Ныры дуджы алы адæймагæн дæр йæ цард райдайы гуырæн хæдзарæй. Уымæ гæсгæ ахсджиаг у, цахæм дохтыр балæудзæн арæг сылгоймаджы фарсмæ.

Бирæ азты нæ горæты Гуырæн хæдзары дохтыр, ныртæккæ та гуырæн хæдзары сæйраг дохтыры хæстæ æххæстгæнæг Плиты Мельсы ном рагæй хъуыстгонд у. Гуырæн хæдзармæ уæззау уавæры чи бахауы, уыдон, сæйраджыдæр, ныфс февæрынц ацы курдиатджын дохтырæй.

Цхинвалы гуырæн хæдзар арæзт æрцыд 1955 азы. Уæдæй нырмæ ивы рæстæг, домæнтæ медицинæйы къабазы. Егъау цæуы Уæрæсейы Федерацийæ рæстæгæй-рæстæгмæ æнæниздзинад хъахъхъæныны æмæ социалон рæзты министрад æрхоны специалисттæ, кæцытæ консультацитæ ауадзынц сæ хуссарирыстойнаг коллегæтæн. Плиты Мельс куыд зæгъы, афтæмæй гуырæн хæдзары коллективы ныфс ис, ныртæккæ сæ куысты цы зындзинæдтыл æмбæлынц, уыдон фæстейæ кæй баззайдзысты æмæ уавæр кæй фæивдзæн хуыздæрæрдæм, куыддæр ног Гуырæн хæдзар сæрæза, афтæ.

«Арæзт уал æрцыд сывæллæтты рынчындон, æрхуыдтой йæм уæрæсейаг специалистты, хатæнтæ æвæрд æрцыдысты нырыккон сæрмагонд ифтонггæрзтæй. Дунейы æдæрсгæйæ цы амæлттæй пайда кæнынц, уыдонæй цыдæртæ фæзындис мах Гуырæн хæдзары дæр. Нырмæ нæм арæзт нæ цыд регионалон анестези. Ныр уый аразын райдыдтой уæрæсейаг специалистты æххуысæй нæхи дохтыртæ дæр.

Регионалон анестезийы рæстæджы операци кæнын кæй бахъæуы, уыцы сылгоймагæн судзин арæзт æрцæуы астæумагъзы æмæ сывæллонæн нæ расайы медикоментозон депресси», – дзуры гуырæн хæдзары рæстæгмæ хæстæ æххæстгæнæг сæйраг дохтыры хæстæ рæстæгмæ æххæстгæнæг.

Уый ма нын куыд радзырдта, афтæмæй куыст цæуы, цæмæй гуырæн хæдзары уавæр фæива хуыздæрæрдæм. Уымæй та стыр ныфс æвæры Æнæниздзинад хъахъхъæнынады министрады разамынадæй.

«Проблемæтæ се ‘ппæт дæр скъуыддзаг цæудзысты, ног гуырæн хæдзар куы скуса, уæд. Уымæн æмæ ам уыдзæн æдзухон анестезиологон-реанимацион службæ. Гуырæн хæдзар цы ногдзинæдтæм æнхъæлмæ кæсы, уыдонæй иу та у тугуадзæн хайад бакæнын. Ныр та уал рынчынтæй искæйы туг уадзын куы бахъæуы, уæд хæстæджытæ бахатынц хицæн уагдæттæм æмæ тыхон структурæтæм дæр. Афтæмæй иуæй фæстиат кæнынц, аннæмæй та æрмæг бæстон сахуыр кæнынæн рæстæг нал вæййы», – загъта Плиты Мельс.

Ног гуырæн хæдзары æрбакондимæ фæзындзæнис гемотологон службæ дæр, кæцы нырмæ нæ уыд. «Гуырæн хæдзарæн кусæн нæй æнæ туджы компоненттæй. Статистикæмæ гæсгæ мæлыны цаутæ арæхдæр вæййынц, туг кæй фесафынц, уый аххосæй. Мах сисæм туг донорæй æмæ йæ уайтагъд дæттæм тыхст сылгоймагæн. Уый раст нæу медицинон цæстæнгасæй», – зæгъы Плиты Мельс.

Ног медицинон кластер  æххæстæй куы скуса, уæд ма æвæрццаг фæзындмæ æнхъæлмæ кæсæн ис æдзухон анестезиологон службæмæ æмæ  туаггуырæй централизацигонд ифтонгады фарста скъуыддзаг кæнынмæ дæр.

Ныртæккæ гуырæн хæдзары цы лаборатори ис, уым сæ бон нæу кæцыдæр иртасæнтæ саразын. Зæгъæм, цæмæй развæлгъау бæрæг æрцæуа Дауны синдром цы сывæл-лæттæн ис,  уый тыххæй ба-хъæуы сылгоймаджы Уæрæсейы искæцы лабораторийæ иртасæнтæ æрхæссын. Нæй ныртæккæ Гуырæн хæдзары дохтыр-генетик дæр. Тыхсынц анестезиолог æмæ неотонологы цухдзинадæй дæр.

Фæлæ гуырæн хæдзары ныртæккæ цы коллектив кусы, уыдон æппæт амæлттæ æмæ тыхтæй дæр фæархайынц, рынчын сæм куы æрбахауы, уæд ын баххуыс кæнынмæ. Æнæрхъæцæй æнхъæлмæ кæсынц, ног Гуырæн хæдзармæ. Йæ арæзтад хаст æрцыд ацы азы Инвестпрограммæмæ.

Уазæгты Марфа

Comments are closed, but trackbacks and pingbacks are open.