Театрдзаутæн – æртæ премьерæйы

Ног азы къæсæрыл нæ республикæйы театралон цард уыдзæнис цымыдисон, хъæздыг.

Хуссар Ирыстоны паддзахадон драмон театры пресс-службæйы нын куыд фехъусын кодтой, уымæ гæсгæ ацы мæйы театры сценæйыл æвдыст æрцæудзысты ногæвæрд спектакльтæ. «Хетæгкаты Къостайы номыл Хуссар Ирыстоны паддзахадон драмон театр йæ гастролон балцы фæстæ æрæвналдзæнис, цы ног спектакльтæ цæттæ кæны, уыдон адæмы рæгъмæ рахæссынмæ. Спектакльтыл куыст цыдис нырмæ дæр æмæ рæхджы уыдонæй фæхъæздыгдæр уыдзæнис театры репертуар. Хуссарирыстойнаг театрдзаутæн уал декабры æмбисты равдисдзысты режиссер Дзуццаты Тамерланы æвæрд комеди «Сæтти æмæ Бæтти». Спектакль хуссарирыстойнаг сценæмæ-кæсджытæн у зындгонд. Йæ рæстæджы спектаклы хъазыдысты нæ зындгонд актертæ Гæбæраты Дауыт æмæ Цæбиты Ростик, уыдон сæ рольтæ афтæ æххæст кодтой æмæ ма абон дæр сæ диссаджы хъазт лæууы адæмы зæрдæтыл. Уыцы рольтæ ма æххæст кодтой нæ театры æндæр артисттæ дæр, кæцытæ сты нæ аивады фидауцтæ æмæ хауынц афтæхуыйнæг «театры сыгъзæрин» плеядæмæ. Ныртæккæ кæй сæвæрдтой, уыцы спектаклы та сæйраг рольты хъазынц Республикæ Хуссар Ирыстоны адæмон артисттæ Уанеты Æхсар æмæ Хаситы Вильгельм. Спектаклы ма архайынц сæ фырттæ дæр –  Уанеты Эдуард æмæ Хаситы Сослан, афтæ ма театры сгуыхт артисткæтæ Джиоты Альмæ æмæ Дыгъуызты Жаннæ.

Дыккаг премьерæ дæр уыдзæнис тынг цымыдисон. Ацы аз нæ республикæйы гениалон поэт, ирон æвзаг æмæ литературæйы бындурæвæрæг Хетæгкаты Къостайы ном кæй арæм, уый сæраппонд нæ театр фæнд кæны Къостайы цард æмæ сфæлдыстадыл спектакль сæвæрынмæ. Йæ æвæрæг режиссер æмæ сценарист та у питераг Роман Габрия, кæцыйы фæхуыдта нæ театры къуъдариуæгад. Роман Габрия уый размæ дæр куыста театры труппæимæ, ис æм нæ актертимæ куысты фæлтæрддзинад, йæ рæстæджы сæвæрдта «Гамлет». Уый тагъд æрæвналдзæнис йæ куыстмæ. Режиссер куыд баныфсæвæрдта, уымæ гæсгæ Къостайы цард æмæ сфæлдыстадыл æвæрд спектакль сценæйыл æвдыст æрцæудзæнис декабры фæудты», – банысан кодтой театры пресс-службæйы.

Уымæй дарддæр ма театр цæттæ кæнынц ног аргъау «Гæды домбай», зæгъгæ, ахæм номимæ, кæцыйы æвæрæг режиссер у Хъотайты Сæрмæт. Æрыгон сценæмæкæсджытæ цæуыл бацин кæной Ног азы къæсæрыл, уый сын уыдзæнис ацы ног аргъау. Спектакль сывæллæттæн æвдыст цæудзæнис ногазон бæрæгбонты рæстæджы дæр.

ЦХУЫРБАТЫ Ларисæ