ æппынæдзух кусынц адæмимæ æмæ сæ куысты хъæндзинæдтæ æвиппайды цæсты бахауынц. Стæй ма министрадтæй иууыл бирæнымæц Мидхъуыддæгты ведомство у æмæ ма уыимæ сæ куыст дæр гуырахстджын у. Кæй зæгъын æй хъæуы, иууыл нывыл кæм цæудзæнис куысты гъæд, – æруадзынц рæдыдтытæ, чидæртæ дзы æмбæлон куыст нæ бакæнынц æмæ  се ‘хсæн фæзыны, милицийы ном дæлæмæ чи кæны, ахæмтæ дæр.

Хъыгагæн, фæстаг æрцæугæ трагикон цау бынтон æвзæрырдæм бандæвта æрмæст милицийыл нæ, фæлæ Республикæйы æгас политикон уавæрылдæр. Æгæрыстæмæй ма анхъæвзта нæ республикæйæ æддæмæ дæр æмæ «худинаджы» бын фестæм. Ахæм трагедийы æрцыд резонансон вæййы кæдфæнды дæр æмæ ма дзы барадхъахъхъæнæг органтæ хайад куы райсынц, уæд æхсæнады сабырадыл тынг бандавы.

Фæлæ уымæ æнæкæсгæйæ уæддæр милицийы куыстæн стыр нысаниуæг ис. Иу размæцыд паддзахад дæр ахæм нæй, цыран барадхъахъхъæнæг органтæ æхсæнадон фæтк æрæвæрыны хъуыддаджы сæйраг бынат ма ахсой. Афтæ у нæ æрыгон республикæйы дæр.

Милицийы куыстæн йæ сæйраг хай æххæст кæнынц фадыгон инспектортæ. Сæ хæстæ сты бирæ æмæ ма уый æддейæ милицийы иннæ службæтæн дæр сæрбахъуыды рæстæджы феххуыс кæнынц. Зæгъæм, æфсæддон парад, кæнæ концертон æмæ бæрæгбонон мадзæлттæ уадзыны рæстæджы фæхъахъхъæнынц æхсæнадон фæтк дæр. Фæлæ сæ комкоммæ хæстæ дæр æххæст кæнынц цæсгомджынæй. Куыст куыд домы, уымæ гæсгæ æрдæг аз иу хатт азилынц сæ территоритыл æмæ бабæрæг кæнынц цæрджыты, цæмæй инспектор йæ территорийы паспортмæ бахæсса хъæугæ ивындзинæдтæ. Уымæй уæлдай ма сæ хъус дарынц, цы ивындзинæдтæ цæуы æхсæнадон царды, не мбæстæгтæй чи цахæм фæндагыл лæуд у, цæрджытæ цæуыл тыхсынц æмæ бирæ æндæр цæмæдæрты. Исчи истæуыл куы фæтыхсы, уæд дæр йæ фыццаг фæдисон вæййы фадыгон инспектор.

 Фадыгон инспектортимæ фембæлгæйæ цæрджытæ раттынц фарстатæ сæ проблемæты  фæдыл æмæ сын милицийы кусæг кæнæ бынаты аскъуыддзаг кæны сæ фарста, кæнæ та сын бацамоны, цы саразын сæ хъæуы дарддæр. Горæт Цхинвалы фадыгон инспектор Остъаты Олегы ныхæстæм гæсгæ, ахæм фембæлдтыты рæстæджы лыстæггай æркæсынц адæмы проблемæтæм, хуыздæр бамбарынц цæрджыты тыхстдзинад æмæ, гæнæн уæвгæйæ, балæууынц æххуысхъуаг æмбæстæгты фарсмæ.

