Знон Хуссар Ирыстоны паддзахадон статистикон управленийы органтæ банысан кодтой сæ сырæзты сæдæазон юбилей.
Бæстæйы хицауиуæгады ацы рагондæр уагдон ныртæккæ цы куыст кæны, уый тыххæй «Спутник — Хуссар Ирыстон»-ы пресс-центры фæзуатыл информацион фæрæзтæн радзырдта Управленийы къухдариуæггæнæг Тыбылты Инал.
Статистикон бæрæггæнæнтæ æмбырд кæнын æмæ сыл уый фæстæ бакусын æнцон нæу. Министрадтæ, паддзахадон æмæ хисæрмагонд уагдæттæй цы информаци æмбырд цæуы, ууыл бакусы управлени. Статистикон управленийы кусджытæн дæр ис сæхи куысты здæхт æмæ æмбырд кæнынц хыгъдтæ алы уагдæттæй, кæцытæ æрæмных кæнынц æмæ рауадзынц æрвылкварталон бæрæгуат.
Нырттæккæ дæр статуправленийы куыст цæуы ахæм бæрæгуат фæстаг фараст мæйы бæрæггæнæнтимæ рауадзыныл.
Куыд зонæм, афтæмæй 2015 азы Хуссар Ирыстоны территорийыл уыдис цæрджыты иумиаг сфыст. Уыцы бæрæггæнæнтæ сног кæныны фæдыл цы куыст цæуы, уый тыххæй Инал афтæ радзырдта, зæгъгæ, дунейы стандарттæм гæсгæ алы бæстæйы дæр цæрджыты сфыст уадзынц алы дæс азы дæргъы иу хатт.
«Ацы ахсджиаг хъуыддагыл нæ территорийыл бакусдзыстæм 2025 азы. Паддзахадæн уыйбæрц фадæттæ нæй, æмæ уымæй арæхдæр араза цæрджыты сфыст», — банысан кодта уый.
Йæ ныхæстæм гæсгæ, ацы хъуыддагмæ йæхи лæмбынæг бацæттæ кæны управлени. Бацæттæ кæныны процесс йæхæдæг аххæссы дыууæ азы бæрц. Йæ фæстиуджытæ мыхуыр кæныны процесс та бацахсы æрдæг азы бæрц.
Æмбæстæгты гуырынад æмæ мæлынады бæрæггæнæнты фæдыл дзургæйæ, Статуправленийы къухдариуæггæнæг банысан кодта, зæгъгæ, хынцыд цæуы æмбæстæгты æрдзон æмæ механикон æгъдауæй фылдæр кæныны хъуыддаг.
«Æрдзон æгъдауæй æмбæстæгтæ фылдæр кæнынц, гуырынад амæлыны цаутæй фылдæр куы вæййы уæд. Ныртæккæ ахæм æгъдауæй республикæйы цæрджытæ уадиссаг нæ фæфылдæр сты.
Механикон æгъдауæй та цæрджытæ фæфылдæр вæййынц, нæ республикæмæ бирæ адæм куы æрцæуы, уæд. Гъе уыцы рæстæджыты æцæг фæфылдæр вæййынц цæрджытæ. Дæнцæгæн æрхæсдзынæн: ацы аз 1 июлмæ нæ республикæмæ æрцыд 653 адæймаджы, уыдонæй фæстæмæ ацыд æрмæстдæр 55», — банысан кодта уый.
Æгуыст æмбæстæгты нымæцыл дзургæйæ, Хуссар Ирыстоны регистрацигонд сты мины бæрц. Ивгъуыд азимæ абаргæйæ, бæрæг фæкъаддæр уыдоны нымæц дæр.
Уæрæсейы Федерациимæ æмгуыстады уавæртыл дзургæйæ, Тыбылты Инал банысан кодта, зæгъгæ нын æнгом ахастытæ ис æмæ нын стыр æххуыс кæнынц, уæлдайдæр методологийы фадыджы.
Алы уагдон дæр йæ разы æвæры фидæны пълæнттæ. Ацы управленийы дарддæры сæйраг нысан у, статистикон информаци æмбырд кæныны хуызтæ æмæ здæхтытæ фæфылдæр кæнын.
«Фæстаг дæс азы паддзахадон организациты æрбавдисгæ бæрæггæнæнтæм гæсгæ фæзынд статистикон хыгъды 100 ног формæйы», — дзырдта уый.
Паддзахадон Статистикон управлени цы бæрæггæнæнтæ æмбырд кæны, уыдонимæ зонгæ кæныны фадат ис æххæстæй управленийы сайтыл, кæнæ бæрæгуаты руаджы.
Уавæрæй пайдагæнгæйæ управленийы къухдæриуæггæнæг юбилейон арфæтæ ракодта, ацы уагдоны уæхскуæзæй чи фæкуыста, дæргъвæтин азты чи фыдæбон кодта, уыдонæн æмæ абон уыцы фæрнджын куыст чи дарддæр кæны, уыцы æвзонг куыстхъом коллективæн.
КЪÆБУЛТЫ Маринæ
Comments are closed, but trackbacks and pingbacks are open.