Хуссарирыстойнаг богал Бестауты Андрей ссис спорты сгуыхт дæсны æмæ Уæрæсейы сгуыхт тренер Петр Юмшановы призтæ рамбулыны сæраппонд уæгъдибар хъæбысхæстæй æппæтуæрæсейон турниры уæлахиздзау. Ерыстæ уагъд цыдысты республикæ Сахайы. Тренер Коцты Тамерланы хъомылгæнинаг финалы фæуæлахиз бынæттон хъæбысæйхæцæг Никита Хабаровыл. Ирыстоны хъæбыхæсты скъолайы минæвæрттæй ма турниры фæуæлахиз сты Джыгкайты Тамик (97кг), Джиоты Саламат (79 кг) æмæ Багаты Арслан (86кг). Æвзист призертæ систы Хъызынты Дзамболат (65 кг) æмæ Сечъынаты Георги (70 кг). Æртыккаг бынæттæ та бацахстой Бугулты Зауырбег (70 кг), Бадтиаты Алик (79 кг), Кцойты Алихан (92 кг), Коцойты Тамерлан (97 кг) æмæ Къæбысты Дэвид (125 кг).
***
Тренер Коцты Тамерланы иннæ хъомылгæнинаг Дзеранты Арик та Краснодары бронзæ майдан рамбылдта дыууæ хатты Олимпион хъæзтыты призер Къудухты Бесикы номарæн турниры. Арик хæцыд 97 кг уæзы категорийы. Ерысты ма бронзæйон хорзæхтæ бафтыдысты Токты Сослан (86 кг), Фадзауты Марат (70 кг) æмæ Мамиты Давид (125 кг) къухты.
Фæнды мæ турчы хъазын
Спортивон рауагъдад «Спорт-Экспресс»-æн йæ интервьюйы рæстæджы зындгонд ирон футболист, Казаны «Рубин»-ы хъазæг Зæгъойты Алан куыд фехъусын кодта, афтæмæй йын сæрды фадат уыд фæсарæйнаг клубмæ ахизынæн.
«Сæрды мын варианттæ уыд фæсарæнтæм ацæуынæн. Командæйы ном нæ зæгъдзынæн, фæлæ мæхæдæг уыдтæн цæттæ. Мæ хъуыддаг нæ рауад, уымæн æмæ уайтагъд бирæ агенттæ равдыстой активондзинад. Æмбæхсгæ дæр æй нæ кодтон Турчы хъазын мæ кæй фæнды, уый. Футболист ма куыд банысан кодта, афтæмæй фæстаг цыппар азы нырæй цæттæдæр никуы ма уыд.
Июлæй кусын ÆЦСК тренер-реабилитолог Игорь Степановимæ. Алы бон дæр æм „Рубин“-æй æппæрстон мæ бæрæггæнæнтæ æмæ мын цы дзырдта, уыдон арæзтон. Уый фæрцы мæ бон уыд 90 минут хъазын æмæ уыцы рæстæгмæ 12,5 километры алидзын. Дарддæр дæр хъавын йемæ æмгуыстад кæнынмæ», — банысан кодта Зæгъойты Алан.
Хуриты Батрадз
