Цхинвалы фæзындзæн базарадон-хиирхæфсæн центр. Уый тыххæй фехъусын кодта РХИ-йы Экономикон рæзты министр Зæгъойты Вильям.
«Цæрджыты царды гъæды бирæ бæрæггæнæнтæй сæ иу у базарадон инфраструктурæ æмæ хиирхæфсæн фæзуæтты рæзты æмвæзад, – банысан кодта уый. – Æмæ кæд базарадон инфраструктурæйы æнкъардæуы бæрæг рæзт, уæд хиирхæфсæн индустри та Хуссар Ирыстоны зынгæбæрцæй фæстейæ зайы нырыккон стандарттæй.
Фæлæ уæддæр ацы здæхты куыст цæуы æмæ арæзт æрцыд ног къахдзæф размæ».
Цы ратдзæн ахæм центры фæзынд, афтæ ма экономикæмæ хауæг æндæр плæнтты тых-хæй лæмбынæгдæр йæ интервьюйы дзуры экономикон ведомствойы сæргълæууæг.
– Хуссар Ирыстоны экономикæйы реалон секторæн æххуысы тыххæй арæзтцæуæг Ин-вестицион агентад райста уынаффæ нæ горæты Джиоты Аланы проспекты базарадон-хиирхæфсæн центры финанскæнынады тыххæй, цæмæй арæзтад кæронмæ фæуа. Уый не ‘мбæстæгтæн фадат ратдзæн, æрмæст гъæдджын базарадон лæггæдтæ райсынæн нæ, фæлæ ма рæстæг цымыдисонæй арвитынæн дæр. Уыдоны ныр нал хъæудзæн сæ сывæллæтты республикæйæн æдтæмæ кæнын, цæмæй сæ рæстæг, куыд æмбæлы, афтæ арвитой.
Базарадон-хиирхæфсæн центртæ раджы фæзындысты куыд стыр горæтты, афтæ къаддæр горæтты дæр. Уымæйдæр горæты инфраструктурæйы ахæм объекттæ нымад цæуынц, цæрджыты сæхимæ тынгдæр чи æлвасынц, ахæмтыл. Уымæн æмæ алы цæрæгæн дæр ахсджиаг у базарадон лæггæдтæ хорз æмвæзадыл исын æмæ уыимæ сæрибар рæстæг цымыдисонæй арвитын.
Базарадон-хиирхæфсæн центры инвестициты иумæйаг гуырахст у 150 милуан сомы, уыдонæй инвесторы хи фæрæзтæ сты 60 милуан сомы, иннæты та хицæн кæны Инвестицион агентад. Афтæмæй хæрзæввахс рæстæджы Цхинвалы фæзындзæн ног базарадон фæзуат æмæ хиирхæфсæн центр иу агъуысты бын лæггæдты нырыккон æмвæзадимæ.
– Вильям Юрийы фырт, экономикæйы реалон секторы ныртæккæ цахæм проекттæ кусынц?
– Базарадон-хиирхæфсæн центр экономикæйы реалон секторы къабазы фыццаг проект нæу. Махмæ кусы нырыккон кафе «Винченцо», кæцы ссис горæттæгты уарзон бынат, райдыдта кусын гом акционерон æхсæнад «Владимирский стандарт»-ы проектмæ гæсгæ авгын мигæнæнты минералон донуадзæн хахх. Ацы проект реализаци æрцыд хицæн инвесторы руаджы, æнæ Инвестагентады æххуысæй. Хъæууон хæдзарады къабазы реализаци цæуы проект «Ирыстоны дыргъдæт-тæ», цалдæр къуырийы фæстæ та байгом уыдзæн дзидзагуыстгæнæн комплекс «Растдон».
Уымæй дарддæр ма скъуыддзаг æрцыд Цхинвалы нырыккон уазæгдоны арæзтадæн æмæ Знауыры районы зæхкусæгон-фермерон хæдзарад «Фарн»-æн кредиттæ раттыны фарст. Ацы хæдзарад кæндзæн маргъдарды куыст, афтæ ма организаци кæндзæн хъæрмуатон хæдзарадтæ. Проекты аргъ у 26 милуан сомы, уыдонæй 3 милуан сомы сты инвесторы æхцайы фæрæзтæ. Ам куыстæй ифтонг æрцæудзысты 21 адæймаджы. Ацы проекты, афтæ ма æндæр инвестпроектты реализаци кæнын ратдзæн экономикон эффект – бюджетмæ фиддонтæ фыст цæудзысты, цæрджытæ ифтонг цæудзысты хæлцадон продукттæй.
– Цахæм проекттæ реализаци æрцæудзысты æввахсдæр рæстæджы?
Инвестагентады æркæсынмæ сты цалдæр проекты, кæцытæ æвæрццагæй хъуамæ ас-къуыддзаг уой æввахсдæр мæйты. Уыцы проекттæй сæ иу у Дзауы районы дон æмæ лимонады рауагъд. Проект æххæст кæндзæн гом акционерон æхсæнад «Натурплант». Йæ аргъ у 88 милуан сомы æмæ куыстæй ифтонг æрцæудзысты 35 адæймаджы. Уый у перспективон здæхт æмæ йыл дарддæр дæр куыст цæудзæн, уымæн æмæ Хуссар Ирыстоны минералон дæттæ зындгонд сты сæ пайдайаг миниуджытæй. Мæ хъуыдымæ гæсгæ банысангонд проекты тыххæй уынаффæ ист æрцæудзæн иу-дыууæ мæймæ. Сæ радмæ æнхъæлмæ кæсынц æндæр проекттæ дæр кондады къабазы.
Comments are closed, but trackbacks and pingbacks are open.