«Хуссарирыстойнаг дипломатийы сæйраг хæс у фæсарæйнаг бæстæтимæ бастдзинæдтæ рауæрæх кæнын», — фехъусын кодта Тыбылты Леонид Боливариайнаг Республикæ Венесуэллæ æмæ Республикæ Никарагуайы Республикæ Хуссар Ирыстоны Уæлвæткон æмæ Æххæстбарджын минæвар Козаты Наримимæ йæ фембæлды рæстæджы.

Фембæлды ма хайад райста Фæсарæйнаг хъуыддæгты министр Джиоты Мурат.

Фембæлды цы ныхас æрхауд, уый рæстæджы Козаты Нарим фехъусын кодта бæстæйы сæргълæууæгæн Никарагуайы Республикæмæ йæ балцы фæстиуджыты фæдыл. Уырдæм нæ минæвар ацыд Никарагуайы Президент Даниэль Ортегайы инаугурацийы хайад райсыны сæраппонд. Козайы фырт банысан кодта, зæгъгæ, Республикæ Никарагуайы ирыстойнаг делегацийыл фембæлдысты тынг зæрдæрайæ, æмæ делегацийы минæвæрттæн арæзт æрцыд æппæт уавæртæ дæр.

«Цытджын Президент, æз сæххæст кодтон мæныл цы мисси æвæрд уыд, уый. Æз дæ номæй арфæйы ныстуан раттон Никарагуайы сæргълæууæгмæ, цыран дзырдæуы нæ бæстæты æхсæн дывæрсыг ахастытæ райрæзын кæныны хорз фидæны тыххæй, æмæ зæрдылдарæн лæвæрттæ раттон Никарагуайы Республикæйы Президент Даниель Ортегамæ», — загъта Козаты Нарим.

Уый банысан кодта, зæгъгæ, йæ балцы рæстæджы аныхас кодта уæрæсейаг æмæ абхазаг делегациты минæвæрттимæ, афтæ ма Никарагуайы Президентæн йæ фырт Лауреано Ортегаимæ. Уый активонæй архайы æттагэкономикон бастдзинæдты фадыджы.

«Фæнды мæ банысан кæнын ахæм ахсджиаг хъуыддаг, фыццаг хатт Никарагуайы Республикæйы вице-президент кæй сси Даниэль Ортегайы цардæмбал Росарио Мурильо. Уый у Аугусто Сандинойы æввахс хион, хайад иста Сомосы ныхмæ партизанты змæлды. Раздæр куыста культурон-гуманитарон фадыджы республикæйæн йæхи мидæг», — загъта Козаты Нарим.

Уымæй дарддæр ма Козайы фырт фехъусын кодта, зæгъгæ, ма уыд Республикæ Никарагуайы Уæрæсейы Федерацийы минæварады уазæг, цыран уый фембæлд Никарагуайы Уæрæсейы хъуыддæгты рæстæгмæйы барджын Алексей Капустинимæ.

Тыбылты Леонид, йæхи ‘рдыгæй, бузныджы ныхæстæ загъта Козаты Наримæн йæ лæмбынæг зонæнты тыххæй, æмæ банысан кодта, зæгъгæ, уыцы балц ахъаз уыдзæн дыууæ бæстæйы æхсæн хæлар ахастытæ фæбындурондæр кæнынæн.

«Нæ Минæвары Никарагуайы Республикæмæ арвитыны фæнд уыди раст — уый махмæ географион æгъдауæй у дард, фæлæ нын удæй та хæстæг æмæ хæлар бæстæ у. Уым уагъд цыдысты Президенты инаугурациимæ баст цытджын мадзæлттæ. Мæ хъуыдымæ гæсгæ, дæ балц, Нарим Захары фырт, æмæ ацы цауы фæдыл цытджын мадзæлтты дæ хайадист уыд нæ бæстæты æрбахæстæг кæныны хъуыддаджы ног къахдзæф. Мах æхсæн ис æмбæлон бадзырдтæ кæрæдзийæн æххуыс æмæ хæстæг уæвыны, алыгъуызон къабæзты æмархайды сæраппонд», — загъта Тыбылты Леонид.

Президент банысан кодта, зæгъгæ, Уæрæсейы Федерацийы хæдфæстæ Республикæ Хуссар Ирыстоны хæдбардзинад банымадта Республикæ Никарагуа дæр, æмæ сæ уый тыххæй хуссарирыстойнаг адæм бузныг уыдзысты кæддæриддæр. Уый загъта бузныджы ныхæстæ Козаты Наримæн йæ бакæнгæ куысты тыххæй, æмæ банысан кодта, зæгъгæ, адарддæр кæнын хъæудзæн куыст ацы фæдыздæхты.

РХИ-йы Президент æмæ Хицауады пресс-службæ

Comments are closed, but trackbacks and pingbacks are open.