Волгограды, Мамаев курганы 5 майы байгом уыдзæн цырт, ирыстойнæгтæй Сталинграды хæсты чи фæмард, уыдонæн. Уый тыххæй фехъусын кодтой Цæгат Ирыстоны Сæргълæууæджы пресс-центры.

«Мамаев курганы ныр ис цалдæр ахæм цырты. Уыдон æвæрд æрцыдысты, УФ-йы алы регионтæй рацæуджытæй Сталинграды цур чи фæмард, уыдонæн. Бæстон бæлвырд нæу, фæлæ Сталинграды цур хæсты фæмард Цæгат æмæ Хуссар Ирыстонæй рацæугæтæй 5 мин адæймаджы бæрц», — загътой пресс-службæйы.

Цырты бындур сси æрыгон архитектор Цуциты Æхсæртæджы проект. Уый конд у дыууæ æмбисхайæ Стыр Фыдыбæстæйон хæсты орден æмæ Цæгат Ирыстоны гербы хуызы. Афтæ ма цыртыл ис уырыссаг æмæ ирон æвзагыл фыстытæ.

Пресс-службæйы куыд банысан кодтой, афтæмæй Волгограды ирон æхсæнад «Алани», Волгограды областы хицауадимæ ныхасгæнгæйæ, райстой бар ацы стеллæ сæвæрыны тыххæй æмæ равзæрстой бынат мемориалон комплексы.

Цырт сæвæрыны проект сæххæст кæнынмæ сæ хайбавæрд бахастой Цæгат Ирыстоны Сæргълæууæг Битарты Вячеслав æмæ республикæйы Сæргълæууæджы æмæ Хицауады администрацийы къухдариуæггæнæг Челæхсаты Рустем.

Comments are closed, but trackbacks and pingbacks are open.