Президент Тыбылты Леонид Хæдбар Паддзахадты æмхæларад, Абхаз æмæ Хуссар Ирыстонимæ социалон-экономикон æмгуыстады фæдыл Уæрæсейы Федерацийы Президенты Управленийы хистæримæ иумæ инспекцийы хуызы бабæрæг кодтой Цхинвалы дзулфыцæн комбинат æмæ Хетæгкаты Къостайы номыл Паддзахадон драмон театры арæзтадон куыстытæ.
Мадзалы ма хайад райстой Хицауады Сæрдар Хъуылымбегты Доменти, Арæзтады, архитектурæйы æмæ цæрæнуатон-коммуналон хæдзарады министр Зæгъойты Эдуард, Культурæйы министр Остъаты Мадинæ, Хæдбар Паддзахадты æмхæларад, Абхаз æмæ Хуссар Ирыстонимæ социалон-экономикон æмгуыстады фæдыл Уæрæсейы Федерацийы Президенты Управленийы хистæры хæдивæг Денис Травин.
Дыууæ объект дæр арæзт æрцыдысты Республикæ Хуссар Ирыстоны социалон-экономикон рæзтæн ахъазгæнæг 2015-2017 азты Инвестицион программæйы фæлгæтты æмæ æввахс рæстæджы хъуамæ лæвæрд æрцæуой эксплуатацимæ.
Дзулфыцæн комбинаты директор Цхуырбаты Вадим банысан кодта, зæгъгæ, бæстыхай у фæуынхъус æмæ эксплуатацимæ раттынмæ цæттæ. Æрбаластæуыд, нырыккон домæнтæн дзуапп чи дæтты, ахæм ног технологион ифтонгад дзул æмæ адджинæгтæ фыцынæн.
Хицауады Сæрдар Хъуылымбегты Доменти фехъусын кодта, зæгъгæ, объекты цæуы фæстаг цухдзинæдтæ аиуварс кæныны куыстытæ, бæстонгонд цæуы æмбæлон документаци, æмæ уый фæстæ объект лæвæрд æрцæудзæн эксплуатацимæ марты фæудмæ.
Азылды хайадисджытæ ацаходыдтой, ног ифтонггæрзтыл арæзт дзулы æмæ адджинæгты цæттæ продукцийæ. Цхуырбаты Вадим банысан кодта, зæгъгæ, ног бæстыхай нырыккон ифтонггæрзтимæ ратдзæн продукци уадзыны процесстæ фæхуыздæр кæныны, йæ гуырахст æмæ йын йæ ассортимент фæфылдæр кæныны фадат.
«Абон мах уадзæм 50-мæ æввахс алыгъуызон адджинæгтæ. Ног дзулфыцæн куы скуса, уæд уыдон ноджы фæфылдæр уыдзысты. Ахсджиаг ма у, республикæйы адджын гуылтæ кæй никуы кæнынц. Махмæ та ис ахæм машинæтæ, æмæ нæ бон уыдзæн цыфæндыгъуызон адджын гуылтæ кæнын дæр. Ныртæккæ та сæ ласæм Ростов, Кранснодар æмæ Налцыккæй. Мах раиртæстмæ гæсгæ Республикæйы дзулæй адджинæгтæ фылдæр уæй цæуы», – загъта уый.
Кæронбæттæны Цхуырбаты Вадим банысан кодта, зæгъгæ, дзулфыцæны байгом кæныны цытæн конд æрцæудзæн æппæты стырдæр ирон уæливых, йæ диаметр уыдзæн 120 сантиметры.
Дарддæр Тыбылты Леонид æмæ Олег Говорун бабæрæг кодтой Хетæгкаты Къостайы номыл Паддзахадон драмон театры бæстыхайы арæзтад.
Олег Говорун банысан кодта, зæгъгæ, театры арæзтадон куыстытæ бæлвырд фæрæвдздæр сты, æмæ йæ раздæры балцы рæстæджы цы уавæр федта, уый цæхгæр фæивта.
Объект хæстæгдæр рæстæджы цæттæ уыдзæн эксплуатацимæ йæ раттынмæ: фæлындзæн куыстытæ сты фæуынхъус, æрбаластæуыд сценæйон ифтонгад. Фонтан та, генподрядон организацийы минæвары ныхæстæм гæсгæ, эксплуатацимæ лæвæрд æрцæудзæн æввахс рæстæджы.
Республикæ Хуссар Ирыстоны
Президенты
официалон сайт
Comments are closed, but trackbacks and pingbacks are open.