Уæлахизы боны цытæн

Сабиты æнæхин æмæ хъæлдзæг цæстæнгас. Сæ сæрмæ сыгъдæг арвыл тæмæнтæ калынц хуры зæрин тынтæ æмæ сæ рæвдауынц, узæлынц сыл. Цы ис ахæм цинæвдылд цæсгæмттæм кæсынæй хуыздæр, уыдон уындæй хистæрты зæрдæтæ райынц æмæ сыл цин кæнынц. Бабуц вæййынц, фæзæгъынц сусæг-æргомæй, æгайтма æнæмаст æмæ хъæлдзæг стут, царды комулæфтæй стут хайджын æмæ уын йæ хорздзинæдтæ рæдауæй луары. Фæлæ уæддæр зæрдыл дарын фæхъæуы иу хъуыддаг. Уый та у, абон æмæ фидæны фæлтæртæн рухс цард чи æрхаста, йæ сæрвæлтау чи тох кодта, чи бабын, уыцы зынгхуыст хъæбатыр хæстонты руаджы æмæ сын сæ рухс нæмттæ иу уысм дæр рох кæнын нæ хъæуы.

Уæлахизы бон куыд æввахсдæр кæны, афтæ ноджы тынгдæр æрæмысынц уыцы цаутæ, фæуадзынц мысæн изæртæ, хъæбатырдзинады уроктæ. Иу ахæм мадзал æрæджы уагъд æрцыд нæ горæты 6-æм астæуккаг скъолайы дæр. Уым хайад райстой скъолайы коллектив, фæхуыдтой йæм Стыр Фыдыбæстæйон хæсты ветерантæ Тедеты Никъала, Дзеранты Шота, горæты Ветеранты советы сæрдар Гобозты Æхсар, йæ хæдивæг Козаты Павел æмæ æндæрты.

…Сабыр рæстæг, æвзæнгтæ зарынц æмæ кафынц. Фæлæ æваст арвыл сау мигътæ стыгуыр сты – райдыдта хæст. Мадзал амонджытæ æмæ ахуырдзаутæ кæрæдзи фæстæ дзырдтой, хæст цы горæтты райдыдта пиллон уадзын, уыдæттыл. 72 азы рацыд Уæлахизы бонæй, фæлæ йæ цард Фыдыбæстæйы тыххæй чи нæ бавгъау кодта, уыдон цæрдзысты адæмы зæрдæты. Мадзалы хайадисджытæ иу уысм æдзæмæй алæууынæй ссардтой уыдон рухс нæмттæ. Ныййарæгæн йæ фырт фæцыд тугуарæн хæстмæ, мад сагъæс кæны, кæлынц йæ цæссыгтæ, æхсайы йæм йæ зæрдæ. Уæдмæ сценæмæ фæзынд йæ хъæбул æмæ дардæй дзуры йæ тохы фæндæгтыл. Ахæм сценикон нывтæ уынгæйæ, хæсты ветерантæн сæ цæстытыл ауадысты уыцы уæззау тохтæ. Ахуыргæнинæгтæ дзырдтой, хæст цы горæтты цыд, стæй дзы нæ хæстонтæ цы хъæбатырдзинад æвдыстой, уыдæтты тыххæй, æрдзырдтой, ирон сахъ фыртты сгуыхтдзинæдты тыххæй дæр. Рæстæггай экраныл æвдыст цыдысты, советон адæм фæс-чъылдым цы зындзинæдтæ æвзæрстой, тохы быдырты та хæстонтæ цы æнæмсæр хъæбатырдзинад æвдыстой, уыдæттæ. Зарæг хæстонтæн сæ разæй цыд, уый сæ разæнгард кодта знагыл тагъддæр фæуæлахизы хъуыддагмæ. Дзæвгар сты Фыдыбæстæйон хæстыл цы зарджытæ фыст æрцыдысты, уыдон. Скъолайы зарæггæнджыты хор иттæг хорз сæххæст кодта ахæм зарджытæ, «Песенка фронтового шофера», «День Победы», «Цæй диссаг дæ, мæ Ирыстон» æмæ æндæртæ. Бацæттæ сæ кодтой йæ аивадон къухдариуæггæнæг Козаты Маринæ æмæ аккомпониатор Медойты Аллæ. Кæронбæттæны айзæлыдысты М. Блантеры «Катюшæ»-йы мелодийы зæлтæ, зарæггæнæг Козаты Галинæимæ мадзалы хайадисджытæ сæххæст кодтой ацы зарæг.

Хуыбиаты Н.