Нæ республикæйы астæуккаг скъолаты ахуыргæнджытæн æрвылаз дæр уагъд æрцæуынц квалификаци бæрзонддæргæнæн курсытæ алыгъуызон предметтæй. Æмæ уый афтæ дæр хъуамæ уа, уымæн æмæ кæцыфæнды дæсныйады кусджытæ дæр, уæлдайдæр та — ахуырад æмæ æнæниздзинад хъахъхъæныны къабазы специалисттæ сæхиуыл æппынæдзух куынæ кусой, курсытæ æмæ сын семинартæ уагъд куынæ цæуой, уæд сæ куысты фæстиуджытæ нæ уыдзысты зæрдæйы фæндиаг, уымæн æмæ зонад размæ цæуы æмæ хъуамæ йемæ æмдзу кæнай, хатт та йæ разæй дæр хъуамæ фæуай.

Уый хынцгæйæ, æрвылаз дæр Республикæ Хуссар Ирыстоны Хицауады фæрцы квалификаци бæрзонддæргæнæн курсытæ рацæуынц дæсгай специалисттæ куыд нæ республикæйы территорийыл, афтæ уымæн æддейæ дæр. Æцæг ныр дыууæ азы бæрц коронавирусы пандемийы аххосæй сæ авналæнтæ иу чысыл фæцыбырдæр сты, фæлæ уæддæр, уымæ нæ кæсгæйæ, куыст дарддæр цæуы ацы къабазы. РХИ-йы Ахуырад æмæ зонады министрад æмæ ацы министрады дæлбар организаци квалификаци бæрзонддæргæнæн институт æрвылаз дæр бацархайынц æмæ курсытæ ауадзынц нæ республикæйы ахуыргæнджытæн, сабидæтты хъомылгæнджытæн.

Куыд иннæ азты, афтæ та ацы аз дæр курсытæ æмæ семинартæ уагъд æрцыдысты æмæ ныр дæр уагъд цæуынц нæ республикæйы сæдæгай ахуыргæнджытæн. РХИ-йы Ахуырад æмæ зонады министрады цур квалификаци бæрзонддæргæнæн институты директор Къæбулты Заирæ нын бæстондæрæй радзырдта, курсытæ уагъд кæцы предметты ахуыргæнджытæн æрцыдысты, уый тыххæй. «РХИ-йы Ахуырад æмæ зонады министрады фæхуындмæ гæсгæ нæ республикæмæ æрцыдысты педагогон зонæдты доктор, Цæгат Кавказы Федералон университеты эксперименталон физикæйы кафедрæйы профессор, астæуккаг скъолаты физикæ сахуыр кæныны нырыккон ахастыты программæйы фæдыл ахуыргæнæг Агибова Ирина.  Цæгат Кавказы Федералон уни-верситеты юридикон институты «Æмбæстагон барад æмæ процессы» кафедрæйы сæргълæууæджы хæстæ æххæстгæнæг, хъомыладон куысты фæдыл юридикон институты директоры хæдивæг, юридикон зонæдты кандидат Жуков Алексей (къорды къухдариуæггæнæг). Цæгат Кавказы Федералон университеты теори æмæ физикон культурæ æмæ спорты кафедрæйы профессор, педагогон зонæдты доктор, иумæйаг физкультурон ахуырады концептуалон, программон æмæ ахуырадон-методикон ифтонгад баххæст кæныны нырыккон уавæр æмæ перспективæты программæйы фæдыл ахуыргæнæг Лукьяненко Виктор.

Цæгат Кавказы Федералон уни-верситеты алгебра æмæ геометри-йы математикон анализы кафедрæ-йы доцент, педагогон зонæдты кан-дидат Роженко Ольга. Историон зо-нæдты кандидат, Ростовы областы паддзахадон архивы директор, Хус-сар Федералон университеты соци-ологи æмæ регионзонынады институты Стыр Кавказы иртасæнты центры къухдариуæггæнæг Трапш Николай. Историон зонæдты кандидат, Цæгат Кавказы Федералон университеты историйы кафедрæ-йы доцент Шафранова Ольга.

19-æм октябрæй 23-æм октябрмæ уыдон квалификаци бæрзонддæргæнæн курсытæ ауагътой нæ республикæйы скъолаты физикæ, математикæ, истори æмæ æхсæнадзонад æмæ физкультурæйы ахуыргæнджытæн. Нæ республикæйы коронавирусы пандемийы апарахаты фæстиуæгæн карантин баконд кæй æрцыд, уымæ гæсгæ æрхонгæ специалисттæ æмæ республикæйы скъолаты ахуыргæнджытæн цыбыр рæстæгон фембæлд уыд нæ горæты 2-æм астæуккаг скъолайы, кæцыйы фæстиуæ-гæн кæрæдзимæ радтой сæ координаттæ æмæ афтæмæй курсытæ уагъд цыдысты æмæ абоны онг дæр уагъд цæуынц онлайн-режимы.

