Адæймаг арæхдæр цы хæцгæ низтæй рынчын кæны, уыдоны фыццæгтæй иу у грипп. Зæгъæн ис, æмæ уый фæзыны афæдзы алы афон дæр, йæ вирустæ та вæййынц алыгъуызæттæ æмæ сæ хъæуы хи хъахъхъæнын, цæмæй æмбæстæгты æнæниздзинадæн ма батых кæной. Гриппы ныхмæ цахæм æвæстиат мадзæлттæ фæхъæуы райсын, уыдæтты тыххæй бахатыдтæн Цхинвалы районы поликлиникæйы дохтыр Гуыззыттаты Аллæмæ. Уый 2001 азы каст фæци Цæгат Ирыстоны медицинон академи, райдианы цалдæр азы бакуыста Дзæуджыхъæуы рынчындæттæй иуы æмæ фæстаг 7 азы та æмбæстæгты æнæниздзинадыл ауды ацы уагдоны.
– Грипп у ахæм низ, æмæ дзы ничи у хызт, бахæцы, куыд æнæниздзинадæй фидар æмбæстæгтыл, афтæ лæмæгъ адæймæгтыл дæр,- зæгъы Гуыззыттаты чызг. Цыбыр рæстæгмæ адæймаджы сисы йæ уæлныхты æмæ уымæ гæсгæ не ‘ппæты хæс дæр у, цæмæй дзы нæхи хъахъхъæнæм. Иугæр дзы адæймаг фæрынчын, уæд хъуамæ уынгмæ ма хиза, ма цæуа куыстмæ. Хъыгагæн, æмбæстæгты фылдæр хай уыцы амынддзинæдтæ мурмæ дæр нæ фæдарынц æмæ йын хос кæнынц æдзух къахыл лæугæйæ. Уый та раст нæу, уымæн æмæ уæд низ фæтыхджындæр вæййы, йæ хос кæныны рæстæг кæны дæргъвæтиндæр. Уымæй дарддæр ма, хæцгæ низ кæй у, уымæ гæсгæ парахат кæны æмæ дзы фæрынчын вæййынц æндæртæ дæр. Гриппæн йæ тæссагдзинад уый мидæг ис, æмæ дзы рынчын адæймаг æмбæлон æгъдауæй йæхи куынæ хъахъхъæна, уæд кæны карздæр, уый аххосæй бахъыгдард вæййынц æндæр органтæ дæр. Зæгъæм, мæгуырауæрдæм бандавы рæуджытæ, зæрдæ, уыргтыл. Райдианы тæвд кæнын райдайы – уый схизы 37,5- 39 градусмæ, адæймагæн йæ сæр ныууæззау вæййы, фæриссынц стджытæ, вæййы онгуагъд, фæриссы дзы сæр, фындзæй йæ улæфæн нал вæййы. Уый фæстæ райдайы хуыфын, уый та уымæн, æмæ фындзы улæфæнтæ фæрынчын вæййынц æмæ вирус фæстæмæ фæныхъуыры. Грипп бахæцыны рæстæджы райдианы хъæуы тагъд-тагъд дон нуазын, рынчын хъуамæ кæна хуысгæ. Рынчын кæм ис, уыцы хатæн хъуамæ уа сыгъдæг, æдтейæ уазал куы уа, уæд вирус тагъд мæлы, уымæ гæсгæ рæстæгæй рæстæгмæ хатæны рудзынг хъæуы байгом кæнын, цæмæй дзы сыгъдæг уæлдæф уа. Сывæллонæн йе ‘нæниздзинад лæмæгъ куы уа, уæд æй æнæмæнг хъуамæ басгара педиатр æмæ уый аскъуыддзаг кæны, хъæуы йын судзинтæ аразын æви нæ.
Зæгъын хъæуы, фарон æмæ æндæр азтимæ абаргæйæ, ацы аз гриппæй рынчынты нымæц кæй у тынг цъус æмæ уый у æхсызгон хъуыддаг. Уый уымæн, æмæ ацы аз зымæг раджы æрбалæууыд, æмæ, уæлдæр куыд загътон, афтæмæй уазал куынæг кæны гриппы вирустæ.
Гуыззыттаты чызг мын раппæлыд, йемæ цы медицинон хо кусы, уымæй-Туаты Заирæйæ. Йæ хъуыддаг зоны хорз æмæ мын æдзухдæр кæны зæрдиаг æххуыс, рынчынæн куы хос кæнæм, уæд. Фылдæр нæм фæцæуынц кардзыд адæм, уыдонæн та рæвдыд æмæ фæлмæн ныхас тынгдæр фæхъæуы. Уыцы раппæлинаг миниу-джытæй та æххæст у Туаты чызг дæр æмæ дзы бузныг дæн куыд мæхæдæг, афтæ пациенттæ дæр.
Хуыбиаты Н.
Comments are closed, but trackbacks and pingbacks are open.