Уæрæсейы Федерацийы Совет йæ пленарон рабадты сратификаци кодта Хуссар Ирыстонимæ сразыдзинад кæрæдзийы  ахуырад æмæ квалификаци банымайыны тыххæй. Уый тыххæй хъусын кæны «Парламентон газет».

Раздæр документ сратификаци кодта Уæрæсейы Федерацийы Паддзахадон Думæ.

Федерацийы Советы рабадты дунеон хъуыддæгты фæдыл Федерацийы Советы комитеты уæнг Сергей Цеков куыд банысан кодта, афтæмæй сразыдзинады нысан æрцыд сæйраг иумиаг ахуырад, астæуккаг иумиаг ахуырад, астæуккаг профессионалон            ахуырад, бакалавры дипломæй бафидаргонд уæлдæр ахуырад, специалисты кæнæ магистры дипломæй бафидаргонд уæлдæр ахуырадтæ дыууæ фарсæрдыгæй дæр банымайын.

«Банымайдзысты нотариалонæй сфидаргонд документты халдихтæ дæр», – банысан кодта сенатор.

Уыимæ иумæ дзырд цæуы зонадон квалификацитæ банымайыныл дæр.

Йæ ныхæстæм гæсгæ, уый уавæртæ сараздзæн студентон мобилондзинадæн, ахуырады фадыджы иумиаг проекттæ æмæ программæты реализацийæн.

«Хуссар Ирыстоныл куы дзурæм, уæд сразыдзинады реализацийы тыххæй мидпаддзахадон процедурæтæ ныридæгæн ауагъд æрцыдысты», – йæ ныхасмæ бафтыдта Цеков.

Ныр та, сразыдзинады ратификацийы фæстæ дыууæ бæстæйы Ахуырады министрадтæ æрдæг азмæ хъуамæ саразой экспертты комитет, документы практикон реализацийы фæстиуæгæн цы фарстатæ сæвзæра, уыдон аскъуыддзаг кæныны фæдыл рекомендацитæ саразыны тыххæй.

Хуссар Ирыстоны æмбæстæгтæн ацы документы нысаниуæг бахахх кодта Цæгат Ирыстонæй Федерацийы Советы уæнг Фадзайты Арсен. Уый банысан кодта, зæгъгæ, Хуссар Ирыстоны чи ахуыр кæны, хуссарирыстойнаг фæсивæды уыцы минæвæрттæн сразыдзинады реализацийы руаджы фадат уыдзæн сæ ахуыр Уæрæсейы адарддæр кæнын.

«Хуссар Ирыстоны цæрджытæ райгонд сты УФ Федерацийы Советæй», – загъта Фадзайты Арсен.

Бæрæг куыд у, афтæмæй 2017 азы 12 апрелы Хуссар Иыстоны æмæ Уæрæсейы Федерацийы ахуырадон ведомствоты ‘хсæн арæзт æрцыд сразыдзинад кæрæдзийы ахуырад æмæ квалификаци банымайыны тыххæй. Сразыдзинадыл сæ къухтæ æрфыстой Уæрæсейы Федерацийы æмæ Республикæ Хуссар Ирыстоны Ахуырад æмæ зонады министртæ Ольга Васильева æмæ Гасситы Натали.

Comments are closed, but trackbacks and pingbacks are open.