Фидӕны зӕрдӕргъӕвд хӕххон инженер Гӕбӕраты Руслан Лентъойы фырт райгуырд Цхинвалы районы Залдайы хъӕуы бирӕсывӕллонджын бинонты ‘хсӕн. Райдианы ахуыр кӕнынмӕ бацыд сӕхи хъӕуы 7-азон скъоламӕ, уый фӕстӕ та йӕ ахуыр адарддӕр кодта Цхинвалы 2-ӕм скъолайы. Ахуырмӕ ӕвзыгъд ӕмӕ цыбӕл кӕстӕр, ӕппӕт предметтӕ дӕр ахуыр кодта зӕрдиагӕй, фӕлӕ уӕддӕр иууыл ӕввахсдӕр йӕ зӕрдӕмӕ айста математикӕ. Уымӕ гӕсгӕ дзы йӕ ахуыргӕнджытӕ ныфс ӕвӕрдтой, сомбоны хорз математик-инженер кӕй рацӕудзӕн, уымӕй. Райдианы йӕ бӕллиц уыд хӕдтӕхӕгскъӕрӕг суӕвын, фӕлӕ ӕвзонджы бӕллицтӕ, фылдӕр хатт раив – баив фӕкӕнынц, ӕмӕ фӕстӕдӕр ахуыр кæнынмæ бацыд Буроны профессионалон-техникон ахуыргӕнӕндонмæ. Каст æй фӕуыны фӕстӕ кусын райдыдта Садоны ӕрзӕткъахӕн управленийы слесарӕй. Уӕдмӕ йӕм ӕрсидтысты Советон Ӕфсадмӕ ӕмӕ йе ‘мбӕстагон хӕс бафыста Саратовы областы Энгельсы горӕты. Коммӕгӕс салдат ӕвдыста хорз ӕфсӕддон цӕттӕдзинад ӕмӕ фӕстӕдӕр ссис хайады командир. Йе службӕ намысджынӕй кӕй ӕххӕст кодта, уый тыххӕй йӕ ныййарджытӕм арфӕйы фыстӕг ӕрӕрвыста æфсæддон хайы командир.

Йе ‘фсӕддон хӕс намысджынӕй ахицӕн кӕныны фӕстӕ афтыд Норильскы горӕтмӕ ӕмӕ каст фӕци индустриалон институт. Райдианы куыста бурӕгӕнӕг, уый фӕстӕ та – сменӕйы мастерӕй. 1977 азы ӕрцыд йӕ райгуырӕн къуыммӕ цæттæ специалистæй. Æмӕ йын бауынаффӕ кодтой, цӕмӕй бакуса Цънелисы «Грузтальк»-ы куыстуаты сӕйраг инженерӕй. Гӕбӕрайы фырт сразы, уымӕн ӕмӕ хорз зонгӕ уыд пайдайаг къахинӕгты технологиимӕ. Ацы куыстуаты кусгӕйӕ, уый йӕхи равдыста аккаг инженерӕй. Гӕбӕрайы фырт йӕ хъусдард аздӕхта куысты уавӕртӕ фӕхуыздӕр кӕнынмӕ, афтӕ ма куыстуаты материалон-техникон ифтонгадмӕ. Фӕлӕ уӕддӕр Гӕбӕрайы фыртӕй рох нӕ уыд йӕ зонындзинӕдтӕ фылдӕр кӕнын ӕмӕ фӕсаууонмӕ ахуыр кæнынмæ бацыд Алма-Атайы политехникон институты сӕудӕджерадон рауагъд ӕмӕ арӕзтады факультетмæ ӕмӕ йӕ ӕнтысгӕйӕ каст фӕци 1979 азы. Уый фӕстӕ слӕууыд Цънелисы куыстуаты сӕргъ ӕмӕ дзы намысджынӕй бафӕллой кодта 1988 азы онг. Уыцы рӕстӕджы куыстуатæн уыд цӕдисон нысаниуӕг ӕмӕ Гӕбӕрайы фырт арӕх цыд Министрадмӕ Мӕскуымæ. Бирæ фæндæттæ раразмæ кодта, кæцытæ здæхт уыдысты куысты ахадындзинад фæбæрзонддæр кæнынмæ. Йæ арæхстдзинад ын æнæхатгæ нæ фесты министрады æмæ йæ снысан кодтой Амуры областы каолины комбинаты сæргълæууæгæй, уымӕн ӕмӕ йӕ хъуыддӕгтӕ нӕ цыдысты зӕрдӕйы фӕндиаг. Каолинæй та пайда кӕнынц целюлезон сӕудӕджерады. Куыстуаты куыстой зонӕдты 12 докторы, йӕ продукци йын ӕрвыстой Китай, Япон ӕмӕ бирӕ ӕндӕр фӕсарӕйнаг бӕстӕтӕм. Ацы куыстуаты Гӕбӕрайы фырт афӕдзӕй фылдӕр куы бакуыста, уӕд ӕй снысан кодтой тальчы сӕудӕджерады дунейы стырдӕр тальккуыстгæнæг куыстуæттæй сæ иуы директорӕй, уый та уыд Челябинскы Миасы комбинат. Ацы куыстуаты дæр Гӕбӕрайы фырт уарзон ӕмӕ ӕввахс адӕймаг ссис ӕппӕт коллективӕн. Куыстуаты бирӕбӕрцӕй фӕхуыздӕр сты экономикон бӕрӕггӕнӕнтӕ ӕмӕ кусджыты куысты уавӕртӕ. Комбинат афӕдзы дӕргъы продукци уагъта 120 мин тоннӕйы. Гӕбӕрайы фырт тынг хорз ӕмбӕрста, ссад тальчы продукцийы гуырахст фӕфылдӕр кӕнгӕйӕ, кӕй фӕфылдӕр уыдзысты куыстуаты ӕфтиӕгтӕ ӕмӕ кусджыты куыстмызд. Ног директоры фӕрцы горӕт фервӕзт тальчы рыгӕй, куыст ӕппӕт фӕдыздӕхты дӕр уыд йӕ бынаты, кусджытӕ истой ӕмбӕлон мызд. Мӕнӕ цы фыста уыцы рӕстӕджы уацхӕссӕг Кареев А. газет «Миасский рабочий»-ы: «Ӕз бахъуыды кодтон, горӕххӕсткомы ӕмбырды тальчы комбинатмӕ ног директоры куы бавдыстой, уыцы бон. Фӕлӕ мӕ иууыл тынгдӕр дисы баппӕрста йӕ раныхас. Ног директор ӕрдзырдта тынг разӕнгардӕй комбинаты перспективӕты тыххӕй». Ӕцӕгдӕр, Руслан куыстуаты тагъд рӕстӕджы фенын кодта йӕ хорздзинӕдтӕ.

