Æрвылаз дæр уæрæсейаг горæт Сочийы уагъд фæцæуы Аивæдты дунеон фестиваль-конкурс «Черноморский олимп». Хуынд æм æрцæуынц хуссарирыстойнаг аивадон коллективтæ дæр. 2016 азы фестиваль-конкурс уагъд цыд 14-20 июны. Æдæппæт дзы хайад райстой 27 аивадон коллективы.

Ацы аз дзы хайад райста нæ горæты 2-æм астæуккаг скъолайы хореографион ансамбль «Кафт», йæ аивадон къухдариуæггæнæг у Хуссар Ирыстоны сгуыхт артисткæ Четион Майа. Уыдон Сочийы уагъдцæуæг VII фестиваль-конкурс «Черноморский олимп»-ы сæйраг хорзæхимæ Цхинвалмæ æрыздæхтысты 21-æм июны. Æвзонг кафджыты æнтыстытыл цингæнгæйæ, се скъолайы раз цытджын æгъдауæй сæмбæлдысты сæ ахуыргæнджытæ æмæ ныййарджытæ.

23-æм июны та фестиваль-конкурс «Черноморский олимп»-ы фæуæлахизуæвæг ансамбль «Кафт»-ы, йæ къухдариуæггæнæг Четион Майа, 2-æм скъолайы хъомыладон фарстаты фæдыл хайады гæс Ольга Михаилиди, сывæллæтты ныййарджыты æмæ иннæ ахуыргæнджыты йæхимæ райста нæ республикæйы Президент Тыбылты Леонид. Фембæлды хайад райста РХИ-йы Хицауады Сæрдары хæдивæг Пухаты Эрик.

Хореографион ансамбль «Кафт»-æн финансон æххуыс бакодта республикæйы къухдариуæгад.

Нæ республикæйы сæргълæууæг стыр цины æнкъарæнтимæ сæмбæлдис фæуæлахизуæвджытыл, раарфæ сын кодта се стыр æнтысты тыххæй. Лæмбынæг базонгæ ис сæ дард балцы фæстиуджытимæ, куыд райгондæй дзы баззадысты, сæ дард фæндагыл куыд фæхæццæ сты, æппæт уыдæттæм бацымыдис кодта Тыбылты Леонид:

— Мæ чысыл хæлæрттæ, æз уын зæрдæбын арфæ кæнын, ацы бонты уын цы стыр æнтыст уыдис, уый тыххæй. Махæй алкæмæн дæр тынг æхсызгон у, сымахæн уæ аивадон архайдæн фестивалы аккаг аргъ кæй скодтой, уый. Мæн бафæнддзæнис, цæмæй сымах ноджыдæр размæ тырнат, куыд аивады, афтæ ахуыры дæр. Уымæн æмæ хъуамæ сымах фидæны уат æппæтварсон размæдзыд адæймæгтæ æмæ хизат царды бæрзæндтæм, цæмæй уæ республикæйы къухдариуæггæнджытæ, уæ ахуыргæнджытæ æмæ уæ ныййарджытæ уой сæрыстыр.

Æз уын ноджыдæр арфæ кæнын уæ диссаджы æнтысты тыххæй æмæ уын стыр бузныг зæгъын уæ къухдариуæггæнæг Четион Майайæн, ирон культурæйы размæцыдыл уæхскуæзæй кæй кусы, уый тыххæй.

Нæ республикæйы Президент Тыбылты Леонид ма бузныг загъта 2-æм скъолайы иннæ ахуыргæнджытæн Ольга Михаилидийы номæй. Банысан кодта, зæгъгæ, скъолайы куысты кæд проблемæтыл æмбæлынц, уæддæр сæ куыстæн ис хорз фæстиуджытæ.

Сывæллæтты ныййарджытæн дæр Тыбылты Леониды бафæндыд, цæмæй кæддæриддæр сæ сывæллæтты æнтыстытæй рухс кæной сæ зæрдæтæ.

