Республикæ Хуссар Ирыстоны Президент Тыбылты Леонид йæхимæ райста Уæрæсейы Федерацийы Паддзахадон Думæйы делегацийы Паддзахадон Думæйы депутат Тайсауты Хъазбеджы сæргълæудæй, кæцы Цхинвалмæ æрцыд Республикæ Хуссар Ирыстоны Парламентыл 25 азы сæххæсты бæрæгбонмæ.
Фембæлды райдайæны паддзахады сæргълæууæг раарфæ кодта уазджытæн. Уый загъта, зæгъгæ, йын кæддæриддæр æхсызгон у республикæйы хæлæртты Хуссар Ирыстоны зæххыл фенын æмæ, зæгъгæ, уæрæсейаг æмæ хуссарирыстойнаг фæрсты ’хсæн æппæт бадзырдты реализацийы фæдыл иумиаг куыст ныридæгæн радта фæстиуджытæ.
«Мах уынæм, не ’мбæстæгты царды æмвæзад бирæбæрцæй фæбæрзонддæр. Хуссар Ирыстон фæндвидар у йе стратегион партнер Уæрæсейы Федерациимæ дарддæр дæр æмгуыст кæнын æмæ ахастытæ фидардæр кæнынмæ», — загъта Президент.
Тыбылты Леонид ма йæ ныхасмæ бафтыдта, зæгъгæ, «абоны бæрæгбон РХИ-йы Парламентыл 25 азы сæххæсты бон сабырадон уавæрты мах нысан кæнæм сæрмагондæй Уæрæсейы æххуысы фæрцы».
Арфæйы ныхæстæ æмæ зæрдиаг фæндиæгтæ загъта Уæрæсейы Федерацийы Паддзахадон Думæйы Федерацийы Советы Сæрдар Сергей Нарышкины адресыл дæр.
Фембæлды рæстæджы паддзахады сæргълæууæг уазджытæн радзырдта куысты тыххæй дæр, кæцы здæхт у Уæрæсейы Федерациимæ Æмцæдисад æмæ интеграцийы тыххæй ба-дзырды реализацимæ.
Тайсауты Хъазбег йæ рады бузныг загъта Президентæн, зæрдиагæй сæ кæй райста, уый тыххæй. Уæрæсейы Федерацийы Паддзахадон Думæйы номæй уый зæрдиаг фæндиæгтæ загъта Республикæ Хуссар Ирыстоны æппæт адæмæн æмæ банысан кодта, зæгъгæ, Сергей Нарышкинæн Хуссар Ирыстонмæ ис уæлдай хуыздæр ахаст æмæ хуссарирыстойнаг адæмы нымайы йе ’фсымæртыл.
«Абон мах ам стæм, æрмæст нæхи фракцийæ нæ, фæлæ Паддзахадон Думæйы æппæт депутатты номæй дæр. Хуссар Ирыстон у уыцы регион, кæцыйы фарстаты тыххæй Паддзахадон Думæйы нæ дихтæ кодтой фракцитæ æмæ политикон цæстæнгæстыл, Хуссар Ирыстоны хæд-бардзинад банымайыны фарсты фæдыл уыдон алы хатт дæр æмхъæлæсæй разы уыдысты», — загъта Тайсауты Хъазбег.
Фембæлды кæрон Президент уазджыты схорзæхджын кодта Республикæ Хуссар Ирыстоны бæрзонд паддзахадон хорзæхтæй. Сæ рады Паддзахадон Думæйы делегацийы уæнгтæ дæр Хуссар Ирыстоны Президентæн бакодтой зæрдылдарæн лæвар.
Республикæ Хуссар Ирыстоны Президент æмæ Хицауады пресс-службæ

Comments are closed, but trackbacks and pingbacks are open.