Фыдыбæстæйы Стыр хæсты Уæлахизы кадæн бирæ мадзæлттæ арæзт æрцыд республикæйы. Уыдон райдыдтой майы райдайæнты æмæ абоны онг дæр нæма фесты.
9 майы Уæлахизы парад æмæ “Æнæмæлгæ полк”-ы архайдта мингай адæймæгтæ æмæ æфсæддон службæгæнджытæ. Уымæй дарддæр Дзæуджыхъæуы сæйраг парчы цалдæр боны уагъд цыдысты республикæйы сфæлдыстадон кордты концерттæ, нывгæнджыты, стæй æрмдæсныты куыстыты равдыстытæ, алыгъуызон ерыстæ… Архайдтой дзы æдæппæт 40 тематикон фæзы.
11-æм майы Беслæны ипподромы бæрæгбоны кадæн уыд бæхты дугъ. Хайад дзы истой Цæгат Кавказы хуыздæр барджытæ. Фæуæлахизуæвджытæ зæрдылдарæн лæвæрттæ райстой республикæйы Сæргълæууæг Битарты Вячеславы къухæй.
Парти “Иугонд Уæрæсейы” хъæппæрисæй Фыдыбæстæйон хæсты темæйыл диктант “Диктант победы”, зæгъгæ, фысгæйæ сæ зонындзинæдтæ равдыстой 200 адæймаджы бæрц.
9 майы бæрæгбон Цæгат Ирыстоны цæрджытæн ацы хатт æрхаста уæлдай æхсызгон æнкъарæнтæ. Ацы бон республикæйы æппæт дуканиты дæр хойраджы продукттæ уыдысты бирæ асламдæр. Дзул та лæвæрдтой алы ран дæр лæвар. Уыимæ, куыд паддзахадон, афтæ хисæрмагонд дуканиты дæр. Адæмæн бæрæгбоны балæггад кæныны хъæппæрис равдыста Хойраджы министрад.
Фæсте нæ баззад республикæйы транспорты министрад дæр. Æппæт паддзахадон транспорт 9 майы адæмы ласта лæвар. Уыдон бафæзмыдтой хисæрмагонд маршрутон такситы хицæуттæй дæр бирæтæ.
Кæй зæгъын æй хъæуы, чысыл зæрдæлхæнæн, æрхъуыды дæр адæймагæн æхсызгон у. Уый нысан кæны, кæй нымайæм нæ истори, нæ хъæбатырты, Фыдыбæстæйы Стыр хæсты Уæлахизы. Махæй цæвиттон исдзысты кæстæр фæлтæр дæр.
Нæ уацх.
Comments are closed, but trackbacks and pingbacks are open.