19-æм январы, куыд æппæт дунейы чырыстон бæстæтæ, афтæ Хуссар Ирыстоны дæр банысан кодтой ацы стыр æмæ уаз бæрæгбон – Доныскъæфæн. Ацы бæрæгбонмæ Чырыстон диныл хæст адæм сæхи фæцæттæ кæнынц развæлгъау. Афтæ уыд ныр дæр.

Куыд зонæм, афтæмæй ирон адæммæ фыдæлтæй фæстæмæ, Ногбонæй æхсæз боны куы рацæ-уа, уæд фæнысан кæнынц ацы диссаджы бæрæгбон. Доныс-къæфæн сæйраджыдæр баст у Чырыстиимæ. Ацы бон Чырыстийыл дзуар бафтыдта Иоанн æмæ доныаргъуыд райста цæугæдон Иорданы. Уымæ гæсгæ йæ Чырыстон адæм алы аз дæр нысан кæнынц стыр цытимæ æмæ сын у ахсджиаг.

Нæ республикæйы адæм фæстаг цалдæр азы активондæрæй райдыдтой цæуын нæ горæты Мадымайрæмы аргъуанмæ. Уый хыгъд, бæрæг фæфылдæр сты Чырыстон диныл хæст адæм дæр. Уымæ гæсгæ нæ адæм дæр аккагыл банымадтой Доныскъæфæны бæрæг-бон æгъдаумæ гæсгæ банысан кæнын.

Цыппæрæмы райсомæй бирæ адæм æрбацыд горæты Мадымайрæмы аргъуаны цурмæ. Цыдысты аргъуанмæ, дæргъвæтин рæстæг куывтой æмæ сыгътой цырæгътæ. Райсомæй дзы уагъд æрцыд бæрæгбонон службæ, уый фæстæ аргъуанæй сæ фæндаг акодтой Леуахимæ. Ацы бон адæм кæрæдзийæн зæрдиаг арфæтæ кодтой бæрæгбоны цытæн, зæгъгæ, бæрæгбоны арфæ æнæмæнгæй дæр æрцæуы. Леуахийы цæугæдоны былмæ цæугæйæ, адæм семæ хастой сыгъдæг донгæрзтæ, цæмæй фæстæмæ ахастаиккой, уыцы диссаджы сыгъдæг донæй.

Чырыстон дины амындмæ,   гæсгæ 18-19 январмæ æхсæвы æмæ æгас боны дæргъы зæххыл цыдæриддæр дæттæ ис, уыдон иууылдæр вæййынц сыгъдæг. Ацы бон æрмæст найын нæ хъæуы, фæлæ ма хъуамæ мигæнæны сисай уаз донæй æмæ йæ афæдзы дæргъы дарай дæ хæдзары. Аргъуаны кусджытæ доныл куы саргъуыдтой, уæд уый фæстæ фыд Иаков бахызт ихджын донмæ æмæ фыццаг рады доны аргъуыд райсын кодта сывæллæттæн, уый фæстæ та æнхъæлмæ чи каст, уыцы хистæр фæсивæдæн. Ацы бон тынг бирæ адæм райстой доны аргъуыд. Уымæй дарддæр ма доны аргъуыд чи нæ иста, нæ республикæйы уыцы адæймæгтæй бирæтæ та традицимæ гæсгæ цыдысты Леуахийы былмæ, æмæ-иу сæхи хъæлдзæг æмæ сыгъдæгзæрдæйы уагимæ ныннадтой сыгъдæг, уаз доны. Уыдон куыд зæгъынц, уымæ гæсгæ æппындæр нæ рахатынц зымæгон уазал доны. Зæгъгæ, уый баст у ацы диссаджы уаз бæрæгбонимæ æмæ сын сæ тыхтæм ноджы æрбафтауы тыхтæ æмæ уырнынад. Уымæй дарддæр ма райсынц æгæрон удæхцондзинад. Уымæн та ныхæстæй нæй зæгъæн, æмæ ма æндæртæм дæр сидтысты, цæмæй йæ уыдон дæр банкъарой сæхиуыл.

Адæмы уырнынадмæ гæсгæ, ацы бон æппæт суадæттæ æмæ цæугæдæттæн вæййы алæмæттаг хосгæнæн тых, æмæ уый зонгæйæ, ацы бон доны аргъуыды рæс-тæджы Хуыцаумæ кувæг адæмæй йæ ныфс чи хаста ихджын донмæ, уый-иу дзы цалдæр хатты дæр аныгъуылд. Чырыстон дин куыд амоны, афтæмæй ацы дыууæ бон цыфæнды уазал доны дæр дæхи куы ныннайай, уæддæр нæ фæрынчын уыдзынæ, æмæ æцæг афтæ дæр у. Доны аргъуыд чи райсы, уыдон алы хатт дæр фæхатынц цавæрдæр удæнцойдзинад. Стæй ма ацы боны донæн уыйас тых ис, æмæ дзæбæх кæны алыгъуызон низтæ.

Рагæй фæстæмæ нæ фыдæлтæ дæр ацы бон райсом раджы æнæ-дзургæйæ цыдысты хъæуты цы суадæттæ цыдысты уырдæм, æмæ-иу дзы æрдавтой сыгъдæг донгæрзты, бапырх-иу дзы кодтой хæдзары къуымты, уый фæстæ-иу уыцы донгарз нывæрдтой сæрмагонд ран, бинонтæ йæ куыд зыдтаиккой. Зæгъæм, сывæллон-иу куы фæрынчын, уæд-иу æй уыцы донæй асæрфтытæ кодтой, кæнæ-иу ын дзы бадардтой, æмæ-иу уæд рынчын адзæбæх.

Банысан кæнын хъæуы уый, æмæ ацы бон доны аргъуыд чи истой, уыдонæн Леуахийы былыл æвæрд кæй æрцыд сылгоймæгтæ æмæ нæлгоймæгтæн хицæн цатыртæ, цæмæй дзы раивтаиккой сæ уæлæдарæс æмæ схъарм кодтаиккой сæхи. Донаргъуыды цытæн ма ист æрцыдысты æдасдзинады фæдыл мадзæлттæ дæр. Цæугæдоны лæууыдысты æмæ сæ хъус лæмбынæг дардтой аргъуыды процессмæ нæ республикæйы Уæлвæткон уавæры министрады æмæ милицийы кусджытæ, кæцытæ цæттæ уыдысты æххуысмæ.

ЦХУЫРБАТЫ Ларисæ

Comments are closed, but trackbacks and pingbacks are open.