Уыдис ветеранты Цхинвалы горæтон конференци. Конференцийы делегатты раз бакæнгæ куысты тыххæй хыгъд радта горæты ветеранты советы сæрдар Гобозты Æхсар. Уый куыд банысан кодта, афтæмæй совет бæрæг куыст кодта горæты ветерантимæ. Уагътой мадзæлттæ Стыр Фыдыбæстæйон хæсты уæлахизы цытæн. Бæрæг кодтой хæсты идæдзты æмæ ветеранты, афтæ ма æвæрæз æмæ иунæгæй цæрæг ветеранты цардуагон уавæртæ.
Хъыгагæн, рæстæг куыд цæуы, афтæ къаддæрæй къаддæр кæны Стыр Фыдыбæстæйон хæсты хайадисджыты нымæц. Кæд æмæ ма 2016 азы, уыдон уыдысты 33 адæймаджы, уæд ма абон уыдон æрмæстдæр сты 3 адæймаджы. Конференцийы хайадисджытæ иу минут æмырæй алæугæйæ ссардтой, хæстæй чи нал æрыздæхт æмæ абон не ‘хсæн чи нал сты, уыдоны рухс нæмттæ.
Докладгæнæджы раныхæстæм гæсгæ ветеранты совет йæ сæйрагдæр хæстыл нымайы хистæр фæлтæры социалон бартæ æмæ интерестæ хъахъхъæнын, рæзгæ фæлтæры патриотон хъомылады фæдыл кусын, Фыдыбæстæ хъахъхъæнæджы æмæ РХИ-йы хæдбардзинады цытæн мадзæлтты хайад исын, ахуырдзау фæсивæдимæ фембæлдтытæ уадзын, мемориалтæ æмæ цыртдзæвæнты уавæрмæ хъусдарын.
Ныртæккæ ветеранты горæтон советы хыгъды ис 1078 ветераны. Уыдонæй хæсты хайадисджытæ сты 3. Хæсты ветерантæ – 50, куысты ветерантæ 864, хæсты идæдзтæ – 24, афгайнæгтæ – 77, венгрийы цауты хайадисджытæ – 11, мидхъуыддæгты министрады ветератæ 28, æфсæддон службæйы ветерантæ 12, æфсады инвалидтæ 8 æмæ Кубæйы хæсты хайадисджытæ та 2.
Раныхасгæнæг лæмбынæг æрдзырдта, хыгъдон рæстæджы ветеранты горæтон совет цы куыст бакодта, цы алыгъуызон мадзæлттæ ауагъта, уыдоны тыххæй. Фæлæ уыцы куыст ивгъуыд аз бæрæгбæрцæй фæлæмæгъдæр æмæ уый та баст уыдис, æгас дунейыл, уыцы нымæцы нæ республикæйы чи апарахат, уыцы коронавирусы пандеми.
Раныхасгæнæг куыд банысан кодта, аф-тæмæй фæстаг рæстæджы хорз традици ссис, РХИ-йы ветеранты инициативæмæ гæсгæ республикæйы районты цы цыртдзæвæнтæ ис хæсты фæмардуæвджытæн, уыдонмæ цæуын, уым бынæттон скъолаты ахуырдзаутимæ æмбæлын.
Цæвиттон, ахæм коллективон балц организаци æрцыд Дзауы районы Теделеты хъæумæ, цыран дидинджытæ сæвæрдтой 18 хæстоны цыртыл. Уым фембæлдысты хъæуы скъолайы ахуыргæнинæгтимæ дæр. Ахæм мадзæлттæ ауагъд æрцыдис Ленингоры районы дæр, Цхинвалы районы Прис, Дменис, Сатихъар æмæ Къостайыхъæуы. Знауыры поселочы та удæгас дидинджытæ сæвæрдтой Советон Цæдисы хъайтар Цхуырбаты Иваны цырты раз. Ардæм æрбацыдысты поселочы скъолайы ахуыргæнинæгтæ дæр æмæ кастысты æмдзæвгæтæ æфсæддон темæйыл.
Ветеранты совет кæддæриддæр активон хайад исы Зары æмæ Ереды трагедийы, 2008 азы августы хæсты сæраппонд траурон мадзæлтты.
Гобозты Æхсар банысан кодта, горæты ветеранты организацийы архайдмæ æмбæлон хъусдард кæй здахынц нæ республикæйы Президент æмæ Хицауад. Цæвиттон, хæрзарæзт æрцыдысты, сæ хæдзæрттæ цалцæггæнинаг кæмæн уыдысты, уыдонæй бирæтæн. Хæсты хайадисæг Гæззаты Петрыл 100 азы куы сæххæст, уæд ын раарфæ кодта Президент Бибылты Анатоли, балæвар ын кодта зынаргъ лæвæрттæ, афтæ ма йын радта 100 мин сомы æхца дæр. Йæ бацамындмæ гæсгæ йын йæ дыууæуæладзыгон хæдзарæн раивтой йæ рудзгуытæ æмæ дуæрттæ.