«Махæн нæ комкоммæ хæс у, цæмæй арæх аразæм ахæм азылдтытæ цæрджытыл. Фембæлдтыты рæстæджы мах нæхи æмæ милицийы управленийы телефоны номыртæ радтæм цæрджытæм, цæмæй сын тыхст рæстæджы милицимæ фæдзурын æнцондæр уа. Стæй ма ахæм мадзал ауадзыны фæстæ кусын дæр æнцондæр вæййы, уымæн æмæ базонгæ вæййæм адæмы проблемæтимæ, фенæм сын сæ царды уавæртæ, сног кæнæм территорийы цæрджыты нымæц. Уыцы информаци махæн стыр æххуыс вæййы нæ дарддæры куысты», – банысан кодта Остъаты Олег.

Æрмæст горæт Цхинвалы фадыгон инспектортæ ацы аз бабæрæг кодтой 1 минæй фылдæр хæдзары æмæ фатеры, кæцыты цæры 3 минæй фылдæр адæймаджы. Азылды рæстæджы ногæй банымайынц бинонты, сбæрæг кæнынц ног цæрджыты нымæц, кæд исчи æндæр ранмæ ацыд цæрынмæ, уæд æй сæхимæ фæнысан кæнынц. Фенынц ма æвæрæз бинонты царды уавæртæ дæр, цæмæй рæстæгыл фехъусын кæной æмбæлон службæтæм æмæ сæм сæ хъус æрдарой. Бабæрæг ма кæнынц, æхсæнгарз кæмæ ис, уыцы æмбæстæгты дæр, æмæ сын фенынц, сæ мигæнæнтæ цахæм уавæрты дарынц, уый.

Профилактикон куыст кæнынц, нозт æмæ наркотиктæм æмхиц чи у, стæй ма раздæр ахæстоны чи бадт, уыцы æмбæстæгтимæ дæр. Ацы категорийы æмбæстæгтæ милицийы лæууынц профилактикон хыгъды æмæ сæм ис уæлдай хъусдард здæхт, уымæн æмæ статистикæмæ гæсгæ бархалæн цаутæн сæ фылдæр хай саразынц уыдон. Уый фæстиуæгæн сын фадыгон инспектортæ æдзух кæсынц сæ архайдмæ, цахæм фæндагыл лæуд сты ныридæгæн, уымæ, æмæ сæм рæстæгæй-рæстæгмæ фæдзурынц милицийы хайадмæ дæр, цæмæй семæ аныхас кæной.

Статистикæмæ гæсгæ, куыд горæт Цхинвалы, афтæ районты дæр, иууыл арæхдæр фæткхалæн цаутæ æрцæуы бинонты хсæн. Фылдæр хатт вæййы афтæ æмæ хæдзары хистæр нæлгоймаг нозтджынæй загъд фæкæны йæ бинонтимæ æмæ фадыгон инспектор хъуамæ ахæм фæткхалæгæн йæ ных бакъуыра æмæ кæд ныхасæй нæ бамбара, уæд та йæ бафхæра закъоны фæлгæтты.

Уæдæ куыд уынæм, афтæмæй фадыгон инспекторæн йæ куыст гуырахстджын у æмæ  уыимæ хъæугæ дæр уахсджиаг. Йæ куыст лæмæгъ кæцы инспектор фæкæны, уымæн й территорийыл цыбыр рæстæгмæ сарæх вæййынц фæткхалæн цаутæ, криминалон элементтæ фæактивондæр вæййынц æмæ адæмы сабырад æмæ æдасдзинад фехæлы. Иу фадыгон инспекторæн законмæ гæсгæ бар ис æмæ йæ хъус дара 5 мин адæймагмæ. Уыимæ ма ноджы хъуамæ æххæст кæна прокуратурæ æмæ хицауады хæслæвæрдтæ дæр, скъуыддзаг кæна цæрджыты алыгъуызон проблемæтæ, тох кæна фæткхалджыты æмæ фыдгæнджыты ныхмæ. Иумийагæй сисгæйæ милицийы куыстæн аргъ кæнынц фадыгон инспекторты куысты фæстиуджытæм гæсгæ æмæ уый та стыр бæрндзинад у.

ДЖИОТЫ Александр

Comments are closed, but trackbacks and pingbacks are open.