Сног кодта нæ фыдæлты уадынгарз

Чысылӕй фӕстӕмӕ йӕ зӕрдӕ иууылдӕр дзырдта музыкӕйы зӕлтимӕ, ӕппынӕдзух сӕ ахӕсты куы уыдаид, уый йӕ фӕндыд. Цхинвалы 6-ӕм астӕуккаг скъолайы 8-ӕм кълас каст фӕуыны фӕстӕ йӕ фӕнд конд уыд ӕмӕ ахуыр кӕнын райдыдта нӕ горӕты музыкалон ахуыргӕнӕндоны. Цы хайадмӕ бацыд, уырдӕм та йын фӕндаг радтой йе ‘взыгъддзинӕдтӕм гӕсгӕ. Цӕвиттон, ахуыргӕнӕндоны уӕд фыццаг хатт байгом кодтой теоретикон хайад ӕмӕ музыкалон ахуыргӕнӕндоны ахуыргӕнджытӕ сӕхӕдӕг равзӕрстой скъолаты, ацы хайады ахуыр кӕнын кӕй бон суыдзӕн, уыцы фидӕны студентты. Ӕмӕ сӕ хал схауд нӕ горӕты иууыл ӕвзыгъддӕртӕй ӕхсӕзӕн, уыдон нымӕцы уыд Ӕлборты Ланӕ дӕр. Ацы хайад байгом кӕныныл тынг бацархайдта ахуыргӕнӕндоны директор, композитор Плиты Жаннӕ. Фӕстӕдæр та ахуыргӕнӕндоны директор ссис Ӕлборты Феликс ӕмӕ уый разамындӕй ацы 6 чызджы каст фесты сӕ ахуыр ӕнтысгӕйӕ. Музыкалон ахуыргӕнӕндон ӕнтыстджынӕй каст фӕуыны фӕстӕ йӕ разы ӕрӕвӕрдта хӕс, цӕмӕй фылдӕр ӕмӕ арфдӕр зонындзинӕдтӕй йӕхи схотыхджын кӕна. Раст уыцы нысанӕн 1989 азы ахуыр кӕнын райдыдта Киевы консерваторийы ӕмӕ йӕ ӕнтысгӕйӕ каст фӕци 1994 азы, райста музыкӕйы фольклористикӕйы дӕсныйад. Уый уымӕн, ӕмӕ ацы дӕсныйадӕй, зӕгъӕн ис, ӕмӕ бынтондӕр кӕй нӕй специалисттӕ дыууӕ Ирыстоны дӕр. Ӕлборты чызг равзӕрста, дарддӕр цӕуыл кусдзӕн, уыцы ахсджиаг ӕмӕ вазыгджын фарстатӕ, номхуындӕй та – ирон зарджытӕ ӕмӕ цӕгъдтытӕ.

Йӕ ахуыр каст фӕуыны фӕстӕ ӕрыздӕхт йӕ райгуырӕн Цхинвалмӕ, æмæ бӕрзонд ӕмвӕзады специалисты кусынмӕ ӕрбахуыдтой. Уыцы иу рӕстӕджы куыста Хуссар Ирыстоны паддзахадон педагогон институты ӕмӕ Ӕлборты Феликсы номыл музыкалон ахуыргӕнӕндоны. Уӕд ӕм чи ахуыр кодта, уыдон ныр ӕнтысгӕйӕ се ‘взыгъддзинӕдтӕ ӕвдисынц, нӕ республикӕйы цы оркестр сырӕзт Уалыты Нинӕйы разамындӕй, уым. Ӕлборты чызг бафиппайдта, зӕгъгӕ, рӕхджы Хуссар Ирыстоны университеты ног агъуыст байгом кӕндзӕн йӕ дуӕрттӕ ӕмӕ дзы ӕнӕмӕнг бакӕнын хъӕудзӕн теоретикон дӕсныйады факультет. Уый стыр ахъаз фӕуыдзӕн не скъолатӕн музыкӕйы ахуыргӕнджытӕ бацӕттӕ кӕныны.

Фӕлӕ уӕддӕр ахуыр, дӕсныйад фӕбӕрзонддӕр кӕнын уӕгъд нӕ уагътой цардбӕллон чызджы ӕмӕ иу аз бакусыны фӕстӕ йӕ зонындзинӕдтӕ фӕфылдӕр кӕныны тыххӕй ахуыр кӕнын райдыдта музыкӕйы хаххыл Мӕскуыйы аспирантурӕйы. Бафӕндыд ӕй дыккаг уӕлдӕр ахуырад райсын ӕмӕ райста культурологийы специалист, кусын райдыдта институты йæ дæсныйады фæдыл. Фӕстӕдӕр та куыста иумиагахуырадон скъолайы сывӕллӕттимӕ.

