Ирон адæмы равзæрды истори, се ‘взаджы истори, йæ фыссынады фæзынды историмæ сæ хъус тынг раджы æрдардтой куыд уырыссаг ахуыргæндтæ, афтæ фæсарæйнаг ахуыргæндтæ дæр. Уымæ гæсгæ ирон æвзаджы историйы лингвистикон ахуырад бæлвырд кæны цыппар периоды:

Фыццаг период – ирон æвзаджы зонадон æгъдауæй ахуыр кæныны период. Ацы период баст у фæсарæйнаг ахуыргæндтæ Витсен, Клапрот, Гюльденштедт æмæ æндæрты нæмттимæ. Дыккаг период – ирон æвзаг зонадон æгъдауæй ахуыр кæныны период. Ацы период та баст у стыр уырыссаг ахуыргонд Андрей Шегрены номимæ. Æртыккаг период баст у зынгæ уырыссаг ахуыргонд академик Всеволод Миллеры номимæ. Цыппæрæм период хауы советон дугмæ. Ацы период, сæйраджыдæр, баст у ирон æвзаджы корифей, зынгæ иранист, этимолог, фольклорист, ирзонæг академик Абайты Васойы номимæ.

Ацы цыппар периоды ирон æвзаг æмæ йæ истори чи иртæста, уыдонмæ ирон æвзаджы равзæрд, йæ рæзт æмæ ахуыр кæныны историмæ иухуызон цæстæнгас нæ уыдис. Сæйрагдæр фарстыты иртасыны хъуыддаджы уыдонæй алкæмæ дæр уыд йæхи цæстæнгас æмæ хъуыды, уæлдайдæр та  –  ирон æвзаджы диалекттæ æмæ ныхасыздæхтыты фарст иртасыны хъуыддаджы.

Фыццаг æмæ дыккаг периодты ирон æвзаджы истори иртасджытæ ирон æвзаджы бæлвырд кодтой æртæ диалекты: ныгуылæн ирон диалект, скæсæн ирон диалект кæнæ та ирон диалект, хуссарварс цæрæг, ирон адæмы диалект кæнæ та туаллаг диалект. Ацы хъуыдыйы фарсхæцджытæ Хуссар Иры цæрæг ирон адæмы æвзаг нымадтой хицæн диалектыл.

Ирон æвзаджы диалектты тыххæй Всеволод Миллермæ уыдис  чысыл æндæрхуызон хъуыды. Уый туайлаг диалект кæй хуыдта, уый тыххæй афтæ фыста: «Впрочем между иронским и дигорским диалектом отличие значительно больше, нежели между туальс-ким и иронским и нам кажется правильнее называть туальское подречием иронского».

«Миллер Хуссар Иры цæрæг ирон адæмы æвзаг хицæн диалектыл кæй нæ нымайы, уымæй раст у», – зæгъы зынгæ ахуыргонд лингвист ак. Г. С. Ахвледиани. Фæлæ разы нæу, Миллер Хуссар Иры ныхасыздæхт æмæ туайлаг ныхасыздæхтыты æмхуызон кæй хоны, ууыл. Уымæн æмæ ма туайлаг ныхасыздæхтмæ хауынц: Уæлладжыры (Алагиры) комы ныхасыздæхт, Куырттаты ныхасыздæхт æмæ Тæгиаты ныхасыздæхт.

Андрей Шегрен Хуссар Иры ныхасыздæхтыты хицæн диалектыл кæй нымадта, уый тыххæй зынгæ ахуыргонд æмæ æхсæнадон архайæг Тыбылты Алыксандр афтæ зæгъы: «Шегрен æппындæр никуы фехъуыста хус-сараг ирон æвзаг æмæ Алгъузидзейы хæццæ фыстытæй уæлдай ницы зыдта уыцы æвзагæн».