Æрвылаз дæр 9 майы парады рæстæджы ветеранты фæхонынц трибунæмæ. Æнæхъусдардæй нæ зайынц æвæрæз æмæ рынчын ветерантæ дæр. Цхинвалы дзулфыцæн комбинатæй 20 адæймагæй фылдæр дзул исынц лæварæй. Ног азы размæ раарфæ кодтой хæсты хайадиисджытæн, иунæг æмæ рынчын ветерантæн. Бакодтой сын лæвæрттæ æмæ сын радтой фæйнæ 10 мин сомы. Ветеранты совет æнæниздзинад хъахъхъæнынады министрады руаджы, ветерантæн балцæгтæ дæтты Уæрæсейы курорттæм, бынæттон хосгæнæндон «Ныфс»-мæ. Цæвиттон, 2018 азы Цæгат Ирыстоны хосгæнæндæттæ Тæмиск æмæ Сосновая роща»-мæ, афтæ ма бынæттон хосгæнæндон «Ныфс»-мæ æрвыст æрцыдысты 38 адæймаджы. Уал адæймаджы та 2019 азы. Фæлæ, хъыгагæн, 2020 азы, ахæм фадат нал уыдис карантины аххосæй.
Хъусдард здæхт цæуы, ветерантæн сæ рæстæг культурон æгъдауæй куыд æрвитынц, уымæ. Уыдон арæх фæхонынц концерттæ æмæ æндæр культурон мадзæлттæм.
Гобозы фырт раппæлыд Ветеранты советы хицæн уæнгтæй сæ активон архайды тыххæй. Ахæмтæ сты Уалыты Лидæ, Бестауты Азæ, Бабаты Изольдæ, Кокойты Ася, Габиты Ульянæ, Гасситы Валери æмæ æндæртæ.
Раныхасгæнæг ракой кодта се ‘хсæн чи фæзындысты æмæ хъæстытæ уæлдæрлæууæг органтæм чи фыссынц ахæмты тыххæй. Сæ хъæстыты сæр у, зæгъгæ, ветерантæн æххуысæн цы фæрæзтæ цæуынц, уыдон советы кусджытæ дих кæнынц сæхиуыл. Советы куыст бæрæг кодтой æндæр æмæ æндæр контролгæнæг организацитæ, фæлæ йæ архайды ницы цухдзинæдтæ рабæрæг. Уыцы хъастгæнæг ветерантæ æрсидтысты æнæрадон конференци дæр, советы архайæг уæнгты ницæмæ æрдаргæйæ. Æгæрыстæмæй бацахстой организацийы кусджыты кабинет дæр.
Раныхасгæнæг куыд банысан кодта, афтæмæй горæты ветеранты организаци æнæхъæн азæн саразы организацион комплексон мадзæлтты план, фæлæ басастис, æппæт разылæууæг фарстатæ иууыл скъуыддзаг кæй не ‘рцæуынц, сæ фадæттæ сæ кæй нæ амонынц, уымæ гæсгæ. Хицæн ветерантæ фæдомынц, цæмæй сын сæ хæдзары æмбæрзтытæ раивой. Домынц льготæтæ, газ, электроэнерги æмæ хосты тыххæй æххуыстæ.
Йæ ныхæстæм гæсгæ, ахæм льготæтæ ис Стыр Фыдыбæстæйон хæсты æмæ хæстон архайдтыты хайадисджыты æмæ ветерантæн, фæлæ иннæ категоритæн, хъыгагæн, нæй ахæм льготæтæ. Фæлæ куыд фехъусын кодта, афтæмæй ацы фарстатæ æвæрд цæуынц бæрнон адæймæгты раз æмæ гæнæнуæвгæйæ скъуыддзаг æрцæудзысты. Гобозы фырт ма советы куысты цухдзинадыл банымадта, Ветеранты советы райдиан организацитæ æххæст хъомысæй кæй нæ кусынц, уый дæр æмæ сын сæ архайд кæй хъæуы сытынг кæнын.
Цхинвалы горæтон советы хыгъдон æвзæрстытты конференцийы æвзæрст æрцыд советы ног сконд. Советы сæрдарæй æвзæрст æрцыд Джиоты Руслан, йæ хæдивæгæй – Козаты Павел æмæ нымæрдарæй та æфсæддон службæйы ветеран Дыгъуызты Димитр.
Конференцийы ма æвзæрст æрцыдысты республикон ветеранон конференцимæ делегаттæ дæр.
БЕСТАУТЫ Валя
Comments are closed, but trackbacks and pingbacks are open.