Хъайтартæ æрмæст историйы ахуыргæнæн чингуыты нæ вæййынц — уыдон уыдысты æмæ алыхатт дæр уыдзысты, æмæ абон та цæрынц не ’хсæн. Бæстæйæн уæззау рæстæджыты, сæ цардæн тæссаг уавæрты, хъайтартæ сæ буарæй бамбæрзынц сæ хæстон æмбæлтты нæмгуытæй, æмæ хъахъхъæнынц сабыр цæрджыты, уымæй, патриотизм æрмæст ныхæстæй нæ, фæлæ хъуыддагæй æвдисгæйæ.

Украинæйы сæрмагонд æфсæддон операцийы рæстæджы æфсæддон службæгæнджытæй бирæтæ хорзæхджын æрцыдысты паддзахадон хорзæхтæй. Уыдон нымæцы ис не ’мзæххон Битарты Сослан дæр. Йе ’фсæддон хæс æххæст кæныны рæстæджы равдисгæ æхсардзинады тыххæй УФ-йы президенты барамындæй хорзæхджын æрцыд хъайтардзинады орденæй. Сослан райгуырд 1989 азы. Каст фæцис Мичурины астæуккаг скъола, уый фæстæ йæ ахуыр адарддæр кодта Цæгат Кавказы Хæххон-металлургон институты юридикон факультеты. Æрсидтысты йæм æфсады рæнхъытæм. Службæ кодта Самарæйы. Æфсæддон цард йæ зæрдæмæ кæй фæцыд, уымæ гæсгæ аскуыддзаг кодта контрактмæ гæсгæ службæ кæнын. Службæ кодта Хъырымы, Севастополы. Йæ контаркт фæуыны фæстæ йæ хæдзармæ куы æрцыд, уæд Украинæйы райдыдта сæрмагонд æфсæддон операци. Цасдæр рæстæджы хæдзары фæуыны фæстæ-иу ацыд кæдæмдæр.

«Йæ ацыдæй иу бон раздæр нын загъта, зæгъгæ, ныффыста рапорт горæт Ивановойы Уæлдæфон-десантон æфсæдты службæ кæныны тыххæй. Мæ бон, дам, нæу иуварс лæууын, бæстæйы ахæм цаутæ куы цæуынц, уæд. Кæй зæгъын æй хъæуы, ацы хабар нын уыд тынг æнæнхъæлæджы. Йæ фыд æй нæ уагъта, фæлæ йæ фæнд нал аивта», — зæгъынц йæ бинонтæ.

Херсоны цур тохы фæдыл йæ хорзæхы тыххæй дæр никæмæн дзырдта. Фæлæ йæ куы базыдтой, уæд йæ ныййарджыты зæрдæтæ байдзаг сты сæрыстырдзинады æнкъарæнтæй сæ хъæбатыр лæппуйы сгуыхтдзинæдты тыххæй. Сослан йæхи хъайтарыл нæ нымайы. Фæзæгъы, зæгъгæ, «ницахæм хъайтардзинад сарæзтон, хуымæтæджы æххæст кодтон мæ хæс».

ФРОНТÆН БАЛÆВАР КОДТА ЙÆ МАШИНÆ

Цæгат Ирыстон-Аланийы Дигорайы цæрæг Годзоты Гурам хисæрмагонд автомашинæ УАЗ-452 «Буханка» балæвар кодта сæрмагонд æфсæддон операцийы хайадисæг ирон хæстонтæн. «Ацы микроавтобус хорз æххуыс фæуыдзæн дзæуджыхъæуккаг хъайтарон фистæг æфсады хæстонтæн», — загъта æфсæддон эксперт.

Годзоты Гурам фронтæн æххуыс кæны сæрмагонд æфсæддон операци райдианы бонæй фæстæмæ, йæ тыхтæй арæзт æрцыд тынг бирæ.

РАВДЫСТОЙ СГУЫХТДЗИНАД

Цæгат Ирыстоны цæрæг Хуыгаты Сослан хорзæхджын æрцыд «За доблестную службу»-йы майданæй. Ирон хæстон иу æмæ дыууæ хатты нæ равдыста сгуыхтдзинæдтæ. Хуыгаты Сослан хъахъхъæдта Мариуполы ’рдæм цæуæг колоннæ æмæ равдыста хъæбатырдзинад.

***

Цæгатирыстойнаг хæстон Гояты Димитр хорзæхджын æрцыд «За отвагу»-йы майданæй. Димитр сæрмагонд æфсæддон операцийы ис фыццаг бонæй фæстæмæ. Хорзæх ын радтой сæрмагонд æфсæддон операцийы рæстæджы равдисгæ æхсардзинад æмæ удуæлдайдзинады тыххæй.

***

Цæгат Ирыстоны Октябры хъæуккаг Туаты Хетæг Украинæйы уагъдцæуæг сæрмагонд æфсæддон операцийы хайад исы фыццаг бонтæй фæстæмæ. Равдисгæ хъайтардзинæдты тыххæй хорзæхджын æрцыд Хъайтардзинады орденæй.

Нæ уацх.