«Абоны онг дæр нын уагъд цæуынц практикон ахуыртæ дистанцион æгъдауæй. Уæрæсейаг спе-циалисттæ нын радтой хæслæвæрдтæ æмæ сæ мах дæр æххæст кæнæм. Кæй зæгъын æй хъæуы, курсытæ нын радтой ног зонындзинæдтæ æмæ сæ райгондæй баззадыстæм. Уæрæсейаг специалистты хæс у нырыккон ахуырадон техно-логитæ æмæ зонадон-методикон бакуыстытимæ нæ базонгæ кæ-нын», — банысан кодта нæ горæты 2-æм астæуккаг скъолайы физикæйы ахуыргæнæг Гæджиты Илитæ.

23-æм октябрæй 29-æм октябрмæ та квалификаци бæрзонддæргæнæн курсытæ уагъд цыдысты æмæ ныр дæр цæуынц нæ республикæйы астæуккаг скъолаты химийы ахуыргæнджытæн, сабидæтты хъомылгæнджытæ æмæ сæргълæуджытæн, республикæйы скъолаты директортæн. «Скъолайы агъоммæйы кары сывæллæтты функционалон ахуырдзинад радтыны актуалон фарстыты» программæйы фæдыл курсытæ ауадзыны тыххæй нæ республикæмæ æрцыдысты педагогон зонæдты кандидат, Цæгат Кавказы Федералон университеты психологон-педагогон факультеты педагогикæ, методологи æмæ технологийы кафедрæйы хистæр ахуыргæнæг Лысенко Нина.

«Скъолайы агъоммæйы кары менеджмент»-ы программæйы фæдыл сабидæтты хъомылгæнджытæн лекцитæ бакаст психологон зонæдты кандидат,  Цæгат Кавказы Федералон университеты психологон-педагогон факультеты педагогикæ, методологи æмæ технологийы кафедрæйы доцент Соломонов Владимир. «Астæуккаг скъолайы хими сахуыр кæнынмæ нырыккон ахастытæ»-йы программæйы фæдыл курсытæ ауагъта химион зонæдты кандидат, Цæгат Кавказы Федералон университеты химион-фармацевтон факультеты органикон æмæ аналитикон химийы кафедрæйы доцент Демидова Наталья. «Нырыккон скъолайы ахуырады управленийы барадон æмæ организацион бындуртæ»-йы программæйы фæдыл та скъолаты къухдариуæггæнджытæн лекцитæ бакастысты юридикон зонæдты кандидат, Цæгат Кавказы Федералон университеты юридикон институты кафедрæйы сæргълæууæг Терещенко Елена æмæ юридикон зонæдты кандидат, юридикон институты административон æмæ финансон барады кафедрæйы  доцент Трофимов Максим.

Нæ горæты 2-æм сабидон «Золотой ключик»-ы хъомылгæнæг Санахъоты Маринæ дæр райгондæй баззад курсытæй. «Цы ногдзинæдтæ базыдтам, уыдон нын фæахъаз уыдзысты нæ дарддæры куыстæн. Спайда сæ кæндзыстæм нæ ахуыр-хъомыладон архайды», — загъта уый.

Къæбулты Заирæ куыд банысан кодта, уымæ гæсгæ мадзæлтты комплексы фæлгæтты сæ квали-фикаци фæбæрзонддæр кæндзысты хуссарирыстойнаг 1000 специалистæй фылдæр, уыцы нымæцы — педагогон кусджытæ, ахуырады системæйы управленийы кусджытæ, паддзахадон æмбæстагон службæгæнджытæ, аразджытæ æмæ энергетиктæ. Ахуырты фылдæр хай уагъд цæуы онлайн-режимы. Курсыты хатдзæгтæм гæсгæ хъусджытæ райсдзысты, документтæ квалификаци бæрзонддæргæнæн курсытæ кæй рацыдысты, уый тыххæй.

Курсытæ уагъд цæуынц Уæрæсейы Федерацийы Зонад æмæ уæлдæр ахуырады министрады пад-дзахадон хæслæвæрд «Ахуырад, зонад æмæ фæсивæдон политикæйы къабазы мадзæлтты комплекс среализаци кæнын»-ы фæлгæтты. Паддзахадон хæслæвæрд фæзынд РХИ-йы Хицауады иници-ативæмæ гæсгæ æмæ йæ реали-заци кæнынц Цæгат Кавказы Федералон университеты специалисттæ (горæт Ставрополь).

Къæбулты Заирæйы ныхæстæм гæсгæ, 8-æм ноябрæй фæстæмæ та курсытæ уагъд цæудзысты нæ республикæйы скъолаты æндæр æмæ æндæр предметты ахуыргæнджытæн.

ДЖИОТЫ Екатеринæ

Comments are closed, but trackbacks and pingbacks are open.