Хуссайраг ирон æвзаг Всеволод Миллер ирон диалекты ныхасыздæхтыл кæй нымад-та, уый тыххæй Тыбылты Алыксандр афтæ зæгъы: «Раст балæууыд хуссайраг æвзагмæ Миллер, фæлæ йæм лæмбынæгæй не ‘ркас-ти æмæ йыл афтæмæй рæдыдтытæ æрцыдис. Ирон æвзаджы Миллер дих кæны дыгурон æмæ ирон диалекттыл æмæ хуссайраг æвзаджы хатт нымайы ирон диалектæй. Хуссайраг æвзаджы хатт Миллер нымайы ирон диалектæй рацæугæ. Хуссайраг æвзаджы хæттытæ ирон æвзагæй кæй рацыдысты, уымæй Миллер тынг раст зæгъы. Æрмæст рæдийы Миллер, æмæ хуссайраг æвзаджы хæттытæ иу диалектыл кæй нымайы. Хуссар Ирыстоны иу ирон диалект нæй, фæлæ дзы ис цалдæр ирон æвзаджы къабæзтæ».

Алыксандр растыл нæ нымайы, Миллер хуссайраг ирон диалектæн сæ хицæн миниу-джыты тыххæй цы зæгъы, уый дæр. Цæвиттонæн хæссы уый тыххæй хуссайраг хъæлæсон æ хæстæг кæй хоны хъæлæсон е-мæ, у и-мæ. Миллер æмхъæлæсон мырты тыххæй цы зæгъы, уый дæр Алыксандрмæ раст нæ кæсы. Уый тыххæй афтæ зæгъы: «Куыд зыны, афтæмæй Миллер дзæбæх нæ рахатыди хуссайраг æмхъæлæсон хъæрты хабар дæр» (Алыксандр мырты хъæртæ хуыдта).

Хуссар Иры ныхасыздæхтыты æвзаргæйæ, фыццаг ирон профессор Æлборты Барысби дæр рахæцыд Всеволод Миллеры позициты фарс. Уый нæ фæцыдис Алыксандры зæрдæмæ æмæ афтæ зæгъы: «Æлборты Барысби йæ «Ирон æвзаджы цыбыр грамматикæ»-йы хуссайраг ирон æвзаджы ахастытæ æвзаргæйæ, Миллеры рæдыдтытыл йæ къух æвæры».

Миллер ирон æвзагыл стыр куыст бакодта, йæ раиртасынæн  егъау нысаниуæг ис. Нæй ныртæккæ дæр, ирон æвзаг, ирон æвзаджы истори ахуыргæнгæйæ, йæ раиртæстыты иувæрсты рахизæн. Дзырд дæр ыл нæй, йæ раиртæстытæн, Тыбылты Алыксандр куыд зæгъы, афтæмæй ис егъау нысаниуæг, кæд дзы цухдзинæдтæ ис, уæддæр.

Фæлæ, æвæццæгæн, æцæгæлон искæй æвзагыл куы фæкусы, зонадон æгъдауæй йыл раиртæстытæ куы фæаразы, уæд дзы  цухдзинæдтæ дæр баирвæзы. Уымæй дæр Всеволод Миллер йæхæдæг куыд зæгъы, афтæмæй Хуссар Иры никуы уыдис æмæ практикон æгъдауæй зонгæ нæ уыдис Хуссар Иры æвзаджы хæттытимæ. Æмткæй сис-гæйæ, Миллер, ирон æвзагыл кусгæйæ, пайда кодта Даниел Чонкадзе æмæ Цорæты В. фыст тексттæй. Хуссар Иры ныхасыздæхтыты тыххæй та афтæ зæгъы: «Текстов, записанных на южно-осетинском диалекте в нашем собрании нет, так как нам не привелось быть в Южной Осетии. Но об особенностях этого диалекта можно составить себе отчасти понятие, во-первых: по исследованию Розена, который познакомился с осетинским языком в г. Гори; во-вторых: по некоторым книжкам духовного содержания, изданным в Тифлисе в начале нынешнего столетия Ялгузидзе».

Академик Георгий Ахвледиани дæр Хуссар Иры æвзаг хуыдта диалект. Уый тыххæй афтæ фыста иу рæстæджы: «Можно было бы назвать его «южно-осетинским» диалектом наравне с западно-осетинским (дигорским) и восточно-осетинским (иронским), но этому мешает наличие иронского говора в Юго-Осетии. Поэтому мы сочли возможным ввести условный, но, думаю, перспективный, термин «двалский диалект», как равноценный терминам иронский и дигорский».

