Уæрæсе уыд æмæ у фидауынгæнæг

Знон Хуссар Ирыстоны уæрæхæй нысан цыд 1992 азы 14 июлы гуырдзиаг-ирон хъау-гъайы зонæмæ Æмхæццæ фидауынгæнæн тыхты æрбакондыл 25 азы сæххæсты бон.

Цытджын мадзæлттæ райдыдтой Хуссар Ирыстоны Уæрæсейы Федерацийы Хъахъ-хъæнынады министрады 4-æм æфсæддон базæйы территорийыл. Уым уыд базæйы службæгæнджыты цытджын рæнхъæйлæуд. Хайад дзы райстой Республикæ Хуссар Ирыстоны Президент Бибылты Анатоли, Хицауады Сæрдар Пухаты Эрик, Хуссар Ирыстоны Уæрæсейы Федерацийы Уæлвæткон æмæ æххæстбарджын минæвар Марат Кулахметов, 4-æм æфсæддон базæйы къухдариуæгад æмæ æндæр официалон адæймæгтæ.

Уæрæсейы Федераци æмæ Республикæ Хуссар Ирыстоны Паддзахадон гимнты зæлты фæстæ 4-æм æфсæддон базæйы командæгæнæджы хæстæ рæстæгмæ æххæстгæнæг, гвардийы булкъон Алексей Плисов йæ раныхасы банысан кодта, зæгъгæ, ис ахæм цаутæ, кæцыты нысаниуæг, рæстæг рацæуыны фæстæ, ноджы тыхджындæр æмæ мидисджындæр кæны. Ноджы арфдæр æмæ нысаниуæгджындæр кæны сæ ахадындзинад иу кæнæ иннæ адæмы историйы. Æмæ уыцы цауты рæнхъы ис 1992 азы 14 июлы Дагомысы сразыдзинадмæ гæсгæ Хуссар Ирыстоны зæхмæ сабырад бахъахъхъæныны фæдыл æртæфарсон Фидауынгæнæг тыхты æрба-конд дæр.

«Уæд, 1992 азы ацы хæстæ æвæрд уыдысты ног сырæзгæ Æмбæстагон хъахъхъæнынад, уæлвæткон уавæртæ æмæ æрдзон æнамонддзинæдтæ аиуварс кæныны хъуыддæгты фæдыл паддзахадон комитеты сæргълæууæг Сергей Шойгуйыл. Уыцы командæйы къухты бафтыд регионы æндыгъддзинад фæкъаддæр кæнын, тугкалд æруромын æмæ сабыр цардмæ рахизынæн уавæртæ саразын.

2008 азы августы уыдон бамбæрстойтой, се зноны хæлæрттæ чи уыдысты, уыцы гуырдзиаг Фидауынгæнæн батальоны службæгæнджытæ сыл гадзрахатæй куыд рацыдысты, уый æмæ агрессоры фыццаг цæф райстой сæхимæ. Хъæбатырдзинад æмæ хъайтардзинад æвдисгæйæ, фидауынгæнæг хæстонтæ аккагæй фæлæууыдысты знаджы ныхмæ. Бирæнымæц удзиæнтты царды аргъæй фæлæууыдысты уæрæсейаг æфсады æрцыдмæ. Абон, уыдонæй чи фæхъуыд, уыдонæй алчидæр у уый аккаг, цæмæй мах нæ сæртæ æркъул кæнæм сæ рухс нæмтты раз. Нымад Хуссар Ирыстон у иууыл хуыздæр цырт, сæрибардзинад чи æрхаста уыдонæн», – банысан кодта Алексей æмæ бахатыд мадзалы хайадисджытæм, цæмæй æмырæй алæугæйæ ссарой фæмардуæвæг хæстонтæ-фидауынгæн-джыты рухс нæмттæ.

Хуссар Ирыстоны Уæрæсейы Федерацийы Уæлвæткон æмæ æххæстбарджын минæвар Марат  Кулахметов 2008 азы уæрæхмасштабон хæст ныхæстæй нæ зоны. Уæд уый командæ кодта Æмхæццæ фидауынгæнæг тыхтæн.

Уый йæ раныхасы æрдзырдта, 25 азы размæ Фидауынгæнæг тыхтæ Ирыстоны зæхмæ цæй тыххæй æрцыдысты, уыцы миссийыл. Уыдон, зæгъгæ, 16 азы дæргъы аккагæй æххæст кодтой сæ разылæууæг хæстæ.

«Уыдон уыдысты сабырады ахæм гарант, кæцыты руаджы Хуссар Ирыстоны адæм сæрибарæй цардысты, улæфыдысты æмæ фидæны æнтыстджын бонмæ ныфсджынæй кастысты. Хъыгагæн, алы фидауынгæнæг нал федта уыцы сæрибардзинад.