Ансамблы къухдариуæггæнæг Четион Майа бузныг загъта нæ республикæйы къухдариуæгадæн, сæ фарсмæ кæй æрбалæууыдысты, уый тыххæй. Стæй æхсызгонæй банысан кодта, зæгъгæ, фестиваль-конкурс «Черноморский олимп»-ы организатортæ æмæ жюрийы уæнгтæ ирон адæмы тыххæй цы ныхæстæ загътой, уыдон: «Бакæсут-ма ирон адæмы национ уæлæдарæсмæ, куыд аив хуыд æмæ фæлыст сты, диссаг сты сæ музыкæйы зæлтæ æмæ сæ сценаритæ».

Сæрмагондæй дзы загъд æрцыд ахæм хъуыды дæр, зæгъгæ, кавказаг нациты кæфтыты ’хсæн ирон национ кæфтыты раз ницы лæууы, уæлдайдæр та «Симд» æмæ «Хонгæ» кæфтыты раз.

Сымахæн, дам, уæ аивад цыкурайы фæрдыджы хуызæн у. Цалдæр боны дæргъы кодтой Хуссар Ирыстоны хорзы кой. Уымæ гæсгæ нæ кæфтыты бирæ элементтæн скодтой стыр аргъ. Æнæразыдзинады хъуыды дæр дзы загъдгонд æрцыдис, зæгъгæ, алы аз Хуссар Ирыстон хъуамæ хæсса Гран-при. Уæд сын загъд æрцыдис, зæгъгæ, сымах дæр, ирон адæмау, сценæйыл хъуамæ уæлæдарæсæй дæр, кафтæй æмæ музыкæйæ дæр уат бафæзминаг.

Ацы аивадон фестивалы æмрæнхъ ма Сочийы уагъд цыдис кинойы фестиваль дæр. Уый тыххæй дæр нын хæсгонд уыд, цæмæй нæ зæрдæмæ æввахс цы темæ лæууы, ахæмыл чысыл фильмы сценари ныффыссæм. Бирæ фæхъуыды кæныны фæстæ сфæнд кодтам Ирыстоны æрдз æмæ «Симд»-ы тыххæй æрмæг бацæттæ кæнын. Мах спайда кодтам Саулохты Тамарæйы бацæттæгонд чиныгæй, Бестауты Элинæйы текстæй, «Симд»-ы истори æмæ æндæр æрмæджытæй æмæ та кинофестивалы дæр нæ сценари банымадтой иууыл хуыздæрыл«, — стыр цины æнкъарæнтимæ банысан кодта Четион Майа.

Нæ республикæйы Президент Тыбылты Леонид æмæ Хицауады Сæрдары хæдивæг Пухаты Эрикæн бузныджы ныхæстæ загътой Ольга Михаилиди æмæ ахуыргæнинæгтæ сæхæдæг дæр. Фестивалмæ ацыд сорганизаци кæнынæн сын кæй баххуыс кодтой, уый тыххæй сæ фестиваль «Черноморский Олимп»-ы организатортæ схорзæхджын кодтой бузныджы фыстæджытæй. Бузныджы фыстæг ма фестивалæй æрвыст æрцыдис нæ горæты администрацийы сæргълæууæг Æлборты Аланы номыл дæр. Ансамбль «Кафт»-ы коллектив та сæхи номæй бузныджы нысанæн нæ Президент Тыбылты Леонид æмæ Пухаты Эрикæн бакодтой зæрдылдарæн лæвæрттæ. Фембæлды рæстæджы нæ Президент æвзонг кафджытæн æмæ сæ ахуыргæнджытæн балæвар кодта Саулохты Тамарæйы чингуытæ.

Хуссарирыстойнаг æвзонг кафджытæ нæ республикæйæн æддейæ ирон адæмы хуыздæр традицитæ æмæ культурæ бæрзонд æмвæзадыл кæй равдыстой, уый тыххæй сын Тыбылты Леонид ныфс бавæрдта, дарддæр дæр сæхиуыл афтæ куы кусой, уæд нæ республикæйы къухдариуæгад кæддæриддæр сæ фарсмæ кæй лæудзæнис.

Банысан кæнын хъæуы уый, æмæ ивгъуыд аз фестиваль-конкурс «Черноморский Олимп»-ы Гран-при æрхастой сывæллæтты ансамбль «Ирон», йæ аивадон къухдариуæг-гæнæг — Хуыгаты Дианæ.

ТУАТЫ Ларисæ

Comments are closed, but trackbacks and pingbacks are open.