Æрæджы Цхинвалы уагъд æрцыд Республикæ Хуссар Ирыстоны Парламент æмæ Уæрæсейы Федерацийы Советы æмгуыстады фæдыл къамисы рабадт. Уыцы нысанæн нæ бæстæмæ æрцыдысты уæрæсейаг парламентариты делегаци УФ-йы Федерацийы Советы дунеон хъуыддæгты фæдыл комитеты уæнг æмæ къамисы уæрæсейаг фарсæй æмсæрдар Сергей Цековы сæргълæудæй.
Ацы къамис кусы 2008 азæй фæстæмæ, йæ фæлгæтты скъуыддзаг æрцыд æмæ цæуы бирæ ахсджиаг фарстатæ. Рабадты боны фæткы фарстатыл уынаффæ кæнгæйæ, стыр хъусдард здæхт æрцыд Хуссар Ирыстон æмæ Уæрæсейы Федерацийы ‘хсæн бафысгæ Æмцæдисад æмæ интеграцийы фæдыл бадзырд реализаци кæныны закъондæттынадон ифтонгады фæдыл мадзæлттыл.
Хуссар Ирыстонæй къамисы æм-сæрдар, æддагон политикæйы фæдыл парламентон комитеты сæргълæууæг Коцты Игорь банысан кодта Уæрæсеимæ ацы бадзырды стыр нысаниуæг, уымæ, зæгъгæ, уæлæмхас бафыст æрцыд цалдæр æхсæнхицауадон æмæ æхсæнведомствæйон сразыдзинады. Комитеты сæргълæууæджы ныхæстæм гæсгæ Æмцæдисад æмæ интеграцийы фæдыл бадзырдыл дыууæ бæстæйы сæргълæуджытæ 2015 азы сæ къухтæ куы бафыстой, уæдæй нырмæ стыр куыст цæуы йе ‘ххæст кæныныл, уæлдайдæр æфсæддон фадыджы.
Сергей Цековы ныхæстæм гæсгæ, Федерацийы Совет æрдæг аз иу хатт исы Хуссар Ирыстонмæ ахасты уынаффæтæ. Хæрзæрæджы дæр ратификаци æрцыд ахуырады фæдыл сразыдзинад. Кæд, зæгъгæ, уæлдæр ахуыргæнæндонмæ бахауын æмæ фæхуымæтæггонд уавæрты дипломтæ райсынæн фадæттæ арæзт цæуы, уæд æнцонвадат кæны ахуырад райсыны процесс дæр, кæцы Хуссар Ирыстоны ахуырад раразмæ кæнынæн ратдзæн хорз фæстиуæг.
Зæрдыл ма æрлæууын кодта æнæ-низдзинад хъахъхъæныны фæдыл сразыдзинад, кæцыйыл къухтæ фыст æрцыд ивгъуыд аз ноябры мæйы. Уый здæхт у Хуссар Ирыстоны æмбæстæгтæн медицинон лæггæдтæ фæхуыздæр кæнынмæ. Ацы сразыдзинад рæхджы ратификаци æрцæудзæн æмæ хуссарирыстойнаг æмбæстæгтæн уæрæсейаг клиникæты фадат уыдзæн æнæаргъæй медицинон æххуыс райсынæн.
Ацы фарстыл дзургæйæ, Хуссар Ирыстоны Парламенты депутат Плиты Алек-сандр куыд радзырдта, уымæ гæсгæ, фылдæр хатт, рынчынтæн сæрмагонд æх-хуыс бакæныны тыххæй æрвитыны механизмы хъуыддаг къуылымпы цæуы. Фæн-дон бахаста, цæмæй республикæйы конд æрцæуа ахæм орган, кæцымæ гæсгæ æм-бæстæгтæн, фадат уа сæ документтæ бахæссынæн, æмæ хос кæнынмæ арвитын цы рынчынты бахъæуы, уыдон тыххæй фарст оперативонæй скъуыддзаг цæуа.
«Ацы фарст бæстон кæныны хъуыддаг кæй ныддаргъ, уымæ гæсгæ рынчынты хиуæттæ бар-æнæбары сæ рынчынты хос кæнынмæ кæнынц Гуырдзыстонмæ», – дзырдта Александр.
