Æртындæс сыгъзæрин, фараст æвзист æмæ цыппар бронзæ майданы рамбылдтой нæ гимнаст-чызджытæ Цæгат Ирыстон-Аланийы ерысты. Цины хабар дзыллон-информацион фæрæзтæн фехъусын кодта аивадон æмæ эстетикон гимнастикæйы Федерацийы президент Цхуырбаты Земæ. Уый банысан кодта, зæгъгæ, хуссарирыстойнаг гимнасттæ пьедесталы уæлдæр къæпхæнтæ иууылдæр бацахстой.
Уæ зæрдыл уын æрлæууын кæнæм, ерыстæ кæй уыдысты 28-29 октябры Кировы районон центр Елхоты.
«Хорз æмвæзадыл арæзт уыдысты ерыстæ, нæ сабитæ сæхи тынг дзæбæх равдыстой. Конкуренттæ сын бирæ уыдис — Цæгат Кавказы республикæтæй алкæцы дæр æрæрвыста йæ минæвæртты. Æхсызгон мын у, нæ хъомылгæнинæгтæ уыйбæрц сыгъзæрин майдантæ кæй райстой», — радзырдта Цхуырбаты Земæ.
Фыццаг бынæттæ бацахстой: Бестауты Мата, Валерия Ильенко, Анна Захарова, Бикойты Виктория, Дарина Казыханова, Къæбысты Аннæ, Зарина Можейко, Цхуырбаты Вероникæ, Тедеты Аринæ, Æлборты Виктория, Болататы Виктория, Джиоты Камиллæ æмæ Хъæцмæзты Аннæ.
Пьедесталы дыккаг къæпхæнты аккаг сæхи равдыстой Къæбулты Миланæ, Дудайты Даникæ, Зассеты Мария, Бигъуылаты Аминæ, Цоциты Аннæ, Бибылты Евæ, Рипсиме Симонян, Тыджыты Амагæ æмæ Харебаты Елизаветæ. Æртыккаг бынат æрхауд Тедеты Аннæ, Къуылыхты Аланæ, Хъазиты Элизабет æмæ Æлборты Ланæмæ.
Цхуырбаты Земæ куыд зæгъы, афтæмæй тагъд рæстæджы та нæ аивадон æмæ эстетикон гимнастикæйы дæснытæ абалц кæндзысты ног ерыстæм. Уæлахиздзау ут кæддæриддæр, хъæбултæ!
Comments are closed, but trackbacks and pingbacks are open.