Тыбылты Леонид президентон æвзæрстыты хайад райсын кæй сфæнд кодта, уымæй раст бакодта

2017 азы президентон æвзæрстыты хайад райсыны сæраппонд Тыбылты Леонид йæ кандидатурæ раразмæ кæнын кæй аскъуыддзаг кодта, уый мæнмæ гæсгæ, адæмæн æнæнхъæлæджы нæ уыд. Уымæн æмæ алы патриоты дæр фæнды йæ адæмæн фылдæр балæггад кæнын. Тыбылты Леониды лæггæдтæ та йæ адæмæн цъус не сты, фæлæ ма йын аразинæгтæ дæр нырма ис, уыдон баххæст кæныны тыххæй йæм ис фаг хъару æмæ фидар фæндон. Уый республикæйы сæргъ слæууыд, республикæ уæззау политикон кризисы куы уыд, æхсæнад куы ныддихтæ æмæ кæрæдзийы ныхмæ куы систы, уыцы рæстæджы. Зæгъæн ис, 2011 азы Хуссар Ирыстон уыд уардиты революцийы къæсæрыл. Уыцы уавæр æрнывыл кæнынæн æрмæст фæлтæрддзинад æмæ арæхстджын архайд фаг нæ уыдысты, ам ма хъуыд фидар удыхъæд æмæ куырыхондзинад дæр. Уыцы миниуджытæй æххæст кæй у нæ Президент, йæ къухы уымæн бафтыд æхсæнад æрсабыр æмæ æрбаиу кæнын дæр. Президент суæвгæйæ, уый йæхимæ æрбаввахс кодта оппозицион тыхты, йæ ныхмæ уыдысты æви нæ, уымæ нæ кæсгæйæ, æмæ семæ райдыдта кусын. Абон уынæм уыцы куысты фæстиуджыты. Абон Хуссар Ирыстоны уавæр у стабилон, республикæмæ цы финансон æххуыс цæуы, уый иууылдæр хардз цæуы нысанмæ-здæхтæй. Уый фæстиуæгæн адæмы цардуагон уавæртæ схызтысты æмбæлон æмвæзадмæ, сæ фидæнмæ кæсынц ныфсджынæй. Уыимæ иумæ æндидзы республикæ, рæзы куыд горæты, афтæ районты инфраструктурæ дæр. Горæт дæр æмæ районты центртæ дæр сæ хуыз скалдтой, изæрыгæтты горæты уынгты атезгъо кæнынæй адæм æхцондзинад исынц. Раст у нæ экономикæ кæд сабыргай йæ къахыл лæууын райдыдта, уæддæр нырма къуыхцы кæны, фæлæ уый дæр рæстæгмæ хъуыддаг у, куыд фæзæгъынц: «Мæскуы иу бонмæ нæ сырæзт».

Тыбылты Леонидмæ ма ис иу диссаджы миниуæг, республикæйæн йæ размæ чи къухдариуæг кодта, уыдоны æфхæрыны кой æхсæнады раз никуы ракодта, уыдонимæ дæр ын æвзæр ахастытæ нæй, уымæн æмæ йæ зоны, уыдонæй алчи дæр аккаг хай бахаста нæ паддзахиуæгады рæзтмæ. Хуссар Ирыстоны паддзахиуæгад та у, ирон мæсыгау, «уæладзгуытæй» конд. Нæ республикæйы сæргълæуджытæй алчи дæр уыцы мæсыгæй «самадта йæхи уæладзыг», абон дзы искæцыйы куыст куы раппарæм, уæд мæсыг ныппырх уыдзæн, уый та абон æппындæр нæ хъæуы.

Хуссар Ирыстоны адæм уыйас хъысмæтæвзарæн фæндæгтыл рацыдысты, уыйас хъизæмæрттæ бавзæрстой, уый фæстиуæгæн сæм уыйас фæлтæрддзинад ис, æмæ хъуамæ раст равзæрст саразой. Зонын æй, президенты бынатмæ сæ кандидатурæтæ чи раразмæ кæной, уыдон дæр Ирыстоны патриоттæй уыдзысты æмæ уадз, адæм равзарæд хуыздæртæй хуыздæры.

ОСИАТЫ И.