11-æм июлы Паддзахадон киноконцертон зал «Чермен»-ы уагъд æрцыд хуызфыссынады аивады I-аг гом фестиваль-конкурс «Дадим шар земной детям!»-ы фæуæлахизуæвджытæн дипломтæ радтыны церемони, кæцы уагъд æрцыд Уæрæсейы Федерацийы сгуыхт нывгæнæг, аивæдты дунеон академийы академик Никас Сафроновы хайадистæй.

Мадзалмæ æрбацыдысты бæрзонд уазджытæ — Уæрæсейы Федерацийы РХИ-йы æххæстбарджын минæвар Гасситы Знауыр, Республикæ Никарагуа æмæ Боливариаг Республикæ Венесуэлæйы РХИ-йы æххæстбарджын минæвар Козаты Нариман, Уæрæсе æмæ Хуссар Ирыстоны Никарагуайы минæвар Хуан Эрнесто Васкес Арайя, Уæрæсейы Федерацийы Никарагуайы минæварады фыццаг секретарь Альба Торрес, Уæрæсейы Федерацийы Боливариаг Республикæ Венесуэлæйы хъуыддæгты   рæстæгмæ бæрнджын  Альваро Энрике Санчес Кордеро, сфæлдыстадон интеллигенцийы æмæ æхсæнады минæвæрттæ.

Мадзал бацæуæн ныхасæй байгом кодта РХИ-йы Культурæйы министрады хуызфыссынады аивады фæдыл сæйраг специалист Цхуырбаты Джульеттæ. Уый раарфæ кодта мадзалмæ æрбацæуæг уазджытæ æмæ æппæт хайадисджытæн:

«Зынаргъ уазджытæ! Культурæйы министрады номæй мæ стыр бузныг зæгъын фæнды, абон ма-дзалы хайад чи исы, уыдонæн. Стыр куыст бакодта Мæскуыйы нæ минæварад ацы равдыст сорганизаци кæныны тыххæй. Сæрмагондæй мæ стыр бузныг зæгъын фæнды Уæрæсейы Федерацийы РХИ-йы æххæстбарджын минæвар Гасситы Зна-уырæн, уæлдай хъусдард аивады архайджытæм кæй здахы, афтæ ма РХИ-йы Культурæйы министрады программæтæ реализаци кæнынæн кæй æххуыс кæны, уый тыххæй. Ацы аз цхинвайлаг сывæллæттæ хайад райстой равдыст-проект «Дадим шар земной детям!»-ы æмæ дзы бацахстой призон бынæттæ. Равдысты куратор зынгæ нывгæнæг Никас Сафроновы номæй зæрдылдарæн лæвæрттæ æмæ дипломтæ лæвæрд æрцыдысты равдысты уæлахиздзаутæ æмæ хайадисджытæн — Цхинвалы нывгæнæн скъолайы ахуыргæнинаг Æлборты Аслан æмæ сывæллæтты цæхæрадон «Золотой ключик»-ы хъомылгæнинаг Къæбулты Елизаветæйæн, афтæ ма нывгæнæн ахуыргæнæндоны ахуыргæнæг Сабанты Анжелæйæн.

«Стыр бузныг, нæ сывæллæттыл нын кæй аудут æмæ сын сæ куыстæн кæй саргъ кодтат. Афтæ ма мæ сæрмагондæй бузныджы ныхæстæ зæгъын фæнды, УФ-йы РХИ-йы минæвар Гасситы Знауырæн. Ныфс мæ ис æмæ уын дарддæр дæр кæй рухс кæндзыстæм уæ зæрдæтæ нæ сы-вæллæтты  аивадон  курдиатæй», — загъта сывæллæтты нывгæнæн скъолайы ахуыргæнæг Сабанты Анжелæ.

Уазджытæн ма бузныджы ныхæстæ загъта сывæллæтты нывгæнæн скъолайы директор Æлборты Æхсæртæг: «Стыр бузныг уын зæгъын кæй нæм æрцыдыстут ахæм дард фæндагыл. Сымах базонгæ уыдзыстут нæ Райгуырæн бæстæйы алы къуымимæ дæр. Стыр бузныг мæ зæгъын фæнды нæ минæварадæн æмæ Никас Сафроновæн, кæцы махæн фадат радта, цæмæй нæ сывæллæттæ фенын кодтаиккой сæ курдиат. Абон сымах цы куыстытæ федтат æмæ фендзыстут Ирыстоны къуымты, уый дзурæг у нæ Культурæйы министрады ахадæн куыстыл нæ сывæллæтты аивадон хъомылады  фæдыл. Уыдонæн ис иттæг хорз уавæртæ, цæмæй рæзой æмæ размæ цæуой канд Хуссар Ирыстоны нæ, фæлæ ма сæ курдиат æвдисой, гæнæн уæвгæйæ, æгас дунейы дæр».

Йæ рады Гасситы Знауыр дæр банысан кодта: «Никарагуа æмæ Венесуэлæйы бæрзонд делегациты визит æвдисæг у хæдбардзинады раст фæндагыл нæ паддзахад кæй лæууы, уымæн. Уый у дарддæры дунеон банымадмæ нæ радон къахдзæф. Алцыдæр культурæйыл цæ-уы. Æз хъуыды кæнын афтæ, ацы равдыст цæвиттон кæй у æндæр бæстæтæн дæр нæ хæдбардзинад банымайыны тыххæй», — банысан кодта уый.

Сæ тематикæмæ гæсгæ куыстытæ уыдысты алыгъуызон æмæ уымæй сæхимæ здæхтой уырдæм бацæуджыты хъусдард. Куыстыты ‘хсæн уыд Уæрæсе æмæ Хуссар Ирыстоны стыр хæлар, Венесуэлæйы раздæры президент Уго Чавесы царды фæндагыл дзурæг стыр фотогаллерея, кæцы бирæ сарæзта йæ адæмæн. «Абон ацы стенды централон фигурæ Уго Чавес кæй у, ууыл бирæ дзурæн ис. Ам сты йæ сабион бонты æмæ уый фæстæ ист къамтæ дæр. Мах стыр аргъ кæнæм нæ бæстæйы паддзахаддзинад сфидар кæныны йæ хайбавæрдæн. Чавес тох кодта сабырдзинад æмæ стабилондзинадыл æмæ ацы стендты дæр дзырд цæуы ууыл», — загъта Альваро Санчес Кордеро. Уынаффæгæнæг минæвар ма банысан кодта равдысты хæларадон æмæ хъарм атмосферæ. Йæ ныхæстæм гæсгæ Ирыстон у диссаджы бæстæ, цыран адæм сты æргом æмæ хæларзæрдæ. Нæ дыууæ бæстæты адæм дæр тох кæнынц сабырдзинады сæрыл.

 

ФОТОРАВДЫСТЫ ПРЕЗЕНТАЦИ

Дыккаг бон та киноконцертон зал «Чермен»-ы уыд фоторавдысты пре-зентаци. Уым æвдыст æрцыдысты къамисджытæ Саулохты Тамарæ, Цыбырты Алексей, Уалыты Зарæ, афтæ ма курдиатджын нывгæнæг-скульптор Кæсæбиты Андрейы куыстытæ. Равдыст «В поисках Фарна»-мæ бацæуджытæ зонгæ кодтой Латинаг Америкæйы континенты дард бæстæты цардимæ, куыд зæгъæм, Перу, Никарагуа, Венесуэла. Фæлæ уыимæ уазджытæ стыр цымыдисимæ кастысты уæлдæр ранымад къамисджыты куыстытæм. Стыр цымыдисдзинад сæхимæ здæхтой Цыбырты Алексейы куыстытæ, кæцытæ систы Перумæ йæ балцы фæстиуæг. Райдайгæ фотонграф Цыбырты Алексей æнцонæмбарæн аивадон фæрæзтæй равдыста Латинаг Америкæйы бæстæты фæлгондз. «Аст азы дæргъы æз цыдтæн Перумæ æмæ æрмæстдæр фæстаг æртæ-цыппар азы райдыдтон нывтæ исын. Ацы бæстæйы алцыдæр мæ зæрдæмæ цæуы æмæ мæм алы къам дæр æвзæрын кæны ассоциаци бæрæг бынатимæ. Æмбæрстгонд у, уый æндæр дуне кæй у, фæлæ уæддæр адæм алы ран дæр иугъуызæттæ сты», — загъта Цыбырты Алексей.

Чертхъоты Ж.

Comments are closed, but trackbacks and pingbacks are open.