Всеволод Миллер Хуссар Иры уыд æви нæ, уый тыххæй мæ фæнды темæ адарддæр кæнын.

Филологон зонæдты кандидат, доцент, дзæнæтыбадинаг Бекъойты Дмитри йæ док-торон диссертацийы «Иронский диалект осетинского языка»-йы афтæ зæгъы:

«Позже, в 1883 г. В.Ф. Миллер совершил поездку в Южную Осетию. Он из Владикавказа по военно-грузинской дороге прибыл в Гори, оттуда проехал через местечко Цхинвал в селение Дзау. Там он провел несколько дней и записал тексты».

Тыбылты Алыксандр дæр Хуссар Иры ныхасыздæхтыты хоны куы «æвзаджы хæттытæ», ома, ныхасыздæхтытæ, куы та – диа-лекттæ.

Мæнæ куыд зæгъы Хуссар Иры æвзаджы хæттыты тыххæй: «Иу цыбыр дзырдæй, Хуссар Ирыстоны ирон адæм иу æвзагæй нæ дзурынц, фæлæ дзы ис æвзаджы цалдæр хæттытæ, цалдæр диалекты. Уыцы диалекттæ иуæй уыйбæрц дард лæууынц кæрæдзимæ, иннæмæй уый бæрц хæстæг сты цæгаттаг ирон диалекттæм, æмæ сыл хицæн иумиаг ном сæвæрæн нæй. Ферох кæнын хъæуы ахæм ныхæстæ – «туаллаг» æвзаг – «хуссайраг ирон æвзаг», уымæн æмæ уыцы ныхæсты рæстдзинадæй ницы ис. Хуссар Ирыстоны цы диалекттæ ис, уыдон равзæрдысты ирон æвзагæй æмæ сты йæ къабаз нæ, фæлæ йæ къабæзтæ».

Хуссар Ирыстоны цæрæг ирон адæмы æвзаджы хатт иу диалект – «туайлаг» диалект кæй нæу, уый сбæлвырд кодта зынгæ иранист, фольклорист, ирон æвзаджы историк, академик Абайты Васо. Хуссар Ирыстоны цæрæг ирон адæмы æвзаджы тыххæй Васо афтæ зæгъы: «Наблюдения мои убедили меня, что картину югоосетинской диалектологии следует представлять несколько в ином виде. Во-первых, в Юго-Осетии имеется не одно, а три самостоятельных, имеющих ясно выраженные фонетические особенности, наречия. Во-вторых, если взять всю Осетию в целом, Главный Хребет не играет в ней роли лингвистической границы между северными и южными наречиями».

Уæдæ афтæ; Абайты Васо Хуссар Иры ныхасыздæхтыты тыххæй загъта, куыд фæзæгъынц, кæронбæттæн ныхас. Хуссар Иры æртæ ныхасыздæхтæй: дзауаг шыгæнæг (жыгæнаг) ныхасыздæхт, цъалагоймаг цыгæнаг ныхасыздæхт æмæ чысайнаг, цыгæнаг ныхасыздæхт. Ам мæ фæнды сæрмагондæй рахицæн кæнын термин «Рукъаг ныхасыздæхт. Цымæ цас раст у, æнæхъæн комы цы хъæутæ уыдис, уыдонæй цыгæнаг ныхасыздæхт рукъаг ныхасыздæхт кæй схуыдтой, уый? Уыцы комы æрæджыйы онг дæр уыдис фараст хъæуæй фылдæр. Уыдон се ‘ппæт дæр дзурынц иу ныхасыздæхтыл – цыгæнаг ныхасыздæхтыл. Мæ хъуыдымæ гæсгæ хуыздæр уыдаид, уыцы ныхасыздæхт цъалагоймаг ныхасыздæхт куы схуыдтаиккой, уæд. Васо сæйрагдæртыл нымайы ныгуылæйнаг, ома, дзауаг шыгæнаг (жыгæнаг) ныхасыздæхт æмæ скæсæйнаг, ома, рукъаг цыгæнæг ныхасыздæхтытæ.

