Алы ахуыры азы кæрон дæр нæ республикæйы ныййарджытæ уæлдайдæр та кусгæ чи кæны, уыдон, фæтыхсын кæны ахæм фарст: сæ ахуырдзау кæстæртæ сæ сæрдыгон улæфт бонтæ кæм æмæ куыд хуыздæр арвитой, уый. Рæзгæ фæлтæрæн дæр, ахуыры процесс фæуыны фæстæ, сæ хъуыдыйы вæййы, куыдхъæлдзæгдæрæй арвитой сæ сæрдыгон улæфты рæстæг. Æппæт ацы фарстатæ хынцгæйæ, нæ республикæйы къухдариуæгад архайы, цæмæй нæ кæстæр фæлтæрæн æрвылаз дæр организацигонд цæуа сæ улæфт.

Нæ республикæйы сæрдыгон лагерты нымæц ацы аз фæфылдæр ис. Нæ горæты Сывæллæтты сфæлдыстадон галуаны бындурыл баконд æрцыд сæрдыгон улæфæн лагерь «Фидæн», кæцы йæ куыст райдыдта ацы къуырийы райдианы. Сæрдыгон лагерь «Фидæн»-ы сывæллæттæ куыд улæфынц æмæ лагеры куысты программæйы цы ис, уыдонимæ нæ базонгæ кодта Сывæллæты сфæлдыстадон  галуаны директоры хæдивæг  кълассæн æддейæ куыстыты фæдыл  Æрсойты Зæринæ. Уый нын куыд загъта, афтæмæй ацы лагерь бакондæуыд галуаны директор Джиоты Арианнæйы хъæппæрисæй нæ республикæйы Ахуырад æмæ зонады министрады æмразыйæ. Æрсойты чызг нын куыд фехъусын кодта, афтæмæй цалдæр азы размæ дæр æрбакодтой  сæрдыгон улæфæн лагерь, фæлæ бæрæг аххосæгтæм гæсгæ, иннæ азты галуаны кусджытæн лагеры куыст фæкъуылымпы ис. Фæлæ ацы аз уыдон фæндон рахастой, цæмæй ногæй сæндидзын кæной сæрдыгон улæфæн лагерь «Фидæн»-ы куыст галуаны бæстыхайы.

«Ацы къуырийы райдианы нæ лагерь райдыта йæ куыст, райстам 10 сывæллоны дыууæ къуырийы æмгъуыдмæ. Нæ лагеры куысты программæ у хъæздыг æмæ цымыдисон. Æрвылбон сын фондз хатты вæййынц ахуыртæ. Зæгъæм, уагъд сын фæцæуы уырыссаг æвзаг, математикæ æмæ англисаг æвзаджы уроктæ. Уыдон уагъд фæцæуынц хъазты хуызы, цæмæй сывæллæттæ ма тыхсой, цымыдисон сын уа, æмæ  активондæр уой ацы урокты рæстæджы, æнæзивæгæй цæуой лагермæ æмæ архайой се ‘рвылбонон улæфты бонты. Нæ лагеры куысты хайад исынц галуаны ахуыргæнджытæн сæ фылдæр хай. Сывæллæттæн сæ хæрды хъуыддаг дæр у хорз, бон сын дыууæ хатты хæрын кæнæм хæрзад хæринаг. Уагъд сын фæцæуынц алыгъуызон спортивон хъæзтытæ дæр. Ис нын æппæт уавæртæ дæр, цæмæй сывæллæтæ сæ сæрдыгон улæфтбонтæ лагеры æрвитой  пайдаджын æмæ активонæй» – загъта нын  Æрсойты Зæринæ.

Ацы аз лагеры райсдзысты дыууæ къорды, сабат æмæ хуыцаубоны улæфт бонтимæ. Дыккаг къорд райдайдзæн йæ куыст 7-æм июны. Хъыгагæн, лагеры организатортæн уыцы фадæттæ нæй, цæмæй æнæаргъæй сорганизаци кæной сæрдыгон лагерь, уымæ гæсгæ лагеры лæггæдтæ сты фидгæйæ. Лагеры уæвынады лæггæдтæ дыууæ къуырийы дæргъы сты авд мин сомы.

Сæрдыгон лагерь «Фидæн» исы фыццаг къласæй æвдæм къласы онг ахуыргæнинæгты. Сывæллæттæ сæ кармæ гæсгæ дих цæудзысты къордтыл – дæсгай адæймæгтыл. Лагерь йæ куыст райдайы райсом фараст сахатæй изæры æхсæз сахатмæ. Æрсойты Зæринæ ма нын куыд фехъусын кодта, афтæмæй сывæллæттæ сæ сæрдыгон улæфтбонтæ лагерь «Фидæн»-ы æрвитдзысты галуаны бæстыхайы. Фæлæ уымæ нæ кæскæйæ, уыдонмæ æнхъæлмæ кæсы алы бон дæр алыхуызон зонынадон æмæ интеллектуалон хъæзтытæ. Лагеры кусджытæ сты квалификациджын кадртæ, уыдон сæ иузæрдион ахастæй, сæ зонын-дзинæдтæ æнæвгъауæй кæй дæттынц сывæллæттæн, афтæ ма сæм хъарм ахаст кæй дарынцуымæй бирæ рæстæджы мысинаг уыдзысты сæ лагеры хъомылгæнинæгтæн.

Сывæллæттæ дæр райгонд сты лагеры сæ улæфтæй.

Танделаты Вилена

Comments are closed, but trackbacks and pingbacks are open.