Æмцæдисад æмæ интеграцийы тыххæй бадзырды фæлгæтты бюджетон къабазы кусджыты куыстмызд фæфылдæр кæныны тыххæй Уæрæсейы Федераци æмæ Хуссар Ирыстоны ‘хсæн бакуыстгонд Сразыдзинады проектмæ гæсгæ бюджетон къабазы кусджыты куыстмызд фæфылдæр уыдзæн астæуккаг нымадæй 16 проценты. Уый тыххæй знон фехъусын кодта РХИ-йы Президент Тыбылты Леонид, республикæйы куыстмызд фæфылдæр кæныны фæдыл комментаритæ аразгæйæ.
«Уый хауы ахуырад, æнæниздзинад хъахъхъæныны, культурæ, физкультурæ æмæ спорт, хъæууон хæдзарад æмæ дзыллон информацийы фæрæзты кусджытæм. Мызд ногæй нымад æрцæудзæн 2016 азы райдианæй æмæ ацы нысæнттæн, зындгонд куыд у, афтæмæй Уæрæсейы Федераци рахицæн кæндзæн финансон æххуыс 195 милуан сомы. Бюджетон къабазы кусджыты æндæр категоритыл – РХИ-йы Пенсион фонд æмæ паддзахадон бюджетæй, пенсиисджытæ æмæ паддзахадон бюджетæй сывæллæттæ кæмæн ис, уыдонæн æххуыстæ исæг æмбæстæгтæ æмæ РХИ-йы иумиагахуырадон уагдæтты боныгон чи ахуыр кæны, уыцы студенттыл дзырд куы цæуа, уæд, царды аргъ кæй бæрзонддæр кæнынц, уый хъусдардмæ райсгæйæ (æнæмæнгхъæуæг товарты æргъты рæзт) æмæ ма афтæ материалон æгъдауæй сын æххуыс кæныны фæдыл мадзæлттæ сифтонг кæныны нысæнттæн æз РХИ-йы Хицауадæн радтон хæслæвæрд, цæмæй уæрæсейаг фарсимæ бакусой РХИ-йы æмбæстæгты уæлдæр банысангонд категоритæн иурæстæгон бафыстытæ сæххæст кæныны фадат, Æмцæдисад æмæ интеграцийы тыххæй бадзырды фæлгæтты хицæн Сразыдзинæдтæ реализаци кæнынæн резервгонд фæрæзты хыгъдæй.
Президент банысан кодта, зæгъгæ, Уæрæсейы Федерацийы разамынад æмбаргæ ахаст равдыста æрæвæргæ фарстытæм æмæ ацы азы 25 ноябры Уæрæсейы Федераци æмæ Республикæ Хуссар Ирыстоны ‘хсæн социалон-экономикон æмгуысткæнынады фæдыл Æхсæнхицауадон къамисы æмсæрдæртты æххæстбарты фæлгæтты къухтæ фыст æрцыд нæ фæндæтты фæдыл сразыдзинады тыххæй уынаффæйыл.
«Ацы документмæ гæсгæ æмæ бавдисгæ хыгъдтæм гæсгæ æххæст цæу-дзысты иурæстæгон бафыстытæ», – банысан кодта Тыбылты Леонид.
Къухтæ фыст кæуыл æрцыд, уыцы документмæ гæсгæ РХИ-йы Пенсион фондæй æмæ паддзахадон бюджетæй пенсиисджытæн иурæстæгон бафыстытæ уыдзысты 10 мин сомы, паддзахадон бюджеты фæрæзтæй сæ сывæллæттæн æххуыстæисæг æмбæстæгтæ та райсдзысты 6 мин сомы, РХИ-йы иумæй-агахуырадон уагдæтты боныгон ахуыргæнæг студенттæ та – 4 мин сомы, паддзахадон хицауиуæгады органты кусджытæн бафысты фондæй 10 проценты. Уымæй дарддæр ма национ æдасдзи-нады органты æмæ барадхъахъхъæнынадон архайды, национ хъахъхъæнынады кусджытæ æмæ æмбæстагон персоналæн 199,25 милуан сомы онг, астæуккаг нымадæй фæйнæ 42 мин сомы.
«Мах фæнд кæнæм иурæстæгон бафыстытæ дыууæ этапы сæххæст кæнын – ацы азы декабры мæйы æмæ фидæн азы февраль-марты мæйты. Æз ныридæгæн хæслæвæрдтæ радтон æмбæлон структурæтæн, цæмæй æввахсдæр æмгъуыдты бакусой æппæт æнæмæнг-хъæуæг документацийыл», – кæронбæттæны загъта Президент.
Зæрдыл лæууын кæнæм, Æмцæдисад æмæ интеграцийы тыххæй бадзырдыл къухтæ кæй æрфыстой РХИ-йы Президент Тыбылты Леонид æмæ УФ-йы Президент Владимир Путин 2015 азы 18 марты.
Ацы бадзырд РХИ-йы Парламент сратификаци кодта 2015 азы 3 апрелы æмæ УФ-йы Паддзахадон Думæ та – уыцы аз 19 июны.
Республикæ Хуссар Ирыстоны Президенты пресс-службæ
Comments are closed, but trackbacks and pingbacks are open.