Спорт

НОМАРÆН ТУРНИР

Дзауы поселочы скъола-интернаты хъазæн фæзуаты уагъд цæуы Физикон культурæ æмæ спорты сгуыхт кусæг Бежанты Зелимы номарæн турнир футболæй. Ерыстæ ныр уагъд цæуынц æртыккаг аз фæд-фæдыл. Уадзы сæ Дзауы районы администраци. Бежанты Зелим республикæйæн уæззау рæстæджыты, тренировкæтæ уадзынæн уавæртæ бынтондæр куынæ уыд, уæд дæр нæ ныууагъта йæ куыст æмæ уый фæрцы районы фæсивæдæн уавæр уыд спортæй архайынæн.

Ерысты хайад исынц республикæйы скъолаты командæтæ. Турниры призтыл тох кæнынц 12 командæйы. Уыдон дих сты æртæ дæлкъордыл. Ерыстæ байгом кæныны церемонийы йæ хайадисджытæн раарфæ кодта Президент Бибылты Анатоли. Паддзахады сæргълæууæг банысан кодта, зæгъгæ, Бежанты Зелим стыр хайбавæрд бахаста рæзгæ фæлтæры хъомыладмæ æмæ йын йæ номыл турниртæ кæй ауадзут, уый хорз хъуыддаг у.

Ерысты хайадисджытæн раарфæ кодта Дзауы районы администрацийы сæргълæууæг Джиоты Андрей дæр. Уый радзырдта Зелимы бирæ кæй уарзтой йæ хъомылгæнинæгтæ.

Бежанты Зелимы хорз зыдта Дзауы скъола-интернаты директор Галуанты Залинæ. Йæ раныхасы уый бузныг загътьа республикæйы къухдариуæгадæн ахæм адæймаджы номыл ерыстæ уагъд кæй цæуынц, уый тыххæй.

Турнир фæуыдзæн абон, 28 сентябры, уагъд æрцæудзæн финалон хъазт дæр.

 

КОМАНДОН ЧЕМПИОНАТ ШАХМАТТÆЙ

Цхинвалы уагъд æрцыд скъоладзауты ‘хсæн Хуссар Ирыстоны командон чемпионат шахматтæй. Ерысты хайад райстой 8 командæйы. Уыдонæй æхсæз уыдысты Цхинвалы астæуккаг скъолатæй, иу командæ – Хуриты Гивийы номыл Цъинагары астæуккаг скъола-йæ æмæ шахматон скъола «Белая ладья»-йы хъомылгæнинæгтæ. Банысан кæнын хъæуы уый, æмæ Цъинагары астæуккаг скъолайы стыр хъусдард здæхт кæй цæуы шахматты размæцыдмæ. Ацы ахуырадон уагдоны командæ алы хатт дæр хайад райсы республикон ерысты.

«Не скъолайы ахуыргæнинæгтæ алы хатт дæр æхсызгонæй хайад райсынц ерысты. Мах æй зыдтам шахматтæй республикæйы чемпионат уагъд кæй цæудзæн, уый æмæ йæм сывæллæттæ æнæрхъæцæй æнхъæлмæ кастысты», – загъта Цъинагары астæуккаг скъолайы директор Гуссойты Ласко.

Скъоладзауты ‘хсæн республикæйы чемпионат уагъд цæуы æрвылаз дæр. Ныр ерысты организатортæ уыдысты Фæсивæдон политикæ æмæ спорты комитет, «РХИ-йы шахматты федераци» æмæ Цхинвалы скъола-интернат.

Командæтæ иууылдæр хъазыдысты иу къорды. Уымæ гæсгæ ерысты хайадисджытæй алкæйы дæр бахъуыд фæйнæ авд партийы ахъазын. Чемпионаты регламентмæ гæсгæ алы командæйы дæр уыд фæйнæ æртæ хъазæджы. Ерысты размæ сæйраг фаворитыл нымад цыд гимнази «Рухс»-ы командæ, кæцы у республикæйы ивгъуыд азы чемпион. Фæлæ ныр сæйраг призтыл конкуренци уыд ноджы тыхджындæр. Фæстаг туры сыгъзæрин майдантæ рамбулын сæ бон уыд æхсæз командæйæн. Фæлæ ерысты кæрон æнтыстджындæрæй сæхи равдыстой гимназ «Альбион»-ы хъазджытæ æмæ систы ерысты уæлахиздзаутæ. Командæйы сконды хъазынц Биазырты Алан, Тыбылты Аланæ æмæ Тыбылты Аннæ.

Дыккаг бынат фæцис Цхинвалы скъола-интеранты командæйы. Æмæ æртыккаг бынатмæ та рахызтысты гимназ «Рухс»-ы минæвæрттæ.

«Ерыстæ ацыдысты тынг хорз. Махмæ бирæ курдиатджын сывæллæттæ ис. Хъæзтыты бæрæггæнæнтæн раздæр базонæн нæ уыд. Тынг райгонд стæм, сывæллæттæ сæхи куыд æвдисынц, уымæй. Азæй азмæ сæ арæхстдзинад кæны бæрзонддæр. Ныфс нæ ис, бирæтæ сæ фидæны кæй суыдзысты спорты дæснытæ», – банысан кодта «РХИ-йы Шахматты федераци»-йы президент Саулохты Георги.

Командæтæ хорзæхджын æрцыдысты призтæй æмæ кады грамотæтæй. Кæронбæттæны ма æвзонг шахматисттимæ иурæстæгон хъазты сеанс ауагътой Саулохты Георги æмæ республикæйы чемпионаты бронзæйон призер Къодоты Андрей.

                        ХУРИТЫ Батрадз