Æрæджы Галаты Барисы номыл кафт æмæ зарды паддзахадон ансамбль «Симд» уыдис гастролон балцы горæт Краснодары. Сæ концерт куыд ацыдис æмæ цавæр тæлмæнтимæ æрыздæхтысты, цавæр пълæнттæ кæнынц, уыдæттæ базоныны тыххæй, 18-æм ноябры Хуссар Ирыстоны Информаци æмæ мыхуыры комитеты пресс-центры уыдис брифинг ансамблы аивадон къухдариуæггæнæг Коцты Сергей, администратор Тедеты Ацæмæз æмæ нæ республикæйы адæмон артист, зарæггæнæг Хаситы Сосланимæ.
Коцты Сергей, фыццаджыдæр, бузныг загъта, «Симд»-ы гастролон балц чи сорганизаци кодта, æппæт уыдонæн, ансамблы артисттæн сæ арæхстдзинады тыххæй æмæ нын радзырдта, концерт ыл цавæр тæлмæнтæ ныууагъта, уый. «Æз тынг райгондæй баззадтæн нæ гастролтæй, уымæн æмæ ныл сценæмæкæсджытæ сæмбæлдысты стыр æхсызгонæй. Концерт, куыд мæныл, афтæ ансамблы артисттыл дæр ныууагъта хорз тæлмæнтæ. Зæрдæ радис, филармонийы сценæйыл ирон аивад бæрзонд æмвæзадыл æвдыст кæй цыдис æмæ сценæкæсджытæ уымæй стыр æхцондзинад кæй истой, уымæй. Сæ цæст ныл æрæвæрдтой бынæттон адæм. Кондæй дæр уыдыстæм фидынц. Краснодары ис бирæ профессионалон кафт æмæ зарды сфæлдыстадон къордтæ æмæ уымæ гæсгæ бынæттон сценæмæкæсджытæ буц сты, аргъ кæнын зонынц аивадæн. Концертмæ нæм æрбацыдысты куыд ирæттæ, афтæ уырыссæгтæ æмæ æндæр нациты минæвæрттæ. Аргъ кодтой ирон кафт æмæ зардæн. Краснодары ирæттæ ныл афтæ зæрдиагæй сæмбæлдысты, ахæм цин ныл фæкодтой æмæ-иу сæ цæссыгтæ дæр æркалдтой. Ансамблы артистты арæхстдзинады тыххæй та зæгъдзынæн уый, æмæ зæрдиагæй кæй æххæст кодтой сæ алкæцы музыкалон номыр дæр. Уыдон, куыд фæзæгъынц, сæ удтæ радтой æмæ равдыстой диссаджы концерт», — банысан кодта «Симд»-ы аивадон къухдариуæггæнæг.
Уый ма журналисттæн радзырдта сæ концерты программæйы тыххæй. Бацæттæ йæм кодтой 11 кафты æмæ 13 вокалон номыры. Сæ фылдæр уыдысты ирон кæфтытæ æмæ зарджытæ. Сæрмагондæй хор ацы концертмæ бацæттæ кодта цалдæр хъазахъхъаг зарæджы. Ансамблы артисттæ аив сæххæст кодтой абхазаг, цæцæйнаг, адыгейаг æмæ Кавказы æндæр адæмты кæфтытæ дæр.
«Нæ концертон программæ егъау рауадис æмæ йæ сарæзтам дыууæ хайæ, антракт уыдис 15 минуты бæрц. Æз ацы гастролтæй баззадтæн райгонд. Фæстаг рæстæджы, афæдзæй фылдæр никуыдæм ацыдыстæм æмæ нæ гастролон балцы нымайæм стыр æнтыстыл», — загъта Тедеты Ацæмæз.
Уый ма фехъусын кодта, зæгъгæ, сæ пъланы ис декабры æмбисты Цхинвалы дæр солон концерт радтын.
Коцты Сергей ма куыд банысан кодта, афтæмæй ансамбль «Симд» ног азæй фæстæмæ фæнд кæны гастролон балцыты Уæрæсейы регионтыл æрзилын.
«Махæн нæ пъланы ис гастролты ацæуын Мæскуымæ, Грознæмæ, Геленджик, Анапæ æмæ Адлермæ. Ныридæгæн скъуыддзаг цæуы ацы фарст æмæ нæ ныфс ис нæ министрадæй. Ныр дæр концерты рæстæ-джы ансамблы фарсмæ æрбалæууыд культурæйы министр Зæгъойты Рада. Уый немæ кæй ацыдис æмæ нæ уырыссаг сценæмæкæсджыты раз кæй сбуц кодта, уый стыр ахъаз уыдис алкæцы артистæн дæр, хорзæрдæм сыл бандæвта æмæ йын уый тыххæй арфæ кæнæм», — банысан кодта Сергей.
Коцты лæппу ма куыд фехъусын кодта, афтæмæй Республикæ Хуссар Ирыстон æмæ Краснодары культурæйы министртæ — Зæгъойты Рада æмæ Виктория Лапинайы бадзырдмæ гæсгæ, фидæнмæ Цхинвалмæ гастролты кæй æрцæудзæнис паддзахадон кафт æмæ зарды ансамбль «Кубанская казачья вольница». Уыимæ иумæ ацы бадзырды фæлгæтты Краснодары цæттæ сты хуссарирыстойнаг сфæлдыстадон кол-лективты концерттæм бакæсынмæ.
Хаситы Сослан дæр нæ басусæг кодта йæ тæлмæнтæ æмæ банысан кодта артистæн иууыл сæйрагдæр хорзæх кæй у эмоционалон сценæмæкæсæг. Афтæ ма ахсджиагыл банымадта артистты арæхдæр кæй хъæуы гастролон балцыты цæуын, уый.
«Мах стæм паддзахадон ансамблы цæсгом, кæцы кад æмæ радæй хæссы Галаты Барисы ном æмæ уый æмбаргæйæ, кæддæриддæр хъуамæ бæрзонд исæм нæ национ культурæ, не сфæлдыстад. Мæнмæ гæсгæ, нæ ансамбль Краснодары равдыста ирон аивад æмбæлон æмвæзадыл æмæ мын уый тынг æхсызгон у. Ис нын тынг хорз коллектив. Нæ ансамблæн ис йæхи репертуар, йæхи идеятæ. Иуран нæ лæууæм, æппынæдзух кусæм нæхиуыл, цæмæй нæхимæ дæр æмæ æндæр бæстæтæн цы равдисæм, уый нын уа. Архайæм, цæмæй уæм нæ райгуырæн Ирыстоны аккаг артисттæ. Бузныг ма зæгъын, ацы гастролты кæй фæрцы ацыдыстæм, æппæт уыдонæн», — зæгъы Сослан.
Журналисттæ бацымыдис кодтой, ансамбль «Симд»-ы архайд æмæ сæ репертуар тагъд рæстæджы цæмæй баххæст уыдзæн, уымæ. Коцты Сергей загъта, зæгъгæ, ныридæгæн йæ разы цы хæстæ æвæры, уыдонæй иу у «Хъаматимæ кафт» æмæ «Чепена» сæвæрын, кæцыйы солист уыдзæн ансамблы хоры артист Хаситы Сослан.
ЦХУЫРБАТЫ Ларисæ