Ацы ныхасыздæхтытæй дзауаг шыгæнаг (жыгæнаг) ныхасыздæхт йæхимæ рагæй здахы ахуыргæндты хъусдард. Уымæн æмæ уымæн йæ хиæдтæ сты тынг цымыдисон.

Историон æрмæджытæ нын куыд амо-нынц, афтæмæй дзауаг шыгæнаг (жыгæнаг) ныхасыздæхтыл дзурджытæ Хуссар Ирмæ æрцыдысты Кавказы сæйраг хохы цæгатфарсæй: Къасарайы комæй, Зæрæмæгæй, Згъилæй, Нарæй, Зругæй æмæ Захъхъайæ, – зæгъы гуырдзиаг историк Вахушти.

Цымыдисон уый у, æмæ абоны бон уæлдæр ранымадгонд бынæтты чи цæры, уыдоны ныхасыздæхт æмæ дзауаг шыгæнаг (жыгæнаг) ныхасыздæхт кæрæдзимæ тынг дард лæууынц. Мæ хъуыдымæ гæсгæ уæлдæр загъдгонд бынæттæй Хуссар Иры кæмттæм цы адæм раивылд, уыдон уыцы бынæтты æдзæрæгæй не ‘рыййæфтой. Уыдоны  ныхасыздæхтыл дзурджытимæ куы сæмхæццæ сты, уæд сæ ныхасыздæхт æр-цыд ассимиляцигонд.

Уæлдæр загъдгонд ныхасыздæхтыты тыххæй Абайты Васо афтæ зæгъы: «Вахушти пишет про них: «Они все переселились в означенные места из Двалети. Это утверждение Вахушти заслуживает полного доверия, но приходится допустить, что переселение произошло сравнительно давно, иначе трудно было бы объяснить те  глубокие различия в фонетике, сейчас отделяют это наречие от североиронского диалекта, в том числе и от туальского говора».

Дзауаг шыгæнаг (жыгæнæг) ныхасыздæхтыл дзурынц Хуссар Иры цæрæг ирон адæмы фылдæр хай: Дзауы ком – Уанелæй дæлæмæ, Хъемултагом, Чеселтгом, Цъон, Къуыдаргом, Козыком, Знауыры район. Знауыры районы шыгæнаг (жыгæнаг) ныхасыздæхты дзурджытæ уыцы бынæттæм ахызтысты Дзауы комæй сæ ныхасыздæхтимæ.

Советон дуджы 60-70 азты дзауаг шыгæнаг (жыгæнаг) ныхасыздæхтыл дзурджытæ фылдæр кæнын райдыдтой, цъалагоймаг цыгæнаг ныхасыздæхтыл дзурджытæ та азæй-азмæ кодтой къаддæр. Йæ аххосаг цæй мидæг ис? Ацы фарстæн дзуапп зын ссарæн нæу. 60-70 азты Цъалагомы цыгæнаг ныхасыздæхтыл дзурджыты иу хай хуыздæр цардагур аивылдысты Цæгат Ирмæ, иннæ хай та æрбынат кодта Дзауы поселочы æмæ горæт Цхинвалы. Дзауы æмæ Цхинвалы чи æрбынат кодта, уыдонæн сæ сывæллæттæ иууылдæр рахызтысты шыгæнаг (жыгæнаг) ныхасыздæхтмæ бынæттон цæрджыты ныхасыздæхты æндæвдады фæстиуæгæн.

