Уæрæсейы Федерацийæ Хуссар Ирыстон æрмæст финансон æххуыс нæ исы, фæлæ ма нæм арæх æрцæуынц æндæр æмæ æндæр фадгуыты специалисттæ, кæцытæ сæ фæтлæрддзинадимæ зонгæ кæнынц не специалистты, кæнынц сын конкретон æххуыс сæ разылæууæг проблемæтæ скъуыддзаг кæнынæн. Уый уæл-дай тынгдæр æндавы медицинон къабазыл æмæ æмбæрстгонд дæр у – арæзт нæм æрцыдысты æмæ цæуынц æндæр æмæ æндæр медицинон объекттæ, ифтонг цæуынц нырыккон медицинон ифтонггæрзтæй æмæ, кæй зæгъын æй хъæуы, хъуамæ сæ кусой бæрзондквалификациджын специалисттæ. Уый хауы æрмæст банысангонд медицинон уагдæттæм нæ, фæлæ чи архайынц, уыцы медицинон уагдæттæм дæр.

Ацы бонты нæ республикæмæ кусæгон балцы æрцыдысты Санкт-Петербурджы Паддзахадон медицион университетæй. Кусæгон къорды сконды уыдысты медицинон зонæдты доктор, тагъд медицинон æххуысы кафедрæйы сæргълæууæг Ильдар Минниуллин, постдипломон ахуырады деканы æххуысгæнæг Ростислав Ротарь æмæ информацион-техникон управленийы хисæтр Евгений  Крабенков.

Райдианы уал бацыдысты нæ горæты   Тагъд  æххуысы станцмæ æмæ базонгæ сты йæ кусджыты куысты уавæртимæ, медицинон ифтонггæрзтæй куыд ифтонг сты, уыимæ.  Семæ ма уыдысты РХИ-йы Æнæниздзинад хъахъхъæныны министр Григори Кулиджанов, йæ хæдивæг Плиты Агуындæ, РХИ-йы æнæниздзинад хъахъхъæныны фæдыл Уæрæсейы Федерацийы администрацийы уынаффæгæнæг, профессор Игорь Галл.  Се ‘рцыды фыццаг этап у кадртæ бацæттæ кæныны хъуыддаг. Уыдон куыд загътой, афтæмæй Тагъд æххуысы станцы кусджытæн уагъд цæу-дзысты ахуыртæ, стæй канд Тагъд æххуысы станцы кусджытæн нæ, фæлæ æн-дæр дохтыртæн дæр. Миниуллин куыд загъта, афтæмæй Тагъд æххуыс бакæнынмæ хъуамæ арæхсой канд Тагъд æххуыс станцы дохтыртæ нæ, фæлæ алы дохтыр дæр.

Уый фæстæ Санкт-Петербургаг уазджытæ бацыдысты сывæллæтты ног арæзт рынчындонмæ æмæ дзы азылдысты. Райдианы РХИ-йы Президенты Паддзахадон уынаффæгæнæг Сиукъаты Радион радзырдта, республикæйы разамынад цахæм хъусдард здахы æнæниздзинад хъахъхъæныны фарстытæм æмæ куыд скъуыддзаг цæуынц, уыдæттыл. Ацы къабазы цы ахсджиагдæр фарстытæ лæууы, уыдонæй, йæ ныхæстæм гæсгæ, сæ иу у медицинон кусджыты – куыд дохтырты, афтæ медицинон хоты квалификаци фæбæрзонддæр кæнын. Куыд загъта, афтæмæй азы кæронмæ уыдонæн сæ фылдæр хай сæ квалификаци фæбæрзонддæр кæндзысты.

Пресс-конференцийы, фыццаг тагъд æххуыс куыд бакæнын хъæуы, уыцы фарстыты фæдыл æрдзырдта Ильдар Миниуллин. Конференцийы ма дзырд цыд бынæттон кадртæ бацæтæ кæныныл дæр.