Уымӕн уыцы рӕстӕджы нӕ уыд ӕрӕнцой ӕмӕ йын Министрады ӕрдыгӕй уыд стыр кад. Комбинаты разамонӕг ӕвзаргӕйӕ алы хатт дӕр 6-8 кандидаты ‘хсӕнӕй кӕддӕриддӕр рацыд уӕлахизӕй. Йе ‘нӕзӕрдӕхудт ӕмӕ цӕсгом-джын куысты тыххӕй «Союзнеруд»-ы генералон директоры ӕрдыгӕй хорзӕхджын цыд грамотӕтӕй. Аразӕджы боны цытӕн уый йӕ арфӕйы фыссы, зӕгъгӕ, «Союзнеруд»-ы ӕмкусджытӕ сымах зонынц хъаруджын ӕмӕ хорз разамонӕгӕй, бахастай уӕзгӕ бавӕрд куыстуаты размӕцыдмӕ. Ӕндӕр арфӕйы та дзырдӕуы, зӕгъгӕ, куыстуаты арӕхстджын организатор, стыр хъусдард здахыс. Ӕндæр арфæйы та дзырдæуы, зæгъгæ, ды  дæ  куыстуаты размӕцыдмӕ, ӕдзухдӕр архайут куыстуаты бастдзинад зонадимӕ сфидар кӕнынмӕ.

Руслан цалдӕр хатты ӕвзӕрст ӕрцыд горӕтон Советмӕ депутатӕй, уыд Челябинскы областон Советы уӕнгты къухдариуӕггӕнӕг. Директор ӕй ма куы куыста, уӕд сарӕзта контракт 5 милуан доллары аргъ англисаг комбинат «Нью-Эйдж Технолоджи»-имӕ, фӕлӕ бӕлвырд аххосӕгтӕм гӕсгӕ уыцы контракт бакъуылымпы. Гӕбӕраты Руслан фæстæдæр æрцыд Сочимӕ ӕмӕ цыппар азы бакуыста ООО «Хоста-торг»-ы директорӕй. Фӕлӕ уӕддӕр адӕймаджы тынгдӕр йӕхимӕ ӕлвасы райгуырӕн къуым æмæ фæстæмæ Ирыстонмæ æрыздæхгæйæ, нысан æрцыд Цхинвалы горӕты администрацийы сӕргълӕууӕджы хӕдивӕгӕй ӕмӕ дзы бакуыста цасдæр рæстæджы.

Ӕвзыгъд къухдариуӕггӕнӕг Гӕбӕраты Русланы тыххӕй мӕнӕ цы зӕгъынц не ‘мбӕстӕгтӕй цалдӕр. Тадтаты Ӕхсар загъта, зӕгъгӕ, «Тальчы» куыстуаты кусгӕйӕ, уый бирӕ сарӕзта кусджыты куысты уавӕртӕ фӕхуыздӕр кӕныныл. Ацы куыстуатӕй ӕндӕр бынатмӕ кусынмӕ куы ацыд, уӕддӕр ын Цънелисы куыстуатимӕ уыд бастдзинад, ӕххуыс ын кодта фӕсауӕрц хӕйттӕй. Цънелисы астӕуккаг скъолайы раздӕры директор Дзеранты Мухар мысы, зӕгъгӕ, ацы куыстуатмӕ бахаста бирӕ ногдзинӕдтӕ, йӕ материалон-техникон фӕлындзынад фӕхуыздӕр кӕныны тыххӕй  йын уыд хорз авторитет.

Гӕбӕрайы фырт ма у хорз бинонты хицау, йе ‘мкъаимӕ схъомыл кодтой ӕртӕ хъӕбулы. Йӕ фырт Руслан кусы Сочӕйы кондитерон фирмӕйы директоры хӕдивӕгӕй, йӕ чызг Людмилӕ та у ацы фирмӕйы кондитер ӕмӕ Сӕлимӕт та цӕры Санкт-Петербурджы, у дохтыр.

Ахӕм у не ‘мбӕстаг Гӕбӕраты Русланы цард ӕмӕ хӕрзиуӕгон архайд.

Хуыбиаты Никъала

Comments are closed, but trackbacks and pingbacks are open.