Уæхи гриппæй бахизут

Уалдзæг æмæ фæззæджы æрлæудимæ скарз вæййынц гриппы алы хуызтæ. Грипп фæзыны æнæнхъæлæджы, вирус куыддæр бахауы адæймаджы организммæ, афтæ цалдæр боны фæстæ йæ нысæнттæ раргом вæййынц. Грипп уæлдай тæссагдæр у сывæллæттæн æмæ хистæр кары адæймæгтæн, уымæн æмæ уыдонæн сæ организм æмхиц у алыгъуызон вирустæм, сæ иуммунон системæ вæййы лæмæгъ. Гриппæн иуæй-иу хатт уæззау фæстиуджытæ вæййы, афоныл ын куыннæ схос кæнай, уæд, лæмæгъ кæны организмы æмæ уый фæстиуæгæн скарз вæййынц адæймаджы æндæр хроникон низтæ дæр.

Дунейы медицинон центртæ æппæт дæр аразынц, цæмæй гриппы алы хуызтæн дæр арæзт цæуа æмбæлон вакцинæтæ. Алы хуызты информацион фæрæзты фæрцы сидынц се ‘мбæстæгтæм, цæмæй сын уæлæнгай ахаст ма уа вакцинæ аразыны хъуыддагмæ. Уый фæстиуæгæн уыдон уæлдзæг æмæ фæззæджы æрлæудимæ сæ бакæнынц гриппы ныхмæ вакцинæ аразыны компани. Куыд алы аз, афтæ ныр дæр нæ республикæйы Æнæниздзинад хъахъхъæныны министрад æмткæй нæ республикæйы цæрджыты ифтонг кæны гриппы ныхмæ вакцинæтæй. Ныртæккæ уыцы куыст куыд æххæст цæуы нæ республикæйы сывæллæтты поликлиникæйы, уый фæдыл нын цыбыртæй радзырдтой республикæйы сæйраг педиатр Зассеты Ольгæ æмæ педиатр Бæгъиаты Джульеттæ. Уыдон куыд загътой, афтæмæй ацы аз æдæппæт республикæйæн заказгонд æрцыд 4000 бæрц гриппы ныхмæ вакцинæйы. Уыдонæй 18-æм октябрмæ арæзт æрцыдис 1417 бæрц. Кæй зæгъын æй хъæуы, уыцы нымæцыл куыст не ‘рлæууыд, фæлæ дарддæр вакцинацигонд цæуынц æнæхъæн республикæйы сабитæ. Иу ныхасæй, зæгъæн ис, йæ тæккæ тæмæны кæй ис вакцинæ аразыны хъуыддаг. Активонæй вакцинаци цæуынц канд горæты сывæллæттæ нæ, фæлæ районты сабитæ дæр. Тынг стыр цымыдисдзинад æмæ æмбарындзинад вакцинацитæ аразыны хъуыддаджы æвдисынц сывæллæтты ныййарджытæ. Уыдонæй бирæтæ вакцинæ аразыны фæдыл кæд информаци бакæсынц интернеты, уæддæр сæм ацы хъуыддаджы фæдыл сæвзæры бирæ фарстытæ. Кæй зæгъын æй хъæуы, уыдонимæ лæмбынæг аныхас кæнынц нæ поликлиникæйы педиатртæ æмæ сын сæ фарстатæн раттынц дырыс дзуаппытæ. Зассеты Ольгæ куыд загъта, афтæмæй вакцинæ заказ æрцæуы Уæрæсейы Федерацийы. Йе скондмæ гæсгæ сывæллæтты вакцинæ хицæн кæны хистæр кары адæмы вакцинæтæй æмæ заказгонд æрцæуы хицæнæй. Уымæн æмæ сывæллæтты вакцинæ хъуамæ уа сыгъдæг куыст æнæ консерванттæй, цæмæй йæ сывæллæтты организм хуыздæр айса. Банысан кæнын мæ фæнды уый, æмæ хистæр кары адæмæй бирæтæ фæзæгъынц, зæгъгæ, гриппæй рынчын нæ дæн æмæ вакцинæ аразын дæр цæмæн хъæуы. Иууыл ахсджиагдæр уый у, æмæ цалынмæ нæ фæрынчын уа адæймаг, уæдмæ аразын хъæуы вакцинæ, цæмæй куы фæрынчын уа, уæд æй æнцон-дæрæй схæсса йæ организм, уымæн æмæ вакцинæ аразыны фæстæ цæттæ уыдзæн вирусимæ тох кæнынмæ.

Ацы аз цы вакцинæ заказ æрцыд, уый у «сови», гриппы ныхмæ. У тынг хорз медицинон препарат æнæ консерванттæй, сыгъдæг, æнцонтæй йæ айсы адæймаджы организм. Вакцинæтæ арæзт цæуынц нæ республикæйы скъолаты. Аразынц сæ нæ медицинон кусджытæ, цалынмæ вакцинæ арæзт не ‘рцæуы, уæдмæ сывæллон æрцæуы сгæрст. Кæд æм рынчыны симптомтæ нæй, уæд æрцæуы вакцинацигонд, кæннод банхъæлмæ кæсæм, цалынмæ бæстондæрæй сæнæниз уа сывæллон, уæдмæ. Вакцинæтæ арæзт цæуынц 1-11 къласы онг сывæллæттæн. Æнæ ныййарджыты разыдзинадæй медицинон кусджытæн нæй бар, æмæ сывæллонæн саразой вакцинæ, уымæ гæсгæ скъолайы медицинон хо ныййарджытæм сæрвиты хъусынгæнинаг, æмæ кæд разы сты, уæд уыцы хъусынгæнинагыл ныййарæг йæ къух æрфыссы. Сывæллæтты цæхæрадоны хъомылгæнинæгтæн та вакцинæ арæзт æрцæуы поликлиникæйы, уымæн æмæ уыдон æгæр чысылтæ сты, цæмæй сын æнæ ныййарджытæй вакцинæ арæзт цæуа. Бæрæг нæ вæййы, вакцинæ сывæллоныл куыд фæзындзæн æмæ уымæ гæсгæ хуыздæр у, цæмæй вакцинæ аразыны рæстæджы йæ ныййарæг йæ фарсмæ уа æмæ йæм йæ хъус дара.

Сæ ныхасы кæрон ма нæ педиатртæ бахатыдысты, цæмæй ныййарджытæ лæмбынæг сæ хъус дарой æмæ биноныг ахаст равдисой ацы вакцинæ аразыны хъуыддагмæ. Уымæн æмæ не ‘хсæнады фæстаг рæстæджыты фæзындис цахæмдæр адæм, кæцытæ парахат кæнынц ахæм информаци, зæгъгæ, вакцинæтæ пайдахæссæг не сты организмæн, æмæ уыцы ныхæстæм хъусын нæ хъæуы, фæлæ ныхас ацы фарсты фæдыл кæнын хъæуы, медицинон кусджытимæ. Биноныг ахаст дарын хъæуы, адæймагæн куыд йæхи организммæ, афтæ йæ сабийы организммæ дæр.

Танделаты Виленæ