Историон æрмæджытæ куыд бæлвырд кæнынц, афтæмæй дзауаг шыгæнаг (жы-гæнаг) ныхасыздæхтыл дзурджытæ кæд Кавказы хохы цæгатварсæй æрыздæхтысты хуссарварсмæ, уæд ацы ныхасыздæхтæн мæ хъуыдымæ гæсгæ, ис адихгæнæн æртæ периодыл:

  1. Фыццаг периоды уыдон нырма дзырдтаиккой, цы ныхасыздæхтимæ æрцыдысты, ууыл, ома, цæгатварс ирон ныхасыздæхтыл – цыгæнаг ныхасыздæхтыл.
  2. Дыккаг периодмæ хауы чыгæнаг ны-хасыздæхт. Уымæн æвдисæн сты Æгъуызаты Иуанейы динон чингуыты тæлмæцтæ.
  3. Æртыккаг период та хауы шыгæнаг (жыгæнаг) ныхасыздæхты периодмæ, ома, абоны бон цы ныхасыздæхтыл дзурынц, уыцы период.

Фыццаг периоды, кæй зæгъын æй хъæуы, дзырдтаиккой, цы ныхасыздæхтимæ æрцы-дысты, ууыл, ома, туайлаг ныхасыздæхтыл: ц, дз кæнæ та с, з. Зæгъæм: цæмæн (сæмæн), дзæбæх (зæбæх), дзурын (зурын), цæуын (сæуын) æмæ афтæ дарддæр:

Туайлаг ныхасыздæхтæй чыгæнаг  ныхасыздæхтмæ рахызтæн, мæ хъуыдымæ гæсгæ, чысыл рæстæг нæ бахъуыдаид, æвæццæгæн, сæдæгай азтæ. Æрхæссæм иу чысыл скъуыддзаг цæвиттонæн Æгъуызаты Иуанейы тæлмацгонд текстæй: «Нывварджыдæн тæрхонады коммæгасаг æрконд ирон Арагвыл ама Кисил Еахуил Чаргитан.  Джырдтай уи барзонд чавынады ама ивд на хисдары ама бавварат раст æгъдавыл комма гасаг Иры, качыта чардтита чарыч Кисил Левахиил».

Ныры ирон æвзагыл текст у афтæ: Нывæрдзыстæм тæрхондон коммæгæсæг Арагвийыл æмæ Чысыл Леуахийыл цæрæг ирон адæмæн йæ бæрзонд цæуынады æмæ нæ иууыл хисдæры дзырдæй æмæ (цæмæй) бавæрат раст æгъдауыл коммæгæсæг Иры, кæцытæ цæрынц Арагвийы æмæ Чысыл Леуахийыл. Æгъуызаты Иуане фыста чыгæ-наг ныхасыздæхтыл. Уый бæрæг у, йæхи тыххæй афтæ кæм фыссы:

«Мыггаг æмæ чæуæтæй ирон къаннæг сывæллоны мæ æркодта мæн Гуырдзыстоны мæликк… æмæ мæ радта мæн киныгы ахуыргæнæгмæ иттæг зæрдæйæ… Ачы фæндæй, æмæ кæд сымах ме ‘мирон мыггагæн йе афоныл истæмæй бæззон, ахъазхъом фæчаин».

Дзауаг рагон чыгæнаг ныхасыздæхт сындæггай хизын райдыдта шыгæнаг æмæ жыгæнаг ныхасыздæхтмæ. Ныртæккæ нымад цæуы шыгæнаг ныхасыздæхтыл, фæлæ уыцы рахызты процесс нырмадæр цæуы. Уымæн æмæ ныртæккæ дæр литературон æвзаджы ц-йы бæсты арæх пайда кæнæм ч-йæ. Ацы фарстыл ныхас цæудзæнис фæстæдæр, фæлæ уал хъуыды бафидар кæныны тыххæй æрхæсдзыстæм иу цалдæр цæвиттоны.

Зæгъæм: куынц-куынч, хынцын – хынчын, цомут – чомут æмæ æндæртæ. Уæдæ дзауаг ныхасыздæхт æрмæст шыгæнаг æмæ жыгæнаг ныхасыздæхт нæу, фæлæ ма йæм хæццæ кæны чыгæнаг ныхасыздæхт дæр.

Ныр та рахизæм комкоммæ дзауаг ныхасыздæхтыл анализ кæнынмæ.

ХУЫГАТЫ Илья

Кæрон – радон номыры

 

Comments are closed, but trackbacks and pingbacks are open.