Сымах, 4-æм æфсæддон базæйы хæстонтæ, аккагæй дарддæр æххæст кæнут фида-уынгæнæджы кадджын  хъуыддаг. “Сымах æрвонг кæнут, Хуссар Кавказы тыхæй спайда кæнын чи фæлвары, уыдоны мæгъзтæ. Сымахæн мæ цæст уарзы æнтыстытæ уæ æвæджиаг службæйы», – кæронбæттæны банысан кодта ныхасгæнæг.

Республикæ Хуссар Ирыстоны Президент Бибылты Анатоли йæ ныхасы банысан кодта, 25 азы размæ Ирыстоны хæствæллад зæххыл кæй æрæнцой кодта сабырад Фидауынгæнæг тыхты æрбацыдæй.

«Уыдон сæ царды аргъæй сарæзтой æппæтдæр, цæмæй Хуссар Ирыстоны зæххыл уæвынад кодтаид сабырад. Æрмæстдæр уæд, фидауынгæнджытæ, уæды политикон къухдариуæгады – Сергей Шойгуйы  руаджы, ифтонг кодтой сабырад.

25 азы у ахæм рæстæг, цы рæстæджы адæмы бацыд царды ныфс, сабыр цард æмæ æдас царды ныфс. Суанг 2008  азмæ адæм цардысты фидауынгæнæг тыхты ныф-сæй. Банкъардтой сабыр царды ад. Фæлæ Гуырдзыстоны къухдариуæгадмæ Саакашвилийы æрцыдæй уавæр бынтон фæивта  2004 азы, 2006 æмæ 2008 азты Хуссар Ирыстон уыд скуынæгкæнынады къæсæрыл. Æмæ  Уæрæсейы æфсад Гуырдзыстоны зыгъуыммæ тыхты æркодтой сабырадмæ», – дзырдта бæстæйы сæргълæууæг.

Уæрæсейы Федерацийы Хъахъхъæнынады министрады 58-æм æфсады 4-æм гвардион базæйы службæгæн-джытæм ахасты банысан кодта, зæгъгæ, абон Хуссар Ирыстоны æдасдзинад уæ къухты ис. Уыцы хъуыддагмæ ма стыр хайбавæрд хæссынц Федералон Æдасдзинады службæйы Арæнхъахъхъæнæг æфсад. Æфсад æмæ Уæрæсейы Федерацийы политикон къухдариуæгады руаджы республикæ рæзы, биноныг кæны цард, арæзт цæ-уынц социалон нысаниуæджы объекттæ, æндидзы экономикæ. Уый, Бибылты Анатолийы ныхæстæм гæсгæ, нысан кæны, Уæрæсе йæ уд, йæ мидæггагон исадмæ гæсгæ кæй уыд æмæ ныр дæр у фидауынгæнæг.

«Абон уæ коллегæтæ, уæ хæстон æмгæрттæ ахæм сабырад биноныг кæнынц Сирийы æмæ дунейы æндæр бынæтты», – банысан кодта Президент.

Хуссар Ирыстоны адæмы номæй, йæ къухдариуæгады номæй бузныджы ныхæстæ загъта, 1992 азæй суанг  2008 азмæ ацы тыхты рæнхъыты сабырады сæрыл чи тох кодтой, æппæт уыдонæн. Мах, зæгъгæ, нæ райрæзт, нæ ахастæй ноджыдæр сбæлвырд кодтам, Хуссар Ирыстон  сабырадуарзаг паддзахад кæй у æмæ Уæрæсеимæ стратегион партнердзинад бар никæмæнуал ратдзæн, тыхæй фарст скъуыддзаг кæнынæн, ахæм бæстæйæн, кæцытæн ис реваншистон æмæ неофашистон зæрдæйыуаг æмæ ахастытæ.

2008 азы уæрæсейаг Фидауынгæнæг тыхты рæнхъыты службæгæнæг, медицинон службæйы гвардийы сержант Бестауты Мая радзырдта 8 августы уæззау цаутыл. Уый йæхæдæг уыд хайадисæг уыцы цауты, кодта медицинон æххуыс цæфтæн, кæд йæхæдæг дæр схъисцæф фæци, уæддæр.

1992 азы Фидауынгæнæг тыхтыл Хуссар Ирыстоны адæм куыд æмбæлдысты цины цæстысыгтимæ, уый тыххæй дзырдта Пухаты Александр.

Митинджы хæдфæстæ 4-æм æфсæддон базæйы службæгæнджытæ цытджын маршæй рацыдысты трибунæйы рæзты.

Къæбулты М.