Мӕскуыйы 13 азы бакусыны фӕстӕ рабалц кодта йӕ райгуырӕн Ирыстонмӕ ӕмӕ йæ дӕсныйадмӕ гӕсгӕ кусын райдыдта Дзӕуджыхъӕуы аивӕдты лицейы. Ланӕ мын радзырдта, уадындзимӕ куыд базонгӕ, уый тыххӕй дӕр. Цӕвиттон, Мӕскуыйы ахуыргӕнджыты квалификаци фӕбӕрзонддӕр кӕныны курсыты сын сӕ зонындзинӕдтӕ цӕстуарзонӕй амыдтой бæрзондквалификациджын специалисттæ. Иу рӕстӕджы сӕм иу сылгоймаг уадындзимӕ ӕрбацыд, кӕцы уыд канадӕйаг системӕмӕ гӕсгӕ арӕзт. Уӕрӕсейы нымӕцон системӕмӕ гӕсгӕ уадындзӕй цӕгъдын ссис тынг популярон астӕуккаг скъолаты. Йӕ амонын ӕмӕ уымӕ гӕсгӕ ахуыр кӕнын у тынг ӕнцон. Ланӕ ацы уадынгарз ӕввахс айста йӕ зӕрдӕмӕ ӕмӕ аскъуыддзаг кодта, цӕмӕй йӕ æрбиноныг кӕна Ирыстоны дӕр. Ау, ӕмбисонд Нарты Ацӕмӕз куы уыд, йӕ уадындзы диссаджы цагъдмӕ мӕргътӕ ӕмӕ сырдтӕ дӕр-иу куы ӕрӕхъуыстой. Уӕд фыдӕлты уыцы уадынгарз цӕмӕннӕ хъуамӕ ногӕй зӕла Ирыстоны кӕмттӕ ӕмӕ хӕхты. Уыцы фӕнд ӕххӕст дӕр скодта, тагъд рӕстӕджы байгом кодта уадындзӕй цӕгъдыны уроктӕ ӕмæ йын ис хорз ӕнтыстытӕ. Сывӕллӕттӕ йӕм цӕуынц 1-аг къласӕй ӕмӕ йӕ фӕуд кӕнынц, 8-æм кълас каст куы фӕвӕййынц, уӕд. Ӕлборты чызг мӕнӕн фадат радта, цӕмӕй байхъуыстаин, 8-ӕм къласы ахуырдзаутӕн цы урок уагъта, уымӕ. Раст зӕгъын хъӕуы, тынг фӕцыд мӕ зӕрдӕмӕ урочы цыд. Ахуыргӕнӕг сӕ зонгӕ кодта иу кӕнӕ иннӕ цагъдимӕ, пайда кодтой алыгъуызон музыкалон литературӕйӕ. Тынг цымыдисон уыд, уадындзæй цæгъдынӕн нотӕтӕй кӕй пайда кодтой, уый. Ӕнцон, рог цӕгъдтытӕй-иу ахызтысты ирон ӕмӕ ӕндӕр адӕмты, суанг фӕсарӕйнаг музыкӕйы вазыгджын уацмыстӕм.Уадындзы зӕлтӕ хъустӕ ахсынц рогӕн, зӕрдӕмӕ арф хизынц ӕмӕ адӕймагыл ӕфтауынц цины ӕнкъарӕнтӕ. Ланӕ куыд бафиппайдта, афтӕмӕй ирон композитортӕ Ӕлборты Феликс, Гӕздӕнты Булаты уацмыстæ, ӕмткӕй, ирон музыкӕ тынг фидауы уадындзыл цӕгъдгӕйӕ, раст цыма уыцы уадынгарзӕн фыст ӕрцыдысты, афтӕ зæлынц. Ӕвзонг фӕлтӕры ма ахуыр кӕны уырыссаг ӕмӕ фӕсарӕйнаг цӕгъдтытӕ ӕмӕ эстрадӕимӕ. Ацы музыканттӕ уыдысты Цхинвалы дӕр ӕмӕ сӕ аивадимӕ базонгӕ сты Хуссар Ирыстоны хӕдбардзинад банымайыны бæрæгбоны. Амӕйразмӕ уыдысты Сомихстоны, базонгӕ сты сӕ уадындзимӕ, ис ын йӕхи литературӕ. Равдыстой концерт дыууӕ хатты, базонгӕ сты, уадындз чи аразы, уыцы адӕймагимӕ дӕр. Ацы сӕрд та фӕнд кӕнынц Абхазмӕ абалц кӕнын æмӕ базонгӕ уыдзысты сӕ уадындзы традицитимӕ.

Ӕлборты Ланӕмӕ бирӕ хорз фӕндтӕ ӕмӕ бӕллицтӕ ис ӕмӕ йын ӕххӕст кӕнӕнт. Хуыбиаты Никъала