РХИ-йы Хицауады Сæрдары фыццаг хæдивæг Тъехты Аланы къухдариуæгадæй ауагъд æрцыд æмбырд республикон министрадтæ æмæ ведомствоты разамонджыты хайадистæй.

Æмбырды сæйрагдæр темæтæ уыдысты гриппæй æмæ карз респираторон вирусон инфекцийæ фæрынчынимæ, паддзахадон бюджет нæ райсынимæ баст ситуацитыл, афтæ ма аивгъуыйгæ азæн æххæсткæнынадон хицауиуæгады органты структурон дæлхæйттæ хыгъд дæттынмæ цæттæдзинад æмæ архайд планкæнынадимæ.

Æрæмбырдуæвджытæн аивгъуыйгæ бæрæгбонты сæраппонд раарфæ кæнгæйæ Тъехты Алан æрсидт, цæмæй æппæт тыхтæ дæр мобилизаци æрцæуой æмæ æрбалæугæ азы æрæвналдæуа дывæр тыхтимæ æмæ бæрндзинадимæ хæстæ æххæст кæнынмæ.

«2016 азæн Инвестпрограммæйы сæйрагдæр мадзæлттæ фесты, фæугæ та фæкодтой æнтысгæйæ, — банысан кодта Тъехты Алан, зæрдыл æрлæууын кæнгæйæ, зæгъгæ, хицауады æмæ республикæйы куыстæн, иумæйагæй сисгæйæ, стыр аргъ скодтой уæрæсейаг коллегæтæ Æхсæнхицауадон къамисы фæстаг рабадты. — 2017 азæн плæнттæ зындгонд сты, ныр дырысæй æрбæстон хъæуы республикæйы социалон-экономикон рæзтæн 2018 æмæ 2019 азтæн иууыл ахсджиагдæр хæстæ, афтæ ма сæрмагонд хъусдард аздахын хъæуы хисæрмагонд æфтиæгты хай республикæйы бюджеты фæфылдæр кæнынмæ, уымæн æмæ Инвестпрограммæйы фæлгæтты арæзтæрцæуæг объектты æнтысгæ архайдæн цъус фæрæзтæ нæ хъæуы».

Хицауады Сæрдары фыццаг хæдивæг банысан кодта, зæгъгæ, æрбалæугæ азы экономикæйы реалон секторы рæзты фарстытæ скъуыддзаг цæудзысты приоритетондæртимæ иумæ.

Дарддæр уый хъусдард аздæхта грипп æмæ карз респираторон вирусон инфекцийы профилактикæ кæныны фарстытæм æмæ ныхасы бар радта Æнæниздзинад хъахъхъæныны æмæ социалон рæзты министр Григори Кулиджановæн.

Докладгæнæджы информацимæ гæсгæ ивгъуыд азы декабры мæймæ грипп æмæ карз респираторон вирусон инфекцийæ рынчынтæ æмбæлон бæрцæй уыдысты фылдæр, фæлæ æрбалæугæ улæфтыты рæстæджы паддзахадон уагдæтты карантин нæ расидтæуыд.

«Республикæйы æппæт медицинон уагдæттæм æрвыст æрцыдысты æмбæлон бардзырдтæ профилактикон мадзæлттæ сифтонг кæныны фæдыл, — банысан кодта Григори Кулиджанов.  Ногазон улæфтбонты рæстæджы уыдоны радгæс уыдысты дохтыртæ, уый тыххæй хъусын чындæуыд дзыллон информацийы фæрæзты. Фæлæ адæм цæмæдæр гæсгæ цыдысты республикон рынчындонмæ. Мах дарддæр нæ хъус дарæм ситуацимæ æмæ æмбырд кæнæм статистикон зонæнтæ, кæд æмæ ахæм рынчынты нымæц фæфылдæр уа, уæд æвæстиатæй райсдзыстæм мадзæлттæ. Бафиппайдзынæн уый æмæ республикæйы аптекон хызæг æмæ медицинон уагдæттæ ифтонг кæй сты æппæт æнæмæнгхъæуæг хостæй».

Тъехты Алан министрадæн бахæс кодта, цæмæй мониторинг ауадза фельдшерон-акушерон пунктты куысты фæдыл дæр æмæ ифтонг кæна сæ нормалон куыст.

«Саразын хъæуы æппæт дæр, цæмæй гриппы сезонон сытынгдзинад ма рахиза эпидемимæ», — банысан кодта уый.

Æмбырды рæстæджы ма дзырд цыд 2017 азы паддзахадон бюджетыл, кæцыйы проекты аиуварс кодта республикæйы Парламент.

«Мах бахъуыд ног азмæ бахизын æнæсфидаргонд бюджетимæ æмæ уый та баст у бæрæг зындзинæдтимæ, — банысан кодта Финансты министр Хæбæлаты Азæ.  Бюджет кæй нæй, уый нынт аразын кæны ахæм куысты режим, кæцыйы паддзахадон уагдæттæ архайдзысты, æрмæстдæр сноггонд æрвылмæйон бадзырдтæ арæзт куы уой, уæд. Зындгонд у, хъуыддæгты ахæм уавæр кæй бандавдзæн финанскæнынады механизмтыл…».

Министры ныхæстæм гæсгæ кæд æмæ бюджет æввахсдæр мæйты фидар не ‘рцæуа, уæд гæнæн ис баззайæм æнæ субсидитæ æмæ паддзахадон æххуысæй.

Тъехты Алан куыд банысан кодта, афтæмæй ныртæккæ паддзахадон бюджеты фæдыл фарстытыл дзырд цæуы Парламентимæ иумæ æмæ ныфс ис, уыдон скъуыддзаг кæй æрцæудзысты паддзахадон разамындæн æнæ зынгæ фæстиуджытимæ.

Дарддæр уынаффæ цыд æххæсткæнынадон хицауиуæгады органты архайд план кæныны æмæ 2016 азæн ведомствæйон хыгъдтæ бацæттæ кæныны фарстытыл.

РХИ-йы Президент æмæ Хицауады пресс-службæ

Comments are closed, but trackbacks and pingbacks are open.