УÆГЪДИБАР ХЪÆБЫСХÆСТ

Хуссарирыстойнаг богалтæ Бестауты Андрей æмæ Дзæгъиаты Сослан та ногæй равдыстой, сæ кары уæзы категорийы сын Ирыстоны аккаг ныхмæлæууæг кæй нæй, уый. 2001-2003 азты гуырд спортсменты ‘хсæн РЦИ-Аланийы чемпионаты уыдон æнцонтæй фæуæлахиз сты сæ ныхмæлæуджытыл. Бестауты Андрей фыццаг бынат бацахста 125 кг уæзы категорийы, Дзæгъиаты Сослан та – 97 кг уæзы категорийы.

Ерысты æртыккаг бынат бацахста Цхуырбаты Артем. Уымæн ахæм æнтыст йæ къухты бафтыд 79 кг уæзы категорийы. Спортсменты тренер у Коцты Тамерлан.

ФУТБОЛ

Футболæй Уæрæсейы чемпион Санкт-Петербурджы «Зенит» атахт Иугонд Арабаг Эмираттæм, цыран райдайдзæн йæхи ног сезонмæ цæттæ кæнын. Командæимæ уырдæм атахтысты æртæ æвзонг футболисты. Уыдонæй сæ иу у Ирыстоны футболон скъолайы хъомылгæнинаг 17-аздзыд Биазырты Давид.

«Зенит»-ы сæйраг тренер Сергей Семак куыд фехъусын кодта, афтæмæй ацы футболисттæ сты фæсивæдон командæйы лидертæ æмæ йæ фæнды бакæсын, сæ тренировкæты рæстæджы сæхи куыд равдисдзысты, уымæ. Биазырты Давид «Зенит»-мæ рахызт ивгъуыд аз августы мæйы. Перспективон æмæ асæй бæрзонд (190 см) кулдуаргæс ацы сезоны «Зенит»-ы сконды Уæрæсейы фæсивæдон чемпионаты акодта фондз хъазты æмæ бауагъта дыууæ пуртийы, иу хъазт та акодта «Зенит-2»-йы сконды. Биазыры фырт ма иу хъазт акодта, 17 азы онг кæуыл цæуы, уыцы футболисттæй конд Уæрæсейы æмбырдгонд командæйы сконды.

ХУРИТЫ Батрадз

Comments are closed, but trackbacks and pingbacks are open.