«Спутник-Хуссар Ирыстоны» пресс-центры ауагъдæрцæуæг пресс-конференцийы фæлгæтты Хуссар Ирыстоны Æнæниздзинад хъахъхъæныны министр  Тотчиты Георги радзырдта, афæдзы дæргъы æнæниздзинад хъахъхъæныны фадыджы арæзт цы æрцыд æмæ дзы цы проблемæтæ ис, уыдоны тыххæй.

Уый куыд банысан кодта, афтæмæй медицинон æмæхсæнады ис кадрон дефицит. Кæй зæгъын æй хъæуы, уый фæстиуæгæн квалификациджын медицинон æххуыс  бакæныны хъуыддаджы вæййы проблемæтæ. Уымæн æмæ медицинон уагдæттæ кæд ифтонг сты медицинон ифтонггæрзтæй, уæддæр хъуагдзинад æййафынц квалификациджын специалисттæй.

«Абоны бон иу къорд здæхтыты дохтырты профессионалон цæттæдзинад у хуыздæрхъуаг. Дохтырты нымæц æгæронæй куы фылдæр кæна, фæлæ æххуысы гъæд та лæмæгъ куы уа, уый раст нæу. Уый фæстиуæгæн мах бынаты хъуамæ уадзæм ахæм мадзæлттæ, кæцыты фæстиуæгæн цыбыр æмгъуыдмæ фæбæрзонддæр уыдзæн дохтырты квалификаци», – банысан кодта министр.

Тотчиты Георгийы ныхæстæм гæсгæ, уавæр чи æрнывыл кæна æмæ  Хуссар Ирыстоны æнæниздзинад хъахъхъæныны системæйы раз цы фарстатæ ис, уыдонæй сæ сæйрагдæрты аскъуыддзаг кæнынæн чи фæахъаз уыдзæн, ахæм плантæ министрадмæ бирæ  ис.

«Мах нæ разы хæс æрæвæрдтам æнæниздзинад хъахъхъæныны националон системæйы рæзты тыххæй, кæцыйы руаджы нæ медицинæ кæд конкурентхъом  нæ уа, уæддæр, æввахс паддзахадты медицинæимæ абаргæйæ, схиздзæн æмбæлон æмвæзадмæ. Алы адæймагæн дæр фадат уыдзæн, модернизацийы фæлгæтты цы ивындзинæдтæ хаст æрцæудзысты, уыдон фенынæн. Ивындзинæдтæ та æрцæудзысты  хуыздæрæрдæм», – загъта Тотчиты Георги æмæ ма йæ ныхасмæ бафтыдта, зæгъгæ, нын республикæйы къухдариуæгад нæ разы цы бæрзонд хæслæвæрдтæ æрæвæрдта, уыдон мах скъуыддзаг кæнæм æмбæлон æмвæзадыл.

Министр куыд загъта, афтæмæй 2017 азы нысаниуæг-джын цаутæй иу уыд,  Хуссар Ирыстоны Æнæниздзинад хъахъхъæнын æмæ социалон рæзты æмæ Уæрæсейы Федерацийы Æнæниздзинад хъахъхъæныны министрадты ‘хсæн сразыдзинад арæзт кæй æрцыд, уыцы хъуыддаг. Ацы сразыдзинады фæрцы республикæйы цæрджытæ исдзысты квалификацион медицинон æххуыс. Уымæй дарддæр ма фидæн аз куыст цæудзæн, цалдæр мæйы дæргъы цы фарстатыл цæуы уынаффæ, уыдон реализацийыл. Уыцы фарстатæ ныридæгæн сты цæттæ æмæ  ног азы бавдыст æрцæудзысты Парламентмæ, цæмæй фидар æрцæуой, уый тыххæй. Уымæй дарддæр фидæн аз  Æнæниздзинад хъахъхъæныны министрад кусдзæн алы здæхтыты. Уыцы здæхтытæй сæ иу у хъомысджын амбулаторон æххуыс, кæцы фæахъаз уыдзæн æнæниздзинад хъахъхъæныны сæйраг хæслæвæрдтæ аскъуыддзаг кæнынæн. Министры ныхæстæм гæсгæ,  иннæ здæхт та у дохтырты ахуыргæнæн программæты реализаци. Уæрæсейæ Хуссар Ирыстонмæ æрцæуынц цæттæ, фæлтæрд специалисттæ, кæцытæ цæттæ сты сæ хуссарирыстойнаг специалисттæн баххуыс кæ-нынмæ.

