Ацы бонты Хуссар Ирыстонмæ кусæгон балцы æрцыдысты Женевæйы дунеон дискусситы æмсæрдæрттæ Евроцæдисæй, ЕÆÆО-йæ æмæ ИНО-йæ. Балцы нысан уыд, дискусситы радон раунды боны фæткы фарстытыл æруынаффæ кæнын. Дунеон дискусситы минæвæрттæ фембæлдысты хуссарирыстойнаг делегацийы уæнгтимæ. Фембæлд уагъта Президенты Паддзахадон уынаффæгæнæг Коцты Константин. Хуссар Ирыстонæй дзы хайад райстой Фæсконфликтон фарстатæ æрбæстон кæныны фæдыл РХИ-йы Президенты Æххæстбарджын минæвары хæдивæг Коцты Егор æмæ Адæймаджы бартæ хъахъхъæныны фæдыл Президенты цур Æххæстбарджын минæвар Тасойты Инал.
Женевæйы дискусситы хуссарирыстойнаг делегацийы ныртæккæйы сæргълæууæг Коцты Константин дискусситы æмсæрдæрттæн æгасцуай зæгъыны фæстæ банысан кодта, зæгъгæ, Гуырдзыстон Хуссар Ирыстон æмæ Абхазы ныхмæ тыхæй кæй нал спайда кæндзæн, уыцы документ бацæттæ кæныныл архайы конструктивон бацæуæнтæ ссарын. Йæ ныхæстæм гæсгæ йæ ныфс ис, ацы ахсджиаг фарстмæ лæмбынæг хъусдард здæхт кæй æрцæудзæн радон раунды рæстæджы. Æмбæрстгонд у уый дæр, æмæ ацы документыл бакусыны куыст дæргъ-вæтин рæстæджы къуылымпы кæны гуырдзиаг фарс, уымæн æмæ æппынæдзух документы тыххæй ивынц сæ позици æмæ хъуыдытæ.
«Дуджы ног фæзындтæ нæ ноджы бæрнджын кæнынц активон куыст кæнынмæ. Æмбæрстгонд у уый, æмæ Фæскавказы кæй сæвзæрд вазыгджын уавæр æрмæст Хуссар Ирыстон æмæ Гуырдзыстонимæ ахасты нæ, фæлæ æндæр фæскавказаг æмæ хуссаркавказаг паддзахадтæм», — банысан кодта Коцты Къоста.
Æдасдзинады эффективон фадæттæ агурын, зæгъгæ, махæй алкæмæндæр ахсджиаг æмæ нысаниуæгджын у.
Коцты Константины ныхæстæм гæсгæ, æдасдзинады сæвзæргæ системæ сфидар кæныны хъуыддаджы женевæйаг дискусситæ сты эффективон æмæ нысаниуæгджын. Радон раунд ауадзынæн ницы цæлхдуртæ ис, йæ хайадисджытæ хъуамæ агурой уавæртæ, цæмæй фембæлды пайда цæуа боны фæткы пункттыл конструктивонæй æруынаффæ кæныныл.
«Уымæн æмæ мах æвдисæн стæм, женевæйаг дискусситæ рæстæгыл уагъд куы нæ фæцæуынц, уæд уыдон негативонæй æндавынц процессы рæзтыл. Æрæмбырд бирæ проблемæтæ, кæцытыл хъæуы æруынаффæ кæнын. Куыд бадзырдон фæзуат афтæ, раздæрау ныр дæр мах нымайæм уый, æмæ женевæйаг дискусситæн нæй альтернативæ Цхинвал, Сухум, Тбилис æмæ Мæскуыйы æхсæн».
Евроцæдисæй æмсæрдар Тойво Клаар дæр ныфс бавæрдта фембæлды фарстытыл продуктивон уынаффæ кæнынæй. Иттæг хорзыл банымадта, æрæджы сын кæй бантыст радон раунд ауадзын Женевæйы.
«Ныфс мæ ис, нæ абоны фембæлд дæр кæй фæахъаз уыдзæн сæвзæргæ фарстытæ биноныг кæнынæн æмæ сæ раразмæ кæнынæн фадæттæ кæй уыдзæн», — банысан кодта уый.
ИНО-йæ æмсæрдар Джихан Султаноглу банысан кодта, кæй араздзысты æппæтдæр, цæмæй женевæйаг процесс здæхт уа фæстиуæгджын куыстмæ. Мах, зæгъгæ, сараздзыстæм æппæтдæр, цæмæй цавæрдæр къахдзæфтæ арæзт æрцæуа æмæ женевæйаг процесс æнтыстджын уа.
Брифинг
Женевæйы дискусситæм бацæттæ кæныны нысанæн фембæлдæн фæстиуджытæ аразгæйæ, Тойво Клаар банысан кодта, зæгъгæ, фембæлды хайадисджытæй алкæмæндæр сæйраг у, тыхæй пайда кæй нал æрцæудзæн, уыцы ахсджиаг фаст. Уæрæсейы фарсæрдыгæй ахсджиаг у, куыд Хуссар Ирыстонæн, афтæ Гуырдзыстоны хицауадæн дæр иузæрдиондзинад бафидар кæнын.
Евроцæдисы æмсæрдар радзырдта Женевæйы дискусситы радон раундмæ бацæттæ кæныны æппæт фарстытыл. Женевæйаг процесс цы ахсджиаг архайдмæ здæхт у, уый у æхсæзпунктон сразыдзинад æххæст кæнын. Уымæн æмæ ахсджиаг у Цхинвалæн ацы сразыдзинад æххæст кæнын. Уый хауы гуманитарон фарстатæм дæр. Банысан ма кодта, женевæйаг процесс кæй у сабырдзинад æмæ стабилондзинад фидар кæныны ахсджиаг фактор.
Хуссарирыстойнаг делегацийы сæргълæууæг Коцты Егоры ныхæстæм гæсгæ, ныртæккæ Женевæйы дискусситæ æндзыг процесс сты. Уыдон рæздзысты, уымæн æмæ боны фæткы ис ахсджиаг фарстатæ, уыцы нымæцы тыхæй пайда кæй нал æрцæудзæн, уыцы документыл бакусын æмæ æбæрæгæй сæфт æмбæстæгты фарст æрбæстон кæнын.
Женевæйы дискусситы æмсæрдæрттæ куыд бадзырдтой, уымæ гæсгæ радон раунд уагъд æрцæудзæн фидæн аз.
Нæ уацх.
Comments are closed, but trackbacks and pingbacks are open.