Уæрæсейаг фæлтæрд журналист, æхсæнадæмон информацион агентад «Россия сегодня»-йы ахуырадон программæйы къухдариуæггæнæг Олег Щедров нæ республикæйы журналисттæн 8 сентябры ауагъта иубонон тренингтæ. Олег Щедров 30 азæй фылдæр кусы журналистикæйы фадыджы æмæ йæ куысты фæлтæрддзинад дих кодта йæ коллегæтæн. Уый каст фæцис М. Ломоносовы номыл Мæскуыйы паддзахадон университеты Ази æмæ Африкæйы бæстæты институты социалон-экономикон фа-культет. Университет каст фæуыны фæстæ куыста радиойы информацион хайады редакторæй, кæцы фæсарæнтæм лæвæрдта информаци Советон Цæдисы рæстæджы æппæт æрцæугæ хабæртты фæдыл.

1991-1992 азты январæй куыста информацион агентад «Интерфакс»-ы æмæ ныртæккæ та кусы РИА «Новости»-йы.

Тренингтæ журналисттæн Олег Щедров ауагъта Информаци æмæ мыхуыры паддзахадон комитеты пресс-центры. Ардæм æрбацыдысты æмæ тренингтæм байхъуыстой бынæттон журналисттæн сæ фылдæр, афтæ ма Тыбылты Алыксандры номыл Хуссар Ирыстоны университеты журналистикæйы факультеты студенттæ дæр.

Тренингты сæрмагондæй дзырд цыдис, зæгъгæ, куыд растдæр хъуамæ фыст цæуа, журналист цы информаци хæссы адæмы размæ, уый.  Ног æрцæугæ хабар куыд цымыдисондæр уа, адæймаджы  куыд «раздаха» йæхимæ, уыдæттыл æрдзырдта фæлтæрд журналист. Олег Щедров йæ тренингты рæстæджы фылдæр хаста цæвиттонтæ æмæ уыдон руаджы бæлвырддæр æмæ хуыздæр æмбæрстгонд цыдис темæ. Цæмæй адæм информаци кæсгæйæ исой æхцондзинад, уый тыххæй журналистикæйæн ис йæхи спецификæ, йæхи авналæнтæ æмæ фадæттæ. Уыдæттæ Олег Щедров схемæты руаджы æвдыста фæйнæгыл. Кæй зæгъын æй хъæуы, журналисттæн ацы иубонон тренингтæ уыдысты цымыдисон æмæ æнæмæнг-хъæуæг, цы зонындзинæдтæ райстой, уыдон сын фæахъаз уыдзысты сæ дарддæры куысты.

Цхуырбаты Ларисæ

Comments are closed, but trackbacks and pingbacks are open.