Информацион агентад «Спутник»-ы уагъд æрцыд пресс-конференци Республикæ Хуссар Ирыстоны аивадон æмæ эстетикон гимнастикæйы Федерацийы президент Цхуырбаты Земæимæ. Уый цыбыртæй æрдзырдта йæ архайды æмæ ацы спорты хуызы дарддæры райрæзты тыххæй, кæцы фæстаг азты тынг рæзы нæ республикæйы, афтæ ма æрдзырдта ацы спорты хуызы хъомылгæнинæгты æнтыстытыл. «Мæ хъомылгæнинæгтæ бындур æрæвæрдтой ацы скъолайы фидæны хъомылгæнинæгтæн. Цæмæй сын ноджы стырдæр æмæ хуыздæр æнтыстытæ уа, уый тыххæй мах, тренертæ, хъуамæ кусæм æмæ тырнæм спорты стырдæр бæрзæндтæм», – банысан кодта Цхуырбаты Земæ. Уый куыд загъта, афтæмæй нæ республикæйы аивадон æмæ эстетикон гимнастикæйы райрæзт егъау æххуыс домы куыд нæ республикæйы Хицауады ‘рдыгæй, афтæ дзыллон информацийы фæрæзты ‘рдыгæй дæр. Цæмæй Хуссар Ирыстоны гимнастикæ рæза æмæ размæ цæуа, уый тыххæй æрхонæм аивадон æмæ эстетикон гимнастикæйы уæрæсейаг хуыздæр тренерты, кæцытæ сæ рады нæ хъомылгæнинæгтимæ фæкусынц æмæ фæуадзынц тренировкæтæ нырыккон стандарттæм гæсгæ.
– Нæ республикæмæ мах цы тренерты фæхонæм, уыдон стыр аргъ скæнынц нæ хъомылгæнинæгты æнтыстытæн, банысан сын кæнынц сæ хорз цæттæдзинад, рæсугъддзинад, гимнастикæйы фæлтæрæнтæ æмæ ногдзинæдтæ базонынмæ сæ тырнындзинад. Афтæ ма уыдон сæ рады банысан кæнынц нæ хъомылгæнинæгты бæрзонд хъомысад, – загъта Цхуырбаты Земæ.
Уый банысан кодта, зæгъгæ, сæ хъомылгæнинæгты ныййарджытæ сæ сывæллæтты спортивон царды активон хайад хъуамæ исой. Ома, ныййарджытæ сæ сывæллæтты дисциплинæйыл хъуамæ хъомыл кæной чысылæй фæстæмæ, сахуыр сæ кæной царды раст приоритеттæ æвзарыныл, сæрибар рæстæг та – раст æрвитыныл.
– Тренер æмæ ныййарæг хъуамæ кусой иумæ. Æрмæстдæр ахæм иумиаг куысты фæрцы ис гæнæн æмæ уа хорз æнтыстытæ нæ ахуыргæнинæгтæн. Фыццаджыдæр, хъуамæ хъомылгæнинаджы раз сæвæрой спорты бæрзæндтæм тырныны нысан, цæмæй уымæн уа размæ цæуыны разæнгардгæнæн. Уый, кæй зæгъын æй хъæуы, егъау физикон æмæ психологон куыст у. Фæлæ дæ кæд фæнды, æмæ дын спорты уа стыр æнтыстытæ, уæд хъуамæ кусын æмæ архайын уарзай. Æмæ ахæм егъау куыст æмæ архайд тренировкæты рæстæджы домы егъау тыхтæ. Ныййарджыты æххуыс нæ уæлдай тынгдæр фæхъæуы, гимнастикæмæ йæ райдианы цы чысыл сабитæ æрбацæуынц, уыдон фæлтæрæнтæ куы райдайынц, уæд. Уымæн æмæ махæн уыдон райдайынц тых æвзарынæй, æмæ уымæ гæсгæ бирæ сывæллон нæ бафæразы фыццаг тренировкæты æмæ ныууадзынц гимнастикæ. Уый, кæй зæгъын æй хъæуы, сывæллонæн йæ удыхъæдимæ баст у, сывæллæттæй иуæй-иутæ разынынц ахæм фидар удыхъæдимæ, кæцытæ фыццаг бонæй фæстæмæ февдисынц хорз æнтыстытæ, – загъта Цхуырбаты Земæ.
Банысан кæнын хъæуы уый, æмæ ацы спорты хуыз нæ республикæйы нырма æвзонг кæй у. Фæлæ, уымæ нæ кæсгæйæ, аивадон æмæ эстетикон гимнастикæйы архайæг сывæллæттæ хайад райсынц алыгъуызон ерысты, цыран бацахсынц призон бынæттæ, афтæ ма хайад райсынц Алина Кабаевайы номыл дунеон фестивалы дæр. Уымæ гæсгæ æппæт ацы ерысты уæлахизтæ баст сты, фыццаджыдæр, хъомылгæнинæгты цы тренертæ бацæттæ кæнынц, уыдонимæ æмæ уыдон та, Земæйы ныхæстæм гæсгæ, нæ хæлæг кæнынц сæ зонындзинæдтæ ахуыргæнинæгтæн.
Нæ уацх.
Comments are closed, but trackbacks and pingbacks are open.