Уæрæсейы Президент Владимир Путин йæ къух æрфыста Барамындыл, горæт Цхинвалæй рацæугæ Санахъоты Сергей Левы фыртæн таможнæйон службæйы инæлар-майоры специалон ном радтыны тыххæй. Уый ссис таможнæйон службæйы фыццаг уæрæсейаг инæлар, кæцы райгуырд Хуссар Ирыстоны. Райгуырд горæт Цхинвалы 1970 азы 10-æм июны. Каст фæцис Цæгат Ирыстоны паддзахадон университет экономист-организаторы дæсныйады фæдыл. 2001 азы та каст фæцис Уæрæсейы таможнæйон академи. У юридикон зонæдты кандидат. Ивгъуыд аз Уæрæсейы Федерацийы Федералон таможнæйон службæйы бардзырдмæ гæсгæ 2021 азы 27-æм сентябрæй нысан æрцыд Уæрæсейы Федерацийы егъаудæр таможнæтæй иу – Брянскы таможнæйы хистæрæй, кæцы æмарæн кæны Украинæ æмæ республикæ Беларусимæ.
Уæд Централон таможнæйон управленийы хистæр, таможнæйон службæйы инæлар-лейтенант Сергей Рыбкин стыр аргъ скодта Санахъоты Сергейы профессионалон миниуджытæн, бафæндыд æй уымæн дарддæры æнтыстытæ йæ ног бынаты. Санахъойы фырт Таможнæйон органты кусы 1994 азæй фæстæмæ. Цæгат Ирыстоны таможнæйы дæлхæйтты куыста алыгъуызон бынæтты, уыд Дæллаг Зæрæмæджы æмæ Уæллаг Ларсы уадзæн пунктты информацион-техникон службæйы къухдариуæггæнæг. 2009 азæй 2012 азмæ лæууыд Цæгат Ирыстоны таможнæйы сæргъ. 2012 азы майы мæйæ 2021 азы сентябры онг та уыд Красноярскы таможнæйы сæргълæууæг.
Хорзæхджын у майдантæ «За усердие», «За укрепление таможенного сотрудничества», «За службу в таможенных органах»-ы 1,2 æмæ 3-æм къæпхæнты майдантæй æмæ «За заслуги перед отечеством»-ы 2-аг къæпхæны ордены майданæй.
Ис ын цардæмбал, хъомыл кæнынц æртæ сывæллоны.
Арфæ кæнæм не ‘мзæххонæн, йæ архайдæн ын ахæм стыр аргъ кæй скодтой, уый тыххæй.
Comments are closed, but trackbacks and pingbacks are open.