Уыцы бон ма уазджыты йæхимæ райста РХИ-йы Президенты Администрацийы къухдариуæггæнæг Тъехты Алан. Райдианы сын уый РХИ-йы Президент æмæ йæхи номæй раарфæ кодта æмæ сын бузныг загъта се ‘рцыды тыххæй. Уый фæстæ æрдзырдта, æндидзынады хъуыддаджы республикæйæн йæ къухы цы æнтыстытæ бафтыд, уыдоныл. Уыцы иурæстæджы администрацийы сæргълæууæг куыд загъта, афтæмæй разæй ис ноджы стырдæр хæстæ, ис проблемæтæ, кæцытимæ хорз зонгæ у республикæйы разамынад æмæ дард-дæр дæр архайдзæн се скъуыддзаг кæныныл. Банысан кодта, республикæйæн ныртæккæ кæй у бæрнон рæстæг –  уый йæхи цæттæ кæны президентон æвзæрстытæм. Медицинæйы къабазыл дзургæйæ, загъта, зæгъгæ, фæстаг рæстæджы бирæ саразын бантыст ацы фадыджы. Арæнгæрон хъæуты баконд æрцыдысты 16 фельдшерон-акушерон пункты, горæт Къуайсайы арæзт æрцыд рынчындон, ног рынчындон ма арæзт æрцыд Дзауы районы, цалдæр медицинон объекты та рæзынц кæнæ сырæзтысты Цхинвалы. Республикæйы æнæниздзинад хъахъхъæныны рæзтæн стыр ахъаз фæцис, РХИ-йы Президент Тыбылты Леонид йæ къух кæуыл æрфыста, медицинæйы рæзты уыцы концепци. Тъехты Аланы ныхæстæм гæсгæ махæн ахсджиаг у, цæмæй алы цæрæг дæр рæстæгыл иса гъæдджын медицинон æххуыс, бæрзонддæр кæнæм медицинон кусджыты квалификаци. Загъта ахæм ныфс, зæгъгæ, уæрæсейаг специалистты æрцыд æмæ нæ иумæйаг куыст дарддæр дæр хорз фæстиуджытæ кæй ратдзæн. Мах, зæгъгæ, хос кæ-нынмæ нæ уæззау рынчынты республикæйæ æддæмæ мауал хъуамæ æрвитæм.

Миниуллин дæр йæ рады бузныг загъта, Тъехты Аланæн, кæй сæ æрхуыдтой æмæ сæ хъармзæрдæйæ кæй райстой, уый тыххæй æмæ банысан кодта, зæгъгæ, дохтыр уæвгæйæ, уымæн йæ зæрдæмæ æввахс лæууынц медицинæйы къабазы, сæрмагондæй Тагъд æххуысы станцы цы проблемæтæ ис, уыдон æмæ кæй æххуыс кæндзысты сæ хуссарирыстойнаг коллегæтæн сæ аиуварс кæныны хъуыддаджы. Сæрмагондæй банысан кодта, тагъд æххуысы кадрты æнæмæнгхъæуындзинад. Тагъд æххуысы фæдыл сæм сæрмагонд цæттæдзинад кæй нæй, уымæ гæсгæ ныфс бавæрдта, сæ коллектив кæй архайдзысты, цæмæй сын баххуыс кæной ацы хъуыддаджы æмæ сæ куыст æрбаввахс уа уæрæсейаг стандарттæм. Ацы фарст вазыгджын у, фæлæ куыд загъта, афтæмæй бацархайдзысты, цæмæй йыл бакусой æмæ скъуыддзаг æрцæуа. Уымæй дарддæр ма банысан кодта, лекцитæ уагъд кæй цæудзысты куыд ардæм, бынатмæ æрцæугæйæ, афтæ дистанцион æгъдауæй дæр, зæгъгæ, махмæ кусынц Хуссар Ирыстонæй рацæугæ специалисттæ æмæ гæнæн ис лекцитæ бакæсой сæ мадæлон æвзагыл дæр. Æнæмæнг хъуыддагыл банымадта Тагъд æххуысы медицинон кусджыты æнæмæнгхъæуæг медицинон литературæйæ ифтонг кæнын æмæ банысан кодта, уыцы фадæттæ кæй ис æмæ кæй кусдзысты ацы фарстыл дæр.

Миниуллин ма загъта ахæм фæндон, цæмæй нæ рауагъдонтæй ахуыр кæнынмæ райсой сæ уæлдæр ахуыргæнæндонмæ, фæлæ бафæдзæхста, ахæм студенттæм кæй уыдзæнис стыр домындзинад, цæмæй райсой æмбæлон зонындзинæдтæ. Уый ма фехъусын кодта, 13 марты ардæм кæй æрцæудзæнис сæ университеты ректор Уæрæсейы Зонæдты Академийы академик Сергей Багненко.

Бестауты Валя

Comments are closed, but trackbacks and pingbacks are open.