Нæ горæты 2-æм астæуккаг скъолайы уагъд цæуы конкурс «2016-2017 азты хуыздæр ахуыргæнинаг». Йæ фæлгæтты уагъд цæуынц алыгъуызон конкурсты бындурыл мадзæлттæ. Хайад дзы исынц 6-11-æм кълæсты ахуыргæнинæгтæ. Конкурс «2016-2017 азы хуыздæр ахуыргæнинаг»-ы хæслæвæрдтæй сæ иумæ гæсгæ ахуыргæнинæгтæ хъуамæ бацæттæ кодтаиккой къулын газеттæ ахæм темæйыл: «Ирыстоны хъæбатыртыл нæ кæуынц, хъæбатыртыл нæм зарджытæ кæнынц». Ацы къулын газеттæ ахуыргæнинæгтæ бацæттæ кодтой 23-æм ноябры, Иудзинад æмæ æхсардзинады бонмæ. Сæ тематикæ дæр уыд, 1989 азы 23-æм ноябры фыццаг хатт гуырдзиаг тыхгæнджытæ митинг ауадзыны æфсон куы æрбацыдысты Хуссар Ирыстонмæ æмæ нæ горæты æрбахизæны сæ размæ куыд æрлæууыдысты не ‘мбæстæгтæ чысылæй, стырæй, ууыл. Конкурсы хайадисджытæн гуырдзыйы агрессийы азты сæ ныййарджытæ дæр уыдысты скъоладзаутæ, уымæ гæсгæ сæ газетты фæрсттыл уыдон спайда кодтой, сæ мæдтæ æмæ фыдты ныхæстæм гæсгæ се скъолайон азты цы уæззаудзинæдтæ бавзæрстой, уыцы хабæрттæй. Райстой ма чысыл интервьютæ  Ирыстоны зæххыл хæстон архайдтыты хайадисджытæй, æрдзырдтой ма, Райгуырæн бæстæйы сæрвæлтау йæ уд нывондæн чи æрхаста, уыдоны æмæ æндæр ахæм хъайтарты тыххæй, куыд, зæгъæм, Хуыбылты Валери, Галуанты Олег, Табуты Радион æмæ æндæрты тыххæй.

Сæ газетты фæрстыл ма æвдыст æрцыды-сты нæ республикæйы сæйраг паддзахадон атрибуттæ – герб æмæ тырыса.

Конкурсы сывæллæтты бацæттæгонд газетты мидис æмæ иумæйаг æддаг бакастæн аргъ кодтой жюрийы уæнгтæ, кæцыты сконды уыдысты скъолайы директор Ольга Михайлиди, ныййарджыты комитеты сæрдар Бететы Юри, хистæркъласонты советы сæрдар Плиты Георги æмæ ахуыргæнджыты иу къорд. Уыдон алкæцы куыстæн дæр скодтой аккаг аргъ æмæ баконд æрцыдысты скъолайы къулыл.

Сæ бакæнгæ куысты фæстиуджытимæ базонгæ кодтой скъолайы иннæ ахуыргæнджыты æмæ ахуыргæнинæгты 16-17 декабры. Уыдон æрбамбырд сты конкурсы хайадисджыты бацæттæгонд газетты цурмæ æмæ сын автортæ лæмбынæг æрдзырдтой сæ куысты темæты тыххæй. Автортæ сæ бакуыстгонд темæтæ сæ зæрдæмæ афтæ æввахс айстой, æмæ-иу сын сæ мидисыл куы дзырдтой, уæд-иу æрæнкъард сты æмæ дзы бирæтæн сæ зæрдæтæ дæр суынгæг сты.

2-æм астæуккаг скъолайы директор Ольга Михаилиди мадзалы кæронбæттæны куыд загъта, уымæ гæсгæ сæм ахæм конкурс уагъд цæуы фыццаг хатт. Цы темæйыл дзы æрдзырдтой – 23-æм ноябры тыххæй, уый та нæ адæмæн алкæцы фæлтæрæн дæр у зæрдылдаринаг. Мæнæ абон цы газеттæ уынæм, уыдоны автортæй æз баззадтæн тынг райгондæй, уымæн æмæ уыдон сæ темæтæ агуырдтой сæхæдæг æмæ сыл куыстой зæрдиагæй. Конкурс «2016-2017 азты ахуыргæнинаг»-ы фæлгæтты ма нæм уагъд æрцæудзысты ноджы бирæ мадзæлттæ æмæ сын фæстиуджытæ та сараздзыстæм ахуыры азы кæронмæ æввахс æмæ хуыздæр йæхи чи равдиса, уыдон хорзæхджын æрцæудзысты алыгъуызон хорзæхтæй, – загъта йæ раныхасы Ольга Михаилиди.

Уый ма ноджы уæлдай хатт бузныджы ныхæстæ загъта конкурсы хайадисджытæн æмæ йæ бафæндыдис,  цæмæй сын стыр æнтыстытæ уа сæ ахуыры.

Туаты Лариса

Comments are closed, but trackbacks and pingbacks are open.