Ис ахӕм кусӕн уагдӕттӕ, ӕрмӕст сылгоймӕгтӕ кӕм фӕллой кӕнынц ӕмӕ аккагӕй кӕм лæггад кӕнынц ӕхсӕнадæн, сӕ хайбавӕрд кӕй хӕссынц ӕмбӕстӕгты царды хæрзвадатмæ. Ӕнӕдызӕрдыгӕй зӕгъӕн ис, сылгоймаг йе ‘рдзон скондӕй уӕздан кӕй рахаста ӕмӕ уыцы ӕвӕрццаг миниуӕг биноныг кӕнгӕйӕ цард кӕны рӕсугъд ӕмӕ мидисджындӕр. Анахарсисы номыл Хуссар Ирыстоны библиотекӕйы ӕрвылрайсом дӕр сӕ кусӕн бынӕттӕм разӕнгардӕй фӕтындзынц нӕ рӕсугъд ӕмӕ уӕздан, сӕ хъуыддаджы дӕсны ӕмӕ ӕнувыд сылгоймаг – кусджытӕ. О, сылгоймӕгтӕ сты уарзон бинонты хъӕрмуддзинад тауджытӕ,хорз ныййарджытӕ, кӕстӕрты аккаг хъомылгӕнджытӕ, ӕрвылбонон куыст ӕмӕ фӕрныгадыл чи фӕтыхсы, ахӕмтӕ. Уыцы ӕрвылбонон аудинӕгтӕ куы ӕрнывыл кӕнынц сӕ хӕдзӕртты, уӕд та рӕстӕгыл балӕууынц сӕ уагдоны къӕсӕрӕй. Ам ӕндӕр у сӕ фӕллойадон архайд, зонынц ӕй, чиныгкӕсӕгмӕ мидбыл-худтимӕ куы сӕмбӕлай, ӕрмӕст уый дӕр лӕггад кӕй у. Уый фӕстӕ та сын ӕнӕ-къуылымпыйӕ сӕххӕст кӕнынц сӕ домӕнтӕ.

Ам ӕдӕппӕт ис 11 хайады, уыцы нымӕцы ирон ӕмӕ уырыссаг хайадтӕ, библиографион, аивадон, периодикӕ, бӕстӕзонӕн, методикон, ӕфснайӕн ӕмӕ ӕн-дӕртӕ. Уыдон иууылдӕр кӕрӕдзиимӕ сты ӕнгом баст ӕмӕ кусынц иу механизмы хуызӕн. Ис дзы литературӕ ӕрмӕстдӕр иугай экземпляртӕ, уыдон ӕрвыст цӕуынц кӕсӕн залмӕ ӕмӕ сӕ кӕсджытӕ пайда кӕнынц бынаты. Уырыссаг ӕмӕ ирон хайадтӕм цы чиныгкӕсджытӕ ӕрбацӕуынц, уыдон та хӕдзӕрттӕм хӕссынц равзӕрстгонд литературӕ.

Библиотекӕйы директорӕй ныр къорд азты намысджынӕй фӕллой кӕны хӕларзӕрдӕ ӕмӕ йӕ хъуыддаджы дӕсны кусӕг Кокойты Валерия. Уымӕн йӕ дӕлбаруӕвӕг кусджытӕм ис уӕздан ахаст, фӕлӕ сӕ уыимӕ иумӕ домы ӕмбӕлон куыст кӕнын дӕр. Раппӕлыд мын методист Харебаты Тинӕ, ирон хайады сӕргълӕууӕг Сланты Заирӕ, Тъехты Ингӕ, Кокойты Фатимӕ, йӕ хӕдивӕг Тедеты Маринӕ, Тасойты Ингӕ ӕмӕ ӕндӕртӕй. Республикӕйы сгуыхт кусджытыл нымад сты Бестауты Иринӕ, Тыбылты Азӕ, Сланты Заирӕ, Тыбылты Лорӕ, Харебаты Галинӕ ӕмӕ Джиоты Софья.

Уагдоны фонд у хъӕздыг алыгъуызон аивадон, къласикон ӕмӕ ӕндӕр литературӕйӕ. Фӕлӕ Кокойты чызг куыд загъта, уымӕ гӕсгӕ сӕм тынг цъус ис ахуыргӕнӕн чингуытӕ, ома журналистикӕйы, стӕй юридикон литературӕ дӕр. Йӕ фӕндон у, цӕмӕй исой ахӕм литературӕ, уымӕн ӕмӕ азӕй азмӕ уыдон кӕнынц ног, закъӕттӕм ивындзинӕдтӕ кӕй бахӕссынц, уымӕ гӕсгӕ. Сӕ активон кӕсджытӕ сӕйраджыдӕр сты студенттӕ, хистӕркъласонтӕ, стӕй куыст ӕмӕ фӕллойы ветерантӕ, хистӕр кары ӕмбӕстӕгтӕ, зонадон кусджытӕ ӕмӕ интеллигенцийы минӕвӕрттӕ. Хайадты сӕргълӕуджытӕ зӕрдиагӕй сӕхи бацӕттӕ кӕнынц бӕрӕгбонон ӕмӕ зӕрдылдарӕн мадзӕлттӕм, поэзийы изӕртӕ, фембӕлдтытӕ фысджытӕ ӕмӕ интеллигенцийы ӕндӕр минӕвӕрттимӕ. Фӕуадзынц ма, патриотон нысаниуӕг кӕмӕн ис, ахӕм мадзӕлттӕ дӕр. Ахӕм фембӕлдтытӕ ӕмӕ изӕрты активон хайад райсынц канд скъоладзаутӕ ӕмӕ студенттӕ нӕ, фӕлӕ фысджытӕ, ныв-гӕнджытӕ, зарӕггӕнджытӕ ӕмӕ уымӕ гӕсгӕ изӕр рауайы ноджы хъӕздыгдӕр ӕмӕ мидисджындӕр.

«Ӕввахс рӕстӕджы нын уыдзӕн биб-лиотекон интернет ӕмӕ уый стыр ахъаз уыдзӕн нӕ куысты размӕцыдӕн, уымӕн ӕмӕ ма нын бастдзинад уыдзӕн Уӕрӕсе ӕмӕ ӕндӕр бӕстӕты библиотекӕтимӕ дӕр. Ӕнгом ӕмӕ хӕлар бастдзинӕдтӕ нын ис Цӕгат Ирыстон ӕмӕ Абхазы республикӕты библиотекӕтимӕ, фӕхонынц нӕ форумтӕ ӕмӕ ӕндӕр ахсджиаг мадзӕлттӕм.

Куыд нӕ республикӕйы сӕйраг библиотекӕйы директор, афтӕ мӕ зӕрдиагӕй раарфӕ кӕнын фӕнды нӕ сылгоймӕгты коллективӕн, уадз ноджыдӕр ӕнӕниз ӕмӕ уӕнгрогӕй лӕуд уӕд сӕ куысты уæлхъус, амондджынӕй ӕрвитӕт сӕ цард сӕ бинонтӕ ӕмӕ сӕ уарзон адӕмимӕ», – зæгъы библиотекæйы директор.

Хуыбиаты Никъала

Comments are closed, but trackbacks and pingbacks are open.