Уæрæсе æмæ Хуссар Ирыстоны медицинон ведомствоты  ‘хсæн цы сразыдзинад æрцыд арæзт, уый фæстиуæгæн райст æрцæудзæн программæ, кæцы фæахъаз уыдзæн кусæн бынаты дохтырты квалификаци фæбæрзонддæр кæнынæн. Уымæн æмæ ног технологитæ æмæ практикон ногдзинæдтæ базонынæн хуыздæр у  кусæн  бынаты сæ сахуыр кæнын. Ацы методикæйæ пайда кæнынц дунейы бæстæтæ.

«Махмæ бирæ специалисттæ æрцæуынц  ахæм программæтимæ, кæцытæ ахъаз сты цыбыр рæстæгмæ дохтырты ахуырады æмвæзад фæбæрзонддæр кæнынæн, иу кæнæ иннæ ногдзинæдты, уыцы нымæцы медицинон æххуыс бакæныны фæдыл сын сæ компетенци фæхуыздæр кæнынæн», – загъта Тотчиты Георги.

Министр ма банысан кодта, зæгъгæ, цæрджыты æрдыгæй медицинон кусджытæм цы негативон ахаст ис, уый раст нæу.

«Хъыг вæййы, медицинон кусджыты ныхмæ цæрджытæ куы фæдзурынц, уæд. Махмæ тынг хорз кадртæ ис, уыдон сты сæ хъуыддаджы специалисттæ æмæ профессионалтæ. Кæй зæгъын æй хъæуы, алы куысты дæр вæййы ахæм адæймæгтæ, кæцытæ æмбæлонæй не ’ххæст кæнынц сæ хæслæвæрдтæ. Уый тыххæй нæ хæс у кадртæм лæмбынæг æркæсын, æмæ ног хæслæвæрдтæм цæттæ чи нæу, хиуыл кусын кæй нæ фæнды æмæ медицинон лæггæдты гъæд фæхуыздæр кæныныл чи нæ архайы,  уыцы адæймæгты сбæрæг кæнын», – бахахх кодта министр.

Уый ма радзырдта, медицинæйы фадыджы цы дæсныйадтæ хъæуы, уыдоны бæсты ахуырмæ æрвыст кæй æрцæуынц æндæр дæсныйадтæ сахуыр кæнынмæ. Цæмæй уыцы хъуыддаг рараст уа, уый тыххæй та хъæуы, æрмæстдæр республикæйæн хъæуæг специалисттæ бацæттæ кæнын.

«Кадрон резерв баххæст кæныны тыххæй дæсныйадты номхыгъд  ныридæгæн арæзт у. Ацы номхыгъдмæ гæсгæ лæвæрд цæудзысты квотатæ дæр. Мах фыццаджы фыццаг æрдомдзыстæм, цы дæсныйадтæ нæ хъæуы, уыдоны тыххæй квотатæ. Æз мæхæдæг мæ хъус дардзынæн уыцы фарстмæ æмæ иу адæймаг дæр нал арвитдзыстæм стоматолоджы дæсныйад райсынмæ, уымæн æмæ нæм ныртæккæ тынг бирæ стоматологтæ ис. Ныридæгæн уал нæм куыстмæ рады лæууы 30-æй фылдæр стоматолоджы, уымæй дæр алы аз дæр æрцæуынц ногтæ», – загъта министр.

Осиаты Индирæ

Comments are closed, but trackbacks and pingbacks are open.