Ныртæккæ æппæт уыцы хъуыддæгтæ арæзт цæуынц Цæгат Ирыстоныл, æмæ Хуссар Ирыстонæй рынчынты рад рæстæгыл нæ хæццæ кæны. Уымæй дæр, депутат Къозонты Аланы ныхæстæм гæсгæ, Хуссар Ирыстоны дохтыртæ цы медицинон бæрæггæнæнтæ æмæ æндæр документтæ дæттынц, уыдон нымад нæ цæуынц Цæгат Ирыстоны æмæ рынчыны ногæй бахъæуы сæ æрæмбырд кæнын.
Афтæ ма, зæгъгæ, спайдагæнæн ис квотатæй, фæлæ уымæ дæр хъæуы æнхъæлмæ кæсын. Уый дæр бынтон къух нæ аразы, уымæн æмæ бирæ хатт тагъдыл рынчыны бахъæуы æрвитын.
Сергей Цековы ныхæстæм гæсгæ, ацы фарсты фæдыл хуссарирыстойнаг фарс лæмбынæг бæлвырдгæнæн хъуамæ æрбавдиса æркæсынмæ.
Къамисы рабадты хуссарирыстойнаг парламентаритæ раразмæ кодтой къорд ахсджиаг социалон фарсты – уæрæсейаг æмбæстагдзинад фæхуымæтæггонд уавæрты райсын, пенситæ аразыны рæстæджы куысты стаж бахынцыны проблемæтæ, Хуссар Ирыстоны территорийыл мады капитал фидын æмæ социалон фæдзæхстады фонд саразыны амæлттæ.
Къамисы уæрæсейаг æмсæрдары ныхæстæм гæсгæ ацы фарстытæ се ‘ппæт дæр скъуыддзаг æрцæудзысты, уымæй нырма ныфс не ‘вæрынц. Фыццаджыдæр сæ хъæуы сахуыр кæнын, уый фæстæ фадæттæм гæсгæ куыст цæудзæн сæ æрбæстон кæныныл.
Хуссарирыстойнаг закъондæттынадон орган æмæ Уæрæсейы Федерацийы Советы æмгуыстады фæдыл къамисы хайадисджытæ ма æркастысты Хуссар Ирыстоны сывæллæттæн æнæнизгæнæн лагер «Артек»-ы улæфтытæ сорганизаци кæныны фарстмæ.
Хуссарирыстойнаг фарсæй къамисы æмсæрдар Коцты Игоры ныхæстæм гæсгæ æнæнизгæнæн лагеры ивгъуыд аз баулæфыдысты Хуссар Ирыстонæй сывæллæттæ.
Сергей Цеков куыд банысан кодта, уымæ гæсгæ УФ-йы Ахуырады министрады руаджы хуссарирыстойнаг сывæл-лæттæн фадат уыдзæн лагеры улæфынæн. Æнæнизгæнæн лагертæ, зæгъгæ, Уæрæсейы территорийыл бирæ ис – Мæскуыйы бын, Краснодары крайы. Бахатыд хуссарирыстойнаг коллегæтæм, цæмæй развæлгъау бакусой ацы фарстыл æмæ бацæттæ кæной къорд 25 адæйма-джы скондæй.
Рабадты боны фæткы фарстытæй иу РХИ-йы Парламенты Аппараты кусджыты УФ-йы Федерацийы Советмæ æрвитын закъондæттынадон архайд ифтонг кæныны фæдыл фæлтæрддзинад райсыны нысанæн æмразы æрцыд дыууæ фарсæрдыгæй дæр.
Коцты Игорь фæндон бахаста, цæмæй ацы æмгуыстад иу фарсон ма уа, æмæ Федерацийы Советы кусджытæ дæр Цхинвалмæ цæуой ацы нысанæн.
Рабадты хайадисджытæ ма сбæлвырд кодтой æмгуыстады фæдыл къамисы радон рабадт, кæцы уагъд æрцæудзæн Мæскуыйы ацы аз ноябрь-декабры.
Хуссар Ирыстоны закъондæттынадон орган æмæ Уæрæсейы Федерацийы Советы æмгуыстады фæдыл къамисы æмсæрдæрттæ Коцты Игорь æмæ Сергей Цеков къухтæ æрфыстой рабадты кæронбæттæн суагъæйыл. Уый фæстæ кæрæдзийæн бакодтой зæрдылдарæн лæвæрттæ.
Банысан кæнын хъæуы уый, æмæ рабадты хайад кæй райстой Хуссар Ирыстоны æнæниздзинад хъахъхъæныны минæвæрттæ дæр.
Къæбулты Маринæ
Comments are closed, but trackbacks and pingbacks are open.