Нæ республикæйы журналисттæн уагъд цæуынц æртæбонон тренингтæ Республикæ Хуссар Ирыстоны Информаци æмæ мыхуыры паддзахадон комитеты пресс-центры. Уыдон организацигонд æрцыдысты ацы комитеты сæрдар Хъотайты Марияйы инициативæмæ гæсгæ. Тренингтæ бынæттон журналисттæн уадзы не ʻмзæххон чызг, фæлтæрд журналисткæ, уæрæсейаг фæсивæдон бархион змæлд «Данилонтæ»-йы сайты редактор Пæррæстаты Ланæ. Уый кусы Мæскуыйы æмæ нын куыд загъта, афтæмæй ацы организацийы ныр дыккæгæм хатт банымадтой Уæрæсейы иууыл хуыздæр волонтерон организацийыл æмæ та ацы аз дæр дыккаг хатт райста президентон грант социалон волонтерон архайд райтынг кæныны тыххæй.

Уæрæсейаг фæсивæдон бархион змæлд «Данилонтæ», зæгъгæ, у æхсæнадон организаци, кæцы 2008-æм азæй фæстæмæ æдзух организаци кæны волонтерон къорды даргърæстæгон æмæ регулярон куыст рынчындæтты æмæ сидзæрты уагдæтты, афтæ ма кусы инвалидтимæ, бирæсывæллонджын бинонтимæ, зæрæдтимæ, æнæхæдзар адæймæгтимæ æмæ ахæсттимæ. Ацы организацийы Пæррæстаты Ланæ кусы ныр цалдæр азы æмæ йын ис стыр фæлтæрддзинад информацион фадыг райтынг кæныны хъуыддаджы. Уымæ гæсгæ уыцы фæлтæрддзинад дæр дих кæны йе ʻмзæххон журналисттимæ. Тренингты хайад райстой бынæттон журналисттæн сæ фылдæр. Уыдон лæмбынæг байхъуыстой нырма программæйы фыццаг темæмæ,  зæгъгæ,  куыд растдæр хъуамæ фыст æрцæуа ног æрцæугæ хабар. Тренингы иннæ темæтæ та сты интервью æмæ очеркы фæдыл ныхас,ома, сæ куыд растдæр хъæуы фыссын.

Дзыллон информацийы фæрæзтæн сæ тыхтæ æмæ авналæнтæ егъау сты. Бæрæг куыд у, афтæмæй уымæн стыр ахъаз у техникон размæцыды хъуыддаг. Интернеты руаджы адæймагæн йæ бон у æмæ æппæт информаци дæр райса. Уыцы æрæмбырдгонд æмæ бакуыстгонд информаци та адæмы рæгъмæ хæссынц журналисттæ. Кæй зæгъын æй хъæуы, уыдон æппæт дунемæ хъуамæ афоныл хæццæ кæной раст информаци, адæм æй куыд хуыздæр бамбарой, ахæм æнцон æвзагыл фыстæй. Цæмæй афтæ уа æмæ адæм информаци кæсгæйæ исой æхцондзинад æмæ сæм æвзæра цымыдисдзинад, уый тыххæй журналистикæйы фадыджы ис йæхи авналæнтæ, зонæнтæ. Профессионалон журналист та уыцы бæрндзинад хатгæйæ хъуамæ зона уыцы фæткойтæ. Кæд журналисттæ уæлдæр ахуыргæнæндæтты райсынц уыцы зонындзинæдтæ лекциты рæстæджы, уæддæр дзыллон информацийы фæрæзты кусгæйæ, уыдонæй арæх, цæмæдæр гæсгæ, айрох вæййынц уыцы фæткойтæ æмæ æруадзынц рæдыдтытæ информаци раст адæттыны хъуыддаджы. Кæй зæгъын æй хъæуы, журналисты куыст хъуамæ цæуа бæрзонд æмвæзадыл æмæ уымæн та ис йæхи профессионалон цæттæдзинады фæткойтæ, кæцыты зæрдыл æрлæууын кæнынц тренингты руаджы. Нырыккон дуджы журналист хъуамæ зона, куыд хуыздæр хъæуы кусын æмæ куыд растдæр хæсса адæмы размæ информаци, уый.

«Арæх фенæн вæййы газетты æмæ бынæттон сайтты информацион хъусынгæнинæгты кæнæ ног хабæртты, сæйраг хъуыды æмбæхст кæй æрцæуы, ома, йæ ныффыссынц хъусынгæнинагæн йæ кæрон. Сайт æмæ газеткæсджыты уæд бахъæуы рæнхъыты æхсæн ног хабары сæйрагдæр хъуыды агурыны сæр. Уый та ууыл дзурæг у æмæ хъусынгæнинаджы сæйраг хъуыды загъд кæй не ʻрцæуы, ома, хаст кæй не ‘рцæуы текстмæ. Хъуамæ адæймаг йæхиуыл куса æмæ рæза, куыд профессионал, афтæ. Æгæрыстæмæй ма раззагон информацийы фæрæзтæ дæр ссарынц фадæттæ бæрзонддæр æмвæзадмæ схизынæн. Хуссарирыстойнаг дзыллон информацийы фæрæзты дæр хъæуы рæзын. Хорз уаид, фылдæр нæ журналисттæ куы фыссиккой удджындæр æвзагыл æмæ фылдæр цымыдисдзинад сæхимæ куы здахиккой. Кæй зæгъын æй хъæуы, бафæрсæм хорз фыст уацтæ дæр, фæлæ нæ уæддæр хъæуы рæзын.  “Ацы тренингтæм цы программæ бахастон, уый дæр у тынг æнæмæнгхъæуæг алкæцы журналистæн дæр æмæ дзы алчидæр йæхицæн райсдзæн, йæ куыстæн æй цы хъæуы, уый”, — банысан кодта тренингтæ уадзæг.

Ацы тренингтæ кæд æртæ бон йедтæмæ уагъд нæ цæудзысты, уæддæр йæ райдианæй бæрæг у, дæсны специалистæн кæй бантысдзæн журналистты сæ профессийы нырыккон домындзинæдтимæ хуыздæр базонгæ кæнын.

Цхуырбаты Л.

Comments are closed, but trackbacks and pingbacks are open.