«Сабитæ нæ фидæн æмæ сомбон сты. Уыдонмæ хистæрты ‘рдыгæй цас фылдæр хъусдард здæхт цæуа, уыйбæрц сæ сомбон хуыздæр æмæ бæллиццагдæр уыдзæнис. Стыр бузныг уын Сатихъары хистæртæ, кæстæртæ æмæ мадæлты номæй, нæ сабиты раст фæндагыл слæууын кæнын æмæ фидæныл кæй аудут, уый тыххæй», – дзырдта Сатихъары хъæуы цæрæг Чертхъоты Лианæ, 3-æм ноябры паддзахады сæргълæууæг Тыбылты Леонид Сатихъары хъæумæ куы фæуазæг ногарæзт спортивон фæзуат æмæ тренажерон зал официалонæй бакæнынмæ, уæд.
Сатихъары хъæуы адæм стыр бузныджы æнкъарæнтимæ æмбæлдысты Президентыл. Бæрæгбонон хъæлæба æмæ музыкæйы зæлтæ дардмæ хъуыстысты, афтæмæй æнæрхъæцæй æнхъæлмæ кастысты сæ уазæгмæ. Цалдæр мæйы размæ Сатихъары фæсивæд сæхимæ æрбахуыдтой бынæттон телеуынынады журналист Цæбиты Валяйы, кæцы йæ алæвæрдты фæдзуры хъæуты проблемæтыл. Уымæй размæ та хъæуы фæсивæды номæй ацы хъæуы цæрæг, раздæры колхозы сæрдар Уалыты Отар Президенты номыл ныффыста фыстæг, цыран дзырд цыд, Сатихъары фæсивæд бирæ азты цы проблемæйыл тыхстысты, ууыл, ома, сын уыд футболон фæзуат, цыран хъазыдысты хъæуы фæсивæд. Арæх-иу сæм уагъд цыд районы масштабыл ерыстæ дæр. Уавæр æндыгъд куы уыд, уæд стадион цы территорийыл уыд, уым хъуамæ сарæзтаиккой арæнхъахъхъæнджыты заставæ. Траншейтæ дæр скъахтой, фæлæ йын фæстæдæр æвзæрст æрцыд æндæр бынат. Уæдæй нырмæ Сатихъары фæсивæд районы къухдариуæгадмæ хатыдысты, цæмæй сын сæ стадионы фæзуат алæгъз кодтаиккой, раздæры уагмæ йæ æркодтаиккой. Фæсивæдæн лæвæрд цыд æндæр бынат, кæцы ис Цхинвал-Ленингоры сосæфæндаджы дæллаг фарс. О, фæлæ фæсивæд нæ разы кодтой, трассæйы дæллаг фарсмæ ахизынæн æдас кæй нæ уыдзæн, уый æфсонæн.
Куыддæр Уалыты Отары фыстæг Прези-дентмæ бахæццæ, стæй бынæттон телеуынынадæй Цæбиты Валяйы алæвæрд федта, цыран фæсивæд хъаст кодтой сæ сæрибар рæстæг кæм арвитой, уыцы уавæртæ сын кæй нæй, уымæй, афтæ паддзахады сæргълæууæг йæ уынаффæгæнæг Цоциты Барисы арвыста бынатмæ. Президенты уынаффæгæнæг лæмбынæг байхъуыста дыууæ быцæугæнæг фарсмæ, сарæзта хатдзæгтæ æмæ растыл банымадта фæсивæды хъуыды.
Цалдæр боны фæстæ раздæры стадионы бынатмæ æрвыст æрцыд техникæ æмæ æрæвнæлдтой ног спортивон фæзуат аразынмæ. Æмæ мæнæ ныр ацы рæсугъд спортивон фæзуатыл цин кæнынц, ам фæстæмæ стадион саразыны фарс чи хæцыд, æрмæст уыдон нæ, фæлæ ма йæ ныхмæ чи уыдысты, уыдон дæр. Ногарæзт стадионы æрмæст футболон фæзуат нæй, фæлæ ма волейбол æмæ баскетболон фæзуат дæр. Стадион арæзт æрцыд сæрмагонд технологитæм гæсгæ, йæ алыварс у æмбонд, æхсæвыгон та дзы судзынц рухсытæ. Йæ алыварс ис лидзæн фæндаг. Ныр ацы стадионæй сæрыстыр сты хъæуы цæрджытæ се ‘ппæт дæр. Уымæй уæлдай ма хъæуы администрацийы агъуысты хицæн æрцыд хатæн, уым та уыдзæн тренажерон зал. Уый дæр ифтонг æрцыд тренажертæй. О, фæлæ бынтон æхсызгон та уый у æмæ ацы куыстытæ Цхинвалы районы коммуналон хæдзарадимæ иумæ хъæуы фæсивæд кæй кодтой.
Стадионмæ бахизæны, традицимæ гæсгæ сырх лентæ алыг кæныны фæстæ Тыбылты Леонид йе ’ргом аздæхта Сатихъары хъæуы фæсивæд-мæ: «Паддзахады структурæтæ æмæ бинонтæ æмгуыст куы кæной, уæд тас нæу фæсивæдæн. Æнахъомтæ æмæ æрыгæтты ‘хсæн хъомыладон куыст кæнын хъæуы, фæсивæдæн аразын хъæуы уавæртæ, цæмæй сæ сæрибар рæстæг кæм æрвитой, уыцы бынæттæ сын уа. Фæсивæды ‘ргом здæхт куы уа физкультурæмæ æмæ спортмæ, уды сыгъдæгдзинад, хæрзæгъдаудзинадмæ, уæд уыдон никуы слæудзысты æвзæр фæндагыл. Паддзахадæн ис концепци «Спорт в шаговой доступности». Уыцы программæмæ гæсгæ горæты цалдæр ран спортивон æмæ тренажерон залтæ арæзт æрцыд. Районтæй ацы программæ сымахæй райдыдтам. Мæнæн æхсызгон у ацы куыстытæ хъæуы фæсивæд сæхæдæг кæй кодтой. Стыр бузныг уын зæгъын уый тыххæй», – дзырдта райзæрдæйæ Президент.
Президент ма йе ‘мбæлццæттæ æмæ Цхинвалы районы къухдариуæгадимæ бабæрæг кодтой, хъæуы администрацийы бæстыхайы цы тренажерон зал арæзт æрцыд, уый дæр. Ам Президент æрбаййæфта фæсивæды иу хайы тренировкæгæнгæйæ. Уый йын æхсызгон уыд æмæ сын ныфс бавæрдта лæварæн сын кæй балхæндзæн телевизор спутникон антеннæимæ.
Президент ма фембæлд хъæуы цæрджытимæ дæр. Уыдонæй Тыбылты Леонидæн чи арфæ кодта йæ архайды тыххæй, чи та дзы домдта, цæмæй сын сæ иннæ проблемæтæм дæр æркæса. Цæрджыты домæнтæ фылдæр баст уыдысты цæрæнуатон фарстытимæ. Хъæуы цæрджытæ тыхсынц доны хъуагдзинадæй, стæй ма домдтой, цæмæй сын хъæумæ ссæуæн фæндаджы уавæр, гæнæн уæвгæйæ, фæхуыздæрчындæуа.
Президентæн бузныг зæгъынмæ æрбацыдысты Гуры районы Зардиаты хъæуы цæрджытæ дæр. Бæрæг куыд у, афтæмæй ацы хъæу ахауд Гуырдзыстонмæ. Уым арæнæн дæлейæ баззадысты цалдæр ирон бинонтæ. Сæ сывæллæттæ, хиуæттæ æмæ хæстæджытæм цæуыны уавæртæ сын кæй нæй сæрибарæй, уымæ гæсгæ æвзарынц зындзинæдтæ. Уыдон æрæджы бахатыдысты Президентмæ, цæмæй сын къуыри дыууæ хатты арæныл хизынæн цы бар уыд, уыцы режим фæхуымæтæгдæр уа. Президенты амындмæ гæсгæ ацы фарстыл куыстой Уæрæсейы арæнгæрон управлени. Ныр не ‘мбæстæгтæн бар уыдзæн къуыри фондз хатты арæныл ахизынæн.
Тыбылты Леонид ма Цхинвалы районмæ йæ балцы рæстæджы ацы хъæуы цæрджытæй дыууæйæн радта сæ ногарæзт хæдзæртты дæгъæлтæ. Уыдон сты Мæлдзыгаты Сане, кæцыйæн йæ сæрыхицау фæмард 1992 азы гуырдзиаг фашистты къухæй. Иннæ амондджын бинонтæ та сты Тъехты бинонтæ. Уыдон та сты Дисеуы хъæуæй лигъдæттæ. Тъехты Тамарæйæн йæхи фæн-донмæ гæсгæ ног хæдзар арæзт æрцыд ТЭК-ы районы. Дыууæ бинонтæн дæр Президент ныфс бавæрдта, сæ ног хæдзæрттæм сын лæварæн телевизортæ кæй балхæндзæн, уымæй.
Уæ зæрдыл уын лæууын кæнæм, ахæм хæдзæрттæ ацы аз республикæйы аст кæй æрцыд арæзт. Хæдзæрттæ сты цыппархатæнонтæ æмæ арæзт æрцыдысты республикæйы сæрмагонд фæрæзтæй. Куыд зонæм, афтæмæй ацы сæрмагонд программæ кусдзæн ног азы дæр.
Уазæгты Марфа
Comments are closed, but trackbacks and pingbacks are open.