Нæ республикæйы сывæллæтты иу къорд реабилитацийы курс рацыдысты Алагиры Сылгоймæгты алайнаг аргъуаны цур Елизаветæйаг центры. Традицион æгъдауæй сæрдыгон мæйты Сывæллæтты Елизаветæйаг реабилитацион центр йæхимæ райсы, сæ психикон-эмоционалон рæзт кæмæн фехæлы, ахæм сывæллæты. Ацы аз ам реабилитацийы курс рацыдысты 14 сывæллоны. Уыдонимæ уыдысты сæ ныййарджытæ дæр.

Елизаветæйаг центры реабилитацион курс чи цыдысты, уыцы сывæллæттæ тæрккъæвдаты аххосæй чысыл ма бахъæуа æмæ фæиппæрд уой «стыр зæххæй». ИА Рес-æн Сылгоймæгты алайнаг аргъуаны уагæвæрæг игумения Нонна куыд радзырд-та, афтæмæй сывæллæтты цы бон райстой, уыцы бон Фæсалгæрдоны цæугæдон аласта, Елизаветæйаг центры аргъуанмæ чи баста, уыцы хиды.

«Хид у чысыл æмæ цæугæдоны æмвæзад куы сбæрзонд вæййы, уæд йемæ рахæссы бæлæсты бындзæфхæдты, йæ уидæгты. Уыдон сæхгæнынц хиды бынты цы трубæ цæуы, уый æмæ дон йæ сæрты акæлы, йæ разæй алцы дæр хæсгæйæ», — радзырдта аргъуаны уагæвæрæг.

Хуссар Ирыстонæй Уæрæсемæ цы фæндаг цæуы, уымæ хæстæг уæвæг Сылгой-мæгты алайнаг аргъуан ма 2010 азы сæрды бахауд æрдзон æнамонддзинады эпицентры. Уæд донивылды фæстиуæгæн аргъуаны сывæллæтты реабилитацион центримæ чи бæтты, уыцы фæндаг бынтондæр ныппырх. Æндидзæн куыстытæ фесты æнтысгæйæ, аргъуанмæ æввахс территорийыл Фæсалгæрдоны цæугæдоны былтæ фидар æрцыдысты, фæлæ, хъыгагæн, хид нæ рауæрæх кодтой.

«Ныртæккæ тынг хъæуы æххуыс, уæрæхдæр чи уа, ахæм ног хид саразынæн. Æмбарæм æй, уый зынаргъ у, хиды плитæтæ аслам не сты, фæлæ чи зоны искæмæн йæ бон суа баххуыс кæнын. Чи зоны мах иумæ саразæм афтæ, цæмæй Сывæллæтты центр, кæцы æнцойад хæссы æмæ æххуыс кæны нæ сывæллæттæн, дарддæр куса æппæт тыхтæй», — йæ ныхасы кæрон загъта Нонна.

Зæрдыл лæууын кæнæм Сылгоймæгты алайнаг аргъуаны цур хæстыты æмæ конфликтты хъыгдардбаййафæг сывæллæттæн Елизаветæйаг реабилитацион центр кæй у иунæг ахæм æрмæст Цæгат Кавказы нæ, фæлæ æгас Уæрæсейы дæр. Уый архайы 2005 азæй фæстæмæ. Райдианы арæзт æрцыд сæрмагондæй Бæслæны фыццæгæм сколайы теракты рæстæджы хъыгдардбаййафæг сывæллæттæн, фæлæ Хуссар Ирыстоны 2008 азы хæсты фæстæ сывæллæтты исын райдыдтой Хуссарæй дæр. Аст азы куысты рæстæджы центр реабилитацимæ райста фондз мин сывæллонæй фылдæр, уыдоны нымæцы 1500 — Хуссар Ирыстонæй.

Елизаветæйаг центры кусджытæ сывæллæттимæ кусынц сæрмагонд программæйы фæлгæтты, кæцы уагъд цæуы мæскуыйаг психологты æххуысæй. Сменæйы вæййынц сывæллæттæ Цæгат æмæ Хуссар Ирыстонæй сæ ныййарджытимæ.

Банысан кæнын хъæуы, июны кæрон психологтæ Татьяна Ратынская æмæ Дмитри Ермолаев кæй уыдысты Хуссар Ирыстоны æмæ скола-интернаты ауагътой сæрмагонд ахуыртæ сывæллæттæ-ныййарджыты къордтæ æмæ ахуыргæнджытæн. Сæ рæзт кæмæн фæстиат кæны, ахæм сывæллæттимæ кусæг ныййарджытæ æмæ ахуыр-гæнджытæ æнæаргъæй райстой специалистты консультацитæ.

Comments are closed, but trackbacks